اليوم السابع رحلة المائة يوم لنسف الدهون
اليوم السابع رحلة المائة يوم مع الدكتور أحمد منصور

نظام أكلي في اليوم السابع “أول فري” في رحلة المائة يوم لنسف الدهون

النهاردة اليوم السابع ليا في رحلة المائة يوم لنسف الدهون، مش مصدق إن الوقت عدى بسرعة كده، حاسس إني يادوب كنت لسه بتكلم معاكم، عن أول يوم في الرحلة، لكن المهم أن الوقت اللي فات عدى على خير، وبدون أي لغبطة، وعلشان الحلو يكمل بقى.

كان لازم في اليوم الفري طبعاً ملغبطش، وده اللي بقوله دايماً، مش معنى إن لينا يوم فري في الأسبوع إننا نخرب كل اللي عملناه أول 6 أيام في الأسبوع، أنا الحمد لله خسيت الأسبوع الأول 2 كيلو، فحبيت إن اليوم الفري يكون بحدود معينة تخليني أستمتع باليوم ده وفي نفس الوقت مضيعش الاتنين كيلو دول، أو حتى جرام منهم، علشان أبني على الإنجاز مهدموش.

نظام يومي كان كالآتي، الصبح 3 تمرات مع كوب حليب، والفطار ربع رغيف عيش مع 6 معالق فول مع طبق سلطة صغير، مع حبة بطاطس مسلوقة ومهروسة وعليها فلفل أخضر وبهارات، وبعد كده وجبة الغداء كانت “سمك مشوي” آه والله زي ما بقولك كده، أنا بحب السمك وهو مفيد في العموم، ومفيد كمان ومهم في الرجيم، خدت مع السمك كمية رز أكبر من المعتادة علشان الفري بقى وكده، تقريباً حوالي 10 معالق، وطبعاً طبق سلطة جميل، وخدت واحدة بسكوتة ديجستف وثمرة تفاح، والعشاء كان كوب حليب.