علاقة فيتامين ( بـ 12 ) بثبات الوزن

الرجيم مش بس نظام مكتوب وخلاص، وهينجح مع الجميع، لإن وارد إنك تطبقي النظام بحذافيره وتلاقي نفسك ثابتة أو ممكن حتى يكون وزنك بينزل بمعدلات أقل من الطبيعية، وبما إني مش متاح لي إني أفتش في ظروف كل حالة على حدة وأعرف المشكلة بتاعة كل شخص بيتابع معايا عن الشخص الآخر.

فبحاول إني من وقت للتاني أتكلم معاكم في مواضيع تفيدك بجانب الرجيم وتدعم هدفك في وصولك للوزن اللي بتتمنيه.

النهاردة كلامنا عن vitamin B12

فيتامين بـ 12

اللي للأسف لو ناقص عندك، هتحسي بسببه إن دهونك عنيده، ووزنك مش بينزل والمشكلة في الأساس مش خطيرة ولا حاجة، هي مجرد إنك محتاجة تهتمي في رجيمك بالأكل اللي بيحتوي على الفيتامين ده، علشان يكون حرقك طبيعي، وتقدري تنزلي في وزنك بالمعدل الآمن اللي بينزل بيه متابعينا في #دايت_كلينيك.

الفيتامين ده ببساطة ليه دور أساسي جداً في العديد من الوظائف اللي بيقوم بيها الجسم، ومنها بناء الـ DNA وتكوين خلايا الدم الحمراء، لكن اللي يهمنا في فوائده …

إنه بيساعد الجسم في تكسير الكربوهيدرات، وكمان تحويل الدهون والبروتينات لطاقة.

 

طب أعرف منين إن الفيتامين ناقص عندي؟؟

في شوية أعراض كده معناها إن الفيتامين ناقص عندك زي:-

  • إصفرار في لون الجلد
  • ضعف عام في الجسم
  • الغثيان
  • سرعة ضربات القلب
  • ضعف الذاكرة
  • إضرابات نفسية وإكتئاب ( حد هنا عنده إكتئاب ولا حاجة ؟؟ 😂😂 )

 

نعمل إيه بقى ؟

الإجابة هي إننا نعرف الأكل اللي موجود فيه الفيتامين ده وهما كتير الحمد لله:-

  • لحم البقر ( الحمراء )
  • الكبدة
  • سمك السلمون
  • التونة
  • السمك بصفة عامة
  • الحليب قليل الدسم
  • الزبادي
  • الفراخ ( لحم الصدر )
  • المكسرات
  • البيض ( البيضة كلها بالبياض والصفار ) وتكون مسلوقة كويس
  • البروكلي
  • أفوكادو
  • البطاطا
  • المشمش
  • البابايا .. عارفين البابايا ؟ 😂😂
  • الفلفل ( الأخضر والأحمر والأصفر )
  • الجزر

 

 

كده الموضوع خلص .. يارب تخسوا وأشوفكم فرحانين دايماً ومستفيدين من وجودكم في دايت كلينيك .. 

 

قولولي في التعليقات، الموضوع فادك ولا لأ؟ وطبعاً طبعاً لا تنسوني من صالح دعائكم.

عن د/ أحمد منصور

17 تعليق

  1. ي دكتور انا كنت 95ونزلت 88 ف وزنت لقيت 90 ف مستغربه معقول يوم واحد عك يعمل كل ده

  2. غير معروف

    طيب يادكتور ممكن ناخد حقن ب 12 عادى ولا الأكل أفضل

  3. بنشكر حضرتك جدا علي مجهودك وطبعا كلامك ونصايحك مفيدة بس انا عندي استفسار انا كنت 87 وبدات دايت ودلوقتي بقيت 73 وانا طولي 161 وسني 28 وعندي بنوتة بنزل كده وزني مناسب ليا ولا محتاجة انزل اكتر للعلم انا عندي سيليوليت في منطقة الفخاذ ونفسي تبقي متناسقة مع جسمي عشان كله متناسق ماعدا المنطقة دي ارجو الرد

  4. شكرا يادكتور بجد معلوماتك كلها مفيده ربنا معاك

  5. السلام عليكم..كل عام و حضرتك بكل خير❤🌸
    يادكتورنا العزيز دلوقتي انا كنت ماشيه مظبوط قبل رمضان و لكن حصل اني اتشغلت جداااا و عكيييت الدنيااا جدااا جدااا كان عندي امتحانات و ما ادراك ما الامتحانات🤣💔و لسه مخلصتش “أزهر بقي و كده”🤷🏻‍♀️بمتحن من شهر ٤ والعيشه مره🙄💔😂و لسه هخلص يوم ١٧..موعدش حضرتك اني اقدر التزم بحاجه قبل يوم ١٧ لاني مش بكون فاضيه اجهز حاجه لنفسي ف باكل عادي م الاكل اللي معمول ف البيت..المهم عشان مطولش علي حضرتك..انا بشتغل اصلا كابتن في جيم😅 “مدربه يعني”😂كنت قبل الشغل ١٠٧ كيلو..مع التمرين و تظبيط اكلي إلي حداً ما علي مدار سنه و شويه مع العلم اني كنت بلغبط اوقات كتير بس وصلت ل ٨١ كيلو و كان شكل الجسم مظبوط بالنسبالي جداااا فاضل فيه شويه حاجات بسيطه يعني لو كنت وصلت مثلاً ٧٥ او ٧٠ كان هيبقي تمام التمام😭😭بس حصل اني عملت حادث بسيط و رجلي اتفتحت و اتمنعت لمده شهرين و زياده من الحركه تماماً..المهم اني زدت كتير ع الميزان بعد الفتره دي ما انتهت و قدر الله و ما شاء فعل..يمكن وصلت حاجه و ٩٠ المهم رجعت الشغل تاني بس رجوع التمرين زي الاول كان صعب جدااا عشان الاصابه اللي ف رجلي و الحماس مبقاش زي الأول..مع العلم اني بعد ما بقلظت من تاني شاء القدر اني اتخطب و انا مبقلظة😭😭💔💔و كانت المأساه والله..المهم بقي إن فرحي شهر ٨ اللي جاي ده..و لسه هرجع الشغل بعد الامتحانات..يعني التمرين مش هيبدأ غير بعد ما اخلص.. قبل رمضان ما يبدأ كنت ٨٩..معرفش ف الوقت الحالي بقيت كام بس مزدتش تقريبا زي ما انا او ممكن كيلو زياده..عايزة انزل ١٥ او ٢٠ كيلو ف خلال الشهرين و ف نفس الوقت شكل وشي قدر الامكان ميتغيرش لانه هيختفي شويه كده🤣المشكله اللي بتواجهني ف الارداف بتنزل بس بصعوبه شويتين بيكون الجزء اللي فوق اتشفط🤷🏻‍♀️🙄😂طولت علي حضرتك و صدعتك بس ياريت ياريت ترد عليا بليييييز..مش عايزة ابقي مبقلظة ف فرحيييييي كفايه الخطوبه💔💔😅🤷🏻‍♀️ساعدني

  6. انا بخس الا منطقة الصدر مش بتنزل ولا سم واحد اعمل ايه

  7. فاديا البيطار

    شكرا يادكتور على مجهودك معانا ومعلوماتك المفيدة

  8. ممكن ناخد حقن ديبوفيت ب ١٢ يا دكتور؟ و لو ممكن ناخد واحدة كل ٣ ايام صح و لاايه؟ و لمدة قد ايه شهر مثلآ و لا اكثر … و جزا الله حضرتك عنا كل خير ياااااااارب

  9. 😀☺️☺️

  10. غير معروف

    Hi dct merci ktr ilak jad chi bjanen nizamak bs sry fina ne5od capsule vit b 12 wala btnas7

  11. غير معروف

    شكرا من القلب يا دكتور

  12. عبير الشام

    شكرا ع الملومات القيمه

  13. حبيبتي ممكن اعرف أديش وقت ضليتي حتى نزلتي هالوزن ماشالله و كان في رياضة و لا بس حمية

  14. شكرا علي المعلومات المفيدة ربنا يجزاك خير

  15. الضوء الساطع الساطع

    شكرا على مجهوداتك يا دكتور
    انا عندي اكتئاب وبنسى اكثر من الاول

  16. انتي بجد عسل جدااا ربنا يفرحك ويسعدك. عاوزه تحافظي على وشك وتخسي اسرع. شرب الميه اشربي ميه كتير. هتديلك احساس بالشبع. وف نفس الوقت هتحافظ على نضاره بشرتك.
    ولازم تاخدي فوليك اسيد وفيتامين سي وكروماكس. لو عاوزه تعلي الحرق عندك. الفوليك اسيد مهم جدااا وفيتامين سي هيحافظ على نضاره بشرتك. الف مبروك يا عروسه

  17. سهاد علي

    السلام عليكم دكتور شلونك اني اريداسالك عن رجيم للزيادة وفرط نشاط الغده الدرقية مدااعرف شسوي اكول منا اجوع منا يعني ابسرعه اجوع ولعبت رياضة وسويت رجيم مافاد

اترك رداً على إيمي إلغاء الرد

لن يتم نشر عنوان بريدك الإلكتروني.