رجيم المبتدئين .. 14 يوم فقط كافيين لتكوني في بداية الطريق الأصح

أنتي موجودة هنا علشان حد تعرفيه خس مع دايت كلينيك، رشحنا ليكي أو من نفسك حابة تغيري من شكل جسمك، وبحثك وصلك لينا، وقصص النجاح شجعتك، وبناء عليه دخلتي تشوفي رجيماتنا، وإذ بالمفاجأة … إيه ضاااااه ( بصوت فيفي عبده ) هو الدكتور عايزني أكل من غير عيش ورز، طب سلام عليكم أجيله في وقت تاني، علشان شكله مرهق دلوقتي.

مهما أغراكي الأكل، ومهما أظهرتي للناس أو أقنعتي نفسك إن شكلك كده كويس وأنك مش محتاجة رجيم، فأنتي طبعاً بتضحكي على نفسك، متزعليش مني، أنتي واحدة من إتنين.

  • لإما حابة تخسي علشان مرضك أصبح علاجه الوحيد إنك تخسي، زي مشاكل العظام وأمراضها المختلفة أو مثلاً نصحتك طبيبة النساء بإنك تخسي طالما عايزة تحملي، وهكذا.
  • لإما خدتي القرار ده وأنتي في كامل صحتك ومش متضررة عضوياً أبداً، ولكن شكل جسمك مش عاجبك، ولأ وكمان المقربين ليكي واللي بيحبوكي بدأو يلمحوا من بعيد وأحيانا من قريب إنك لازم تخسي، علشان هتبقي أحلى.

 

 

مفيش أي داعي طبعاً لكلام التنمية البشرية، وأي تحفيز، لإنك بالفعل عندك دافع خلاكي معانا دلوقتي ..  أعتقد أن البداية ده وقتها، وبعد تفكير عميق في نفسيات أصحاب الوزن المرتفع، أيقنت إنكم بحاجة لوقود يضعكم بطموحكم في مقدمة طريق الأبطال.

 

الحمد لله رب العالمين، نظام دايت كلينيك، هو أفضل نظام تخسي بيه، لكن أنا عارف إنه صعب، وعلى قدر صعوبته، بتكون نتيحته الجميلة، وكونه آمن فده شئ مضمون بفضل الله وتقدروا تتأكدوا من اللي خسوا معانا سواء كيلو أو حتى 70 كيلو، محدش عانى صحياً نتيجة إتباعه للرجيم محدش خس بترهلات، طالما كان متبع للتعليمات ومش بيهمل أي نصيحة بقولها في مشوار الرجيم.

 

رجيم المبتدئين .. هيستمر لمدة أسبوعين .. 

الهدف من إلتزامك بيه، هو إنه دواء فعال هيخليكي إن شاء الله تلتزمي بالرجيم بتاعنا العادي، وتبقي مش شيفاه صعب، وبالتالي، تخسي بالمعدلات الرائعة اللي بتشوفيها في قصص نجاحنا.

 

 

آه طبعاً رجيم المبتدئين هيخسسك، أطمني، لو إلتزمتي بيه، وهيحببك في الرجيم، لكنه للأسف مينفعش لايف ستايل، لإنك لو إستمريتي عليه لفترات طويلة، مش هتحققي بيه نتائج حلوة.

فعلشان ألخصلك إيه اللي هيحصل بعد أسبوعين بإذن الله

 

هتعملي رجيم سهل جداً تلتزمي بيه حرفياً.

هتخسي بمعدل يبهرك.

هتتشجعي تنضمي لتحديات دايت كلينيك القوية.

 

 

 

متكمليش الكلام اللي جاي ده بقى إلا لو أنتي:- 

 

طول الوقت نفسك تعملي رجيم، ومش عارفه تاخدي الخطوة أو بتلتزمي يوم وإتنين، وترجع ريما لعادتها التخـــــــــينة.

أو

بدأتي معانا الرجيم من زمان ونزلتي في الوزن ولكن بقالك فترة أكثر من 45 يوم ( شهر ونصف ) مش ملتزمة وحابة ترجعي الأمجاد، سامعين كويس، أكتر من شهر ونصف، يعني مش أي حد عارف يطبق رجيماتنا ييجي يجرب ده لمجرد أنه سهل، والسبب ببساطة إنه مش هيجيب نتيجة معاكي.

 

 

 

توكلنا على الله .. 

 

 

اليوم الأول في الرجيم

 

هل تعلمي سيدتي إن أصعب حاجة في الرجيم
واللي بيخلي حد ينجح وحد تاني يفشل هما أول ثلاث أيام ؟؟
يعني لو عدوا على خير، إعرفي إنك هتبقي بطلة الأبطال بعد فترة قليلة، علشان كده أهم لعبة هنلعبها في رجيم المبتدئين هتكون أول تلات أيام .. هنخليهم يمشوا بطريقة تخليكي تقدري تكملي للنهاية وتبقي لأول مرة في حياتك تلتزمي تلات أيام ورا بعض.

متستغربيش .. أنتي بيكون عندك قوة هائلة ورغبة تخسي وبالفعل بتصحي زي أحمد زكي في فيلم ” النمر الأسود ” ومشغلة أغنية ” إتقدم .. ها ها ها .. إتقدم  .. وكفاية خلاص تتندم ” وبتفطري فطار دايت وأنتي شايفة كل العائلة الكريمة بتفطر سمبوسك أصلاً ومحشي، ورغم كده بيكون سهل عليكي كنمر أسود، إنك تلتزمي بالفطار الصحي، وبتيجي ع الغداء تلاقي الأشرار عرفوا إنك بتعملي رجيم فقاموا طالبين بيتزا، وأنتي علشان أغنية ” إتقدم ” لسه شغالة في الخلفية، فبيكون عندك إرادة تخليكي تأكلي الفراخ المسلوقة، في الغداء عشان حلمك في إنك تلبسي طقم معين برضو مسيطر عليكي.

 

وعندما يحل المســــاء تحدث الكارثة، ولا عاد في نمر أسود ولا عايزة طقم حلو ولا نيلة أنا عايزة صينية مكرونة بشاميل دلوقتي لإما هرتكب جريمة، رجيم إيه بس وكلام فارغ إيه .. طب كوباية زبادي يا آنسة .. طب تفاحة يا مدام، … الفستان اللي نفسك تلبسيه يا هانم.

 

ولا حياة لمن تنادي

 

لذلك فطار اليوم الأول

هنستغل فيه إن الإرادة في قمتها وهيكون فطار صحي ومتنسيش تشغلي أغنية ” إتقدم ”

 

إختيارات الفطار:- 

 

ربع كيلو جبنة قريش + ثمرة خيار

أو

كوب حليب + ثمرة فاكهة

أو

2 بيضة مسلوقة + ثمرة فلفل + ثمرة خيار

أو

5 معالق فول + ثمرة خيار

 

 

بين الفطار والغداء

 

5 حبات مكسرات من أي نوع

أو

ثمرة فاكهة

أو

كوب حليب

 

 

الغداء صحي برضو 

 

  • 2 بيضة مسلوقة
  • أو ربع كيلو جبنة قريش
  • أو ربع فرخة مشوية أو مسلوقة
  • أو ربع كيلو لحمة مشوية أو مسلوقة
  • أو ربع كيلو كفتة مشوية
  • أو علبة تونة بدون زيت
  • أو نصف كيلو سمك مشوي

 

+ طبق سلطة + طبق خضار من الآتي:- ( البامية – السبانخ – الكوسة – الفاصوليا الخضراء )

 

مفيش رز  .. إطمني هتعرفي تعملي كده .. مهو أول يوم رجيم بقى والإرادة في العلالي.

 

 

مفيش سناك بين الغداء والعشاء

 

 

عشاء أول يوم 

هتكون الإرادة صفر مش أكتر من كده وبالتالي، مش هنضحك على بعض ونقول العشاء ثمرة فاكهة ولا ينفع نأكل حاجة زي الفطار بدون عيش.

لذلك معانا في العشاء .. نصف رغيف عيش مش ربع

ومعاه حاجة من الإختيارات القادمة:-

  • شريحتين جبنة رومي
  • قطعتين جبنة مثلثات
  • شريحتين لا نشون بقري
  • 4 شرايح لانشون ” فراخ “
  • قرصين طعميه

 

وممكن برضو تختاروا من دول:-

  • 2 بيضة مسلوقة
  • 5 معالق فول
  • 125 جرام جبنة قريش

 

وممكن لو حابة حاجة مسكرة

تاخدي النصف رغيف عيش اللي قولنا عليه + 3 معالق مربى

 

 

كده إحنا خلصنا اليوم الأول بالنفسية اللي بتعيشها أي واحدة بتعمل دايت، والتلات وجبات كانوا كما يجب الحمد لله.

 

 

 

نظام اليوم الثاني

 

يا ترى وضعنا إيه في اليوم الثاني في الفطار، طبعاً متعشيين كويس، وصاحيين مزاجنا حلو إننا إلتزمنا بالمكتوب في أول يوم، لذلك في إرادة تخلينا نلتزم بفطار صحي بدون عيش

 

اختيارات فطار اليوم الأول:-

 

2 بيضة مسلوقة

أو

ربع كيلو جبنة قريش

أو

5 معالق فول

أو

2 ثمرة فاكهة

 

 

سناك 1

 

كوب حليب

 

 

الغداء

 

علشان أنا واثق مليون في المائه إنك في اللحظة دي مستحيل تتغدي بدون عيش أو أرز فـ الغداء

هيكون معاه 6 معالق رز بحالهم أو نصف رغيف عيش أو 8 معالق مكرونة ( كميات كبيرة وحلوة أهيه )

وطبعاً مننساش طبق السلطة وكمان طبق الخضار

 

وهنختار نتغدى بـ

  • ربع فرخة مشوية أو مسلوقة
  • نصف كيلو سمك
  • ربع كيلو لحمة مشوية أو مسلوقة
  • علبة تونة بدون زيت
  • ربع أرنب مشوي أو مسلوق
  • 2 بيضة مسلوقة
  • ربع كيلو جبنة قريش

 

 

 

سناك 2

 

3 حبات مكسرات من أي نوع

أو

ثمرة فاكهة

أو

5 حبات فول سوادني

 

 

وطبعاً بما إننا كلنا كويس في الغداء هترجع لينا تاني الإرادة اللي تخلينا نتعشاء بطريقة صحية ونستغنى عن العيش

 

إختيارات العشاء من الآتي:-

  • 2 علبة زبادي
  • أو كوب حليب كامل الدسم
  • أو كوب لبن رائب

 

 

اليوم الثالث 

 

 

اليوم الثالث ده يوم الحلويات ..

مش معقول يكون رجيم للمبتدئين وتقدري تتخطي تلات أيام متواصلين في الرجيم بدون حلويات، لذلك معانا في السناك بين الفطار والغداء أي نوع حلويات والكمية قطعة بحجم نصف الإيد .. إيدك من غير صوابع يعني .. آه بالظبط قطعة صغيرة.

 

بس كده ؟؟

 

لأ يا فندم إحنا بنعمل المستحيل علشان اليوم ده يعدي بإلتزام لإنه آخر يوم مهم وصعب، علشان كده العشاء .. هيكون فشار والمقدار .. كوبايتين ونصف فشار.

 

 

كده باقي الفطار والعشاء

 

الفطار

 

إختاري من بين:-

 

كوب حليب + 4 معالق بليلة

أو

كوب حليب + 4 معالق شوفان

أو

كوب حليب + 4 معالق كورن فلكس

أو

ربع رغيف عيش + 5 معالق فول

أو

ربع رغيف عيش + 2 بيضة مسلوقة

أو

ربع رغيف عيش + 125 جرام جبنة قريش

 

 

سناك 1

 

حلويات زي ما اتفقنا

 

 

الغداء

 

  • ربع فرخة مشوية أو مسلوقة
  • نصف كيلو سمك
  • ربع كيلو لحمة مشوية أو مسلوقة
  • علبة تونة بدون زيت
  • ربع أرنب مشوي أو مسلوق
  • 2 بيضة مسلوقة
  • ربع كيلو جبنة قريش

+ طبق سلطة + طبق خضار

 

الغداء من غير أرز .. ما أنتي خدتي حلويات .. بلاش طمع بقى.

 

 

سناك 2

ثمرة فاكهة

 

 

العشاء

 

فشار

 

 

 

لو وصلتي إنك إنهيتي اليوم الثالث بإلتزام .. أدعوكي للذهاب لمحلات الملابس لإختيار طقم الأحلام اللي إن شاء الله هيكون بينك وبين إنك تلبسيه أيام معدودة، ما خلاص بقى باقي على إنك تبقي بطلة ” تَـــكة “.

 

 

 

اليوم الرابع

 

طبعاً إحنا دلوقتي بنكلم بطلة مرتقبة علشان كده هنقضي يوم كامل صعب شوية لكن أنتي أدها

 

إختيارات وجبة الفطار

  • 2 بيضة مسلوقة + ثمرة خيار
  • أو
  • 5 معالق فول + ثمرة خيار
  • أو
  • 125 جرام جبنة قريش + ثمرة خيار
  • أو
  • 2 علبة زبادي

 

سناك 1

كوز ذرة مشوي

أو

ثمرة فاكهة

 

 

الغداء

 

ربع رغيف عيش أو 3 معالق أرز أو 4 معالق مكرونة + إختيار من الآتي:-

  • ربع فرخة مشوية أو مسلوقة
  • نصف كيلو سمك
  • ربع كيلو لحمة مشوية أو مسلوقة
  • علبة تونة بدون زيت
  • ربع أرنب مشوي أو مسلوق
  • 2 بيضة مسلوقة
  • ربع كيلو جبنة قريش

 

+ طبق سلطة + طبق خضار مطبوخ دايت ( فاصوليا خضراء – كوسة – بامية – سبانخ  )

 

 

سناك 2

 

ثمرة فاكهة

 

 

العشاء

 

 

طبق فشار

 

 

 

 

نظام اليوم الخامس

 

 

الفطار

 

ربع رغيف عيش + حاجة من دول:-

 

  • 10 صوابع بطاطس مقلية
  • أو
  • 2 قرص طعمية
  • أو
  • 2 شريحة جبنة رومي
  • أو
  • 2 قطعة جبنة مثلثات
  • أو
  • 5 معالق فول
  • أو
  • 2 بيضة مسلوقة

 

سناك 1

 

ثمرة فاكهة

أو

كوب حليب

 

 

الغداء بدون عيش أو أرز

 

وتختاري من دول

 

  • ربع فرخة مشوية أو مسلوقة
  • ربع كيلو كبدة مطبوخة بزيت قليل
  • نصف كيلو سمك
  • ربع كيلو لحمة مشوية أو مسلوقة
  • علبة تونة بدون زيت
  • ربع أرنب مشوي أو مسلوق
  • 2 بيضة مقلية أو مسلوقة
  • ربع كيلو جبنة قريش

والسلطة وطبق الخضار

 

سناك 2 ثمرة فاكهة

 

 

العشاء

 

كوب زبادي

 

 

 

 

اليوم السادس

 

الفطار

 

ربع رغيف عيش + حاجة من دول:-

  • 3 معالق مربى
  • 2 شريحة جبنة رومي
  • 4 شريحة لانشون فراخ
  • 2 شريحة لانشون بقري
  • 2 قطعة جبنة مثلثات
  • 2 قرص طعمية
  • 4 معالق فول
  • 10 صوابع بطاطس مقلية
  • 2 بيضة مسلوقة

 

سناك 1

 

ثمرة فاكهة

أو

كوب حليب خالي الدسم

 

 

 

الغداء

 

 

  • ربع فرخة مشوية أو مسلوقة
  • نصف كيلو سمك
  • ربع كيلو لحمة مشوية أو مسلوقة
  • علبة تونة بدون زيت
  • ربع أرنب مشوي أو مسلوق
  • 2 بيضة مسلوقة
  • ربع كيلو جبنة قريش
  • ربع كيلو كبدة

 

+ طبق سلطة + طبق خضار

 

 

سناك 2

 

كوب حليب

أو

ثمرة فاكهة

 

 

العشاء

 

طبق فشار

أو

كوب مهلبية

أو

2 علبة زبادي ( وفي حد هيسيب المهلبية وياكل زبادي برضو )

 

 

اليوم السابع 

 

 

النظام اللي المفروض نمشي عليه بالتفصيل هتلاقوه

لما

تضغطوا على كلمة هنا الموجودة بين القوسين ( هنا )

 

 

 

 

إنتهى الأسبوع الأول .. 

قدرتي بفضل الله تلتزمي لمدة 7 أيام ..

رجيم سهل وجميل وبخطة زكية قدرنا نخليكي تأكلي بعض الوجبات ربما لأول مرة في حياتك بدون عيش أو أرز .. 

 

قطعتي بوصولك لليوم ده 25 % من المطلوب والأسبوع الثاني هيوصلك للـ 100 % اللي هتعدك وبكل قوة زي ما وعدتك تكملي في الرجيم وتحبيه .. 

 

وتعيشي عمرك كله بصحة ورشاقة.

 

 

 

 

نظام اليوم الثامن

 

الفطار

 

2 علبة زبادي

أو

2 بيضة مسلوقة

أو

125 جرام جبنة قريش

 

 

سناك 1

 

كوب حليب

 

الغداء

 

  • ربع فرخة مشوية أو مسلوقة
  • ربع كيلو جمبري مشوي
  • نصف كيلو سمك مشوي
  • ربع كيلو لحمة مشوية أو مسلوقة
  • علبة تونة بدون زيت
  • ربع أرنب مشوي أو مسلوق
  • 2 بيضة مسلوقة
  • ربع كيلو جبنة قريش
  • ربع كيلو كبدة

+ طبق سلطة + طبق خضار

 

 

سناك 2

 

3 تمرات

أو

ثمرة فاكهة

أو

كوب حليب

 

 

العشاء

 

2 علبة زبادي

أو

2 بيضة مسلوقة

 

 

نظام اليوم التاسع 

 

الفطار

 

4 معالق فول

أو

2 بيضة مسلوقة

أو

125 جرام جبنة قريش

أو

2 علبة زبادي

 

سناك 1

 

3 حبات مكسرات

أو

5 حبات فول سوداني

أو

ثمرة فاكهة

أو

كوب حليب

 

 

الغداء

 

  • ربع فرخة مشوية أو مسلوقة
  • نصف كيلو سمك
  • ربع كيلو لحمة مشوية أو مسلوقة
  • علبة تونة بدون زيت
  • ربع أرنب مشوي أو مسلوق
  • 2 بيضة مسلوقة
  • ربع كيلو جبنة قريش
  • ربع كيلو كبدة

 

+ طبق سلطة + طبق خضار

 

 

لا يوجد سناك بين الغداء والعشاء

 

 

العشاء

 

طبق فشار

أو

2 كوب زبادي

 

 

 

نظام اليوم العاشر

 

الفطار

 

ربع رغيف عيش + حاجة من دول:-

 

  • 2 بيضة مسلوقة
  • أو
  • 5 معالق فول
  • أو
  • 125 جرام جبنة قريش

 

أو

كوب حليب + 4 معالق شوفان أو كورن فلكس أو بليلة

 

 

سناك 1

 

ثمرة فاكهة

 

 

الغداء

 

فري ..

 

كشري .. محشي .. مكرونة بشاميل .. كلي اللي تحبيه لكن مفيش حلويات في اليوم ده

 

 

العشاء

 

2 كوب زبادي

 

أو

 

كوب زبادي + ثمرة فاكهة

 

 

نظام اليوم الـ 11 

 

 

الفطار

 

2 علبة زبادي

أو

125 جرام جبنة قريش

أو

2 بيضة مسلوقة

 

سناك 1

 

كوب حليب خالي الدسم

 

 

الغداء

 

  • ربع فرخة مشوية أو مسلوقة
  • نصف كيلو سمك مشوي
  • نصف كيلو جمبري مشوي
  • ربع كيلو لحمة مشوية أو مسلوقة
  • علبة تونة بدون زيت
  • ربع أرنب مشوي أو مسلوق
  • 2 بيضة مسلوقة
  • ربع كيلو جبنة قريش
  • ربع كيلو كبدة

+ طبق سلطة + طبق خضار

 

 

سناك 2

ثمرة فاكهة

 

 

العشاء

 

2 بيضة مسلوقة

أو

2 علبة زبادي

أو

125 جرام جبنة قريش

 

 

نظام اليوم الـ 12

 

الفطار

 

6 قطع بسكوت سادة + كوب شاي

أو

كوب حليب + ( 4 معالق بليلة أو كورن فلكس أو شوفان )

 

 

وتقدري تاخدي ربع رغيف عيش + حاجة من دول:-

  • 2 ببضة مسلوقة
  • 5 معالق فول
  • 125 جرام جبنة قريش

 

سناك 1

 

ثمرة فاكهة أو كوب حليب خالي الدسم

 

 

الغداء

 

  • ربع فرخة مشوية أو مسلوقة
  • نصف كيلو سمك
  • ربع كيلو لحمة مشوية أو مسلوقة
  • علبة تونة بدون زيت
  • ربع أرنب مشوي أو مسلوق
  • 2 بيضة مسلوقة
  • ربع كيلو جبنة قريش
  • ربع كيلو كبدة
  • ربع كيلو جمبري مشوي

 

+ السلطة والخضار

 

 

سناك 2

 

ثمرة فاكهة

 

 

العشاء

125 جرام من أي نوع جبنة قليلة الدسم

أو

2 كوب زبادي

 

 

 

نظام اليوم الـ 13

 

الفطار

 

6 قطع بسكوت سادة + كوب شاي

 

أو

 

كوب حليب خالي الدسم + ( 4 معالق كورن فلكس أو بليلة أو شوفان )

 

أو

 

ثمرة بطاطس مسلوقة + بيضة مسلوقة

 

وتقدري تاخدي ربع رغيف عيش + حاجة من دول:-

  • 2 بيضة مسلوقة
  • أو
  • 4 معالق فول
  • أو
  • 125 جرام جبنة قريش

 

سناك 1

 

كوب حليب + ثمرة فاكهة

 

 

الغداء

 

  • ربع فرخة مشوية أو مسلوقة
  • نصف كيلو سمك
  • ربع كيلو لحمة مشوية أو مسلوقة
  • علبة تونة بدون زيت
  • ربع أرنب مشوي أو مسلوق
  • 2 بيضة مسلوقة
  • ربع كيلو جبنة قريش
  • ربع كيلو كبدة

+ طبق سلطة + طبق خضار

 

 

نظام اليوم الـ 14

 

فري وتقدروا توصلوا لخطة اليوم الفري

 

بالضغط على كلمة هنا الموجودة بين القوسين ( هنا )

 

 

 

 

طبعاً ملاحظين إن الأسبوع الثاني أصعب من الأول ..

علشان كده أنه بيمثل 75 % من الطريق اللي طول الوقت وهو طريق الرجيم، لكن بعد الأسبوعين دول إن شاء الله مش هيكون في حاجة صعبة عليكي أبداً بإذن الله.

 

في مفاجئة لازم تعرفيها،

إنك لو أول مرة تعملي رجيم،

أو بقالك أكتر من شهر ونص مش ملتزمة

وطبقتي الرجيم السهل جداً جداً

ده هتنزلي من 3 كيلو إلى 5 كيلو خلال أسبوعين فقط!!!

 

 

بعد ما تمشي على الرجيم ده، تابعي معانا بعده على طول في رجيماتنا علشان رجيم المبتدئين أكتر من أسبوعين مش هيكون فعال معاكي، هتحتاجي فور الإنتهاء منه

الإنضمام لتحدياتنا، اللي بتكون قريبة بنسبة كبيرة من رجيم الأسبوع الثاني، من رجيم المبتدئين.

 

 

 

نصائح وتعليمات

 

كل الكلام اللي فوق ده مع شرب أقل من 8 أكواب مياه في اليوم .. ملوش لازمة ..

إذا شرب الماء هام جداً جداً جداً

 

وقت ما تجوعي في أي وقت من اليوم .. كلي خيار أو خس.

 

ربع رغيف عيش بلدي تقدري تبدليه بنصف رغيف عيش سن أو واحد توست بني.

 

يفضل يكون في فرق بين آخر وجبة والنوم 3 ساعات ع الأقل لو صعب عليكي .. مفيش مشكلة .. كلي في أي وقت براحتك.

 

بما إنك أول مرة تعملي رجيم مش هقولك مسموح بمعلقة سكر في اليوم، لكن عادي تاخدي 3 معالق تقسميهم براحتك ع المشروبات، الكلام ده خلال الأسبوع الأول، وفي الأسبوع الثاني هيكون مسموم في اليوم بـمعلقتين فقط يومياً من السكر.

 

 

الرجيم مناسب لكل الأوزان.

 

الرجيم تقدري تمشي عليه لو مرضعة بس في حالة إن عمر طفلك فوق الـ 4 شهور وبدأ يأكل ويعتمد في التغذية على الأكل من بره بجانب الرضاعة،وليكي كوب عصير إضافي 

( برتقال – جوافة – وهكذا .. )

ويومياً تبدأي يومك بكوب حليب معاه 3 تمرات أو معلقة عسل أبيض.

 

الرجيم غير مناسب لمرضى السكر والضغط والحوامل بدون إستشارة طبيبك المعالج.

 

لو هتصومي صيام مسلمين مع النظام .. تشوفي المكتوب في وجبة الغداء تفطري بيه، وتتسحري بالمكتوب في الفطار، وبين الفطار والسحور .. السناك المكتوب في النظام.

 

 

 

يارب أكون قدرت أفيدكم .. لا تنسوني من صالح دعائكم 

عن د/ أحمد منصور

57 تعليق

  1. غير معروف

    دكتور ممكن اخد مع الرجيم ده حبوب lishou
    انا فرحي بعد 4 شهور وورني 104 وطولي 160 ومش عارفه اعمل اي

  2. ام اللول

    حلو كتيييييير حبيت 😍

  3. غير معروف

    دكتور طب ده هنمشي عليه من امته

  4. غير معروف

    لو سمحت يادكتور اللي كان ماشي معاك في رجيم رمضان هيمشي علي النظام ده برده؟؟؟

  5. غير معروف

    مرحبا دكتور ما فهمت امتى يوم فري بعد يوم السابع بس نخلص الالسبوع الاول ولا ما في يوم فري

  6. لو سمحت يادكتور انا فرحي بعد ٣شهور ووزني ٩٥ وطولي ١٦١ ونفسي اخس جداااا جربت قبل كدة وخسيت بس بطلت بقالي حوالي شهرين وزيت ووصلت للوزن دة فايريت يادكتور لو حضرتك تقولي علي حاجة تساعد مع الدايت لان يعتبر مفيش وقت كفايه وشكرا لحضرتك علي مجهودك

  7. غير معروف

    دكتور حبيبنا كيف طريقة طبخ الخضار دايت

  8. غير معروف

    دكتور هو الشوفان نكول اي نوع من شوفان او لازم يكون نوع معين وكيف فيني اعملو يعني اخود شواي شوفان وخليطو مع حليب بس افدني يا دكتورنا

  9. ميمو ميمو

    دكتور انا معاك من قبل كده بس فعلا في رمضان كنت ملغبطة جامد و كملت في العيد و أن شاء الله هالتزم تاني و هاكمل خصوصا اني كنت نزلت 16ك من شهر يناير ونفسي اخس 30ك كمان و جزاك الله عنا خير الجزاء

  10. انا كنت 85 ولوقتي بتقتي 81

  11. سومية Adris Dls

    والله يا دكتور انت معجزة في حياتنا يعني بعد ما عرفناك صدفة و التزامنا معاك و بعد ما نزلت ٣٥ كيلو بمعجزة تجي اليوم بعد حوالي ٤٥ يوم محصلش فيهم نزول لانو ماكانش فيه التزام بس كان فيه حدر و بالتالي و الحمد لله مازتشش ولا غرام و الحمد لله تعطيلنا رجيم نرجع فيه للانجازات القديمة و تمنح لنا فرصة جديدة و بداية جديدة بحييك على المجهود و ان شاء الله مكملين و للإمام

  12. المفروض يادكتور الرجيم دا فى ال اسبوعين دول المتوقع نزول كام كيلو

  13. عبير الشام

    انا من جماعه الشهر ونص ملخبطين
    ابدا فيه؟

  14. كل سنه وحضرتك طيب يادكتور ان شاء الله مكملين انا كنت 96.200 وبقيت 83 في شهرين ونص وان شاء الله مكمله 60 وربنا يجازيك كل خير عنا

  15. ام حذيفه

    ههههههخه ان شاءالله هكون معاكم

  16. شكرا يادكتور لمجهودك معنا ومكمل معاك انشاء الله

  17. فاديا البيطار

    تسلم ايدك يادكتور وجزاك الله كل الخير

  18. جميل جدا دكتور انا معاك من كان وزني ٦٩ وحاليا وزني ٥٣ الحمدلله والرجيم الجديد جميل ومناسب لي كا اثبات وزن وربنا يخليك

  19. دكتور انا معاك من كان وزني ٦٩ وحاليا وزني ٥٣ الحمدلله والرجيم الجديد جميل ومناسب لي كا اثبات وزن وربنا يخليك لينا

  20. غير معروف

    انا كنت من الناس اللي ماخبطين وان شاء الله التزم به

  21. غير معروف

    انا خارجه من رمضان محبطة وزنى زاد شوية عشان كده ان شاء الله هلتزم

  22. اولا دكتور جزاك الله خير عن كل ماتقدمه لمساعدة ناس كتير بوفرح لما تخس جعله الله ف ميزان حسناتك وفعلا انا لما انضميت لبرنامج دايت كلينيك من فترة قليلة حسيت بطاقة ايجايبة حضرتك بتنشرها داخل الكلمات وبالتالي بتنبعث ف ارواحنا عشان نقدر نكمل مشوارنا فعلا شكرا جدا لحضرتك .
    انا كونت ملخبطة بقالي شهور وناوية ان شاء الله ابقي معاكوا بس فيه سؤال لو بصوم ازاي اقدر اوازن بين الصيام والنظام ولا ارجع للنظام الصيام بتاع رمضان ايام الصيام والايام التانية النظام ده عادي .

  23. حلو جدا تسلم ايدك ربنا يوفقك ويجازيك خير عنا يارب..

  24. غير معروف

    ممكن اعرف كمية الفشار قبل ماتتعمل قد ايه وممكن اعمله بالزيت

  25. الزهراء

    كم وزن بيخرج مع الدايت دا لو بدون رياضه ك بدايه لنها صعبه الرياضه اتعب كثير

  26. غير معروف

    يا دكتور أما معاك من فترة وخسيت ٧ كيلو منهم ٥ فى رمضان النظام ده ينفع معايا ولا لأ
    ده حضرتك بتقول مبتدئين

  27. دكتور انا وزني 68 وطولي 157 محتاجة اخس 13 كيلو
    اول مرة اعمل دايت وهبدأ مع حضرتك ان شاء الله

  28. نادية منال

    السلام عليكم لم التزم خلال شهر رمضان ولكن باذن الله سوف ابدأ معكم بقوة سسسسسلامممممم

  29. انا معاكم ومبتدئة رح ابدأ اليو م

  30. طيب مفيش مشروبات تعلى الحرق يادكتور مع النظام ويريت لو في أدوية لاني وزني ١١٠ الحرق بيوقف معايا كل مرة انزل ١٠ ك وارجعهم تاني واكتر بمل يعني وهل ينفع استبدل الحليب الخالي الدسم بحليب كامل الدسم حتى لو هقلل الكمية وينفع اضيفه ع الشاي او النسكافيه البلاك

  31. غير معروف

    م

  32. بصي انتي تلحقي تعمل دايت حلو وتخسي كويس واستغلي لو عليكي صيام مع دايت من اللي فوق ده ممكن توصلي معدل ممتاز والله اعلم

  33. واحلمي بالأنبهار اللي هتشوفيه في عين الناس والفستان حلو وكله تمام اظن مفيش اكتر من كده حافز

  34. غير معروف

    طيب يا دكتور عادي لو خلطت بين الوجبات يعني الفطار أخذ بيض وفول ونفس الشيء بالنسبه للعشاء والغداء عادي ولا لا أتمنى ترد بسرعه يادكتور

  35. ايوا باذن الله

  36. انا كنت بمشي معاكم بس رجعت للوراء أكثر من شهرين ينفع اكمل على الريجيم دا ولا اكمل معاكم في الريجيم الاسبوعي

  37. غير معروف

    الله يعطيك العافية دكتور علي تهبط

  38. انا اتشجعت جدا با دكتور
    انا وزنى زاد جدا بعد الحمل والرضاعه.. وان خلصت رضاعه وجه رمضان معرفتش اظبط لانى فطمت ف رمضان
    وان شاء الله ابدا ع طول معاكو وهوزن نفسى والتزم بالانظمه والتعليمات
    مشكور جدا يا دكتور ربنا يوفقك

  39. طب عاوزين ريجيم لوزن اكتر من 120ك

  40. غير معروف

    هل ممكن الاستغناء عن السناك

  41. غير معروف

    هل ممكن الاستغناء عن سناك

  42. غير معروف

    السلام عليكم لو سمحت يا دكتور انا عامله ريجيم مع نفسى بمعنى انا باكل كل انواع الاكل بس بكميات بسيطه موده لظروف البيت لانى عايشه فى بيت عيله مينفعش اعمل نظام اكل ليا لوحدى اول يوم رمضان وزنت نفسى لاقيت ٨٢ بصراحه انصدمت فقررت امشى على نظام ريجيم فقلت اقلل الاكل والشرب المشروبات اللى بتزود الحرق زى القرفه و الزنجبيل والشاى الا خضر بجانب شرب الماء بمعدل ٣ لتر فاليوم والحمدلله تانى يوم العيد وزنت نفسى ٧٤ ك فهل ده صح

  43. يا دكتور يعد اذنك اقدر امشي على دايت المبتدئين من بكره الاحد ولحد امتى الدايت ده

  44. القهوة والنسكافيه مسموحة دكتور

  45. هبدأ بكره ان شاء الله ابدأ من اليوم الاول و لا التانى يا دكتور
    و اصلا انا بدأت من رمضان معاكم بس لغبطت ايام العيد و عايزه اكمل لانى ملاحظه فرق فى المقاسات بس مش عايزه اوزن صراحه سيباها بالبركه 😅😆

  46. لو سمحت انا عندي 18 سنه وزني 140 وطولي 172ونبدأ في رجيم المبتدئين بس كده انا محتاجه رياضه جيم يعني ولا اعمل ايه

  47. غير معروف

    دكتور من بعد اذنك هل يجوز هذا الدايت للمريض بفشل الكلى بعمر 55

  48. دكتور طيب بالنسبة انى برضع طفلة مالهاش شهر ينفع امشى علي الدايت دة ولا حضرتك ممكن تزود أية علية عشان يناسبنى ارجو الرد

  49. ينفع استبدل كوب الحليب بنسكافيه ؟

  50. انا بدأت وحاسمة بنتيجة معقولة بس عايزة أسأل ع السكر الدايت لاني باشرب شاي كتير مسموح بسكر دايت كام ف اليوم
    كمان مبكملش اكتر من لتر مياه
    في أدوية تنصح بيها لاني جربت رجيم كتير قبل كده وكنت بأحد دول تخسيس

  51. غير معروف

    ياكتور انا انهارده لغبطت واكلت رغيف عيش مع السمك اعمل اييه😭😭😭😭😭😭😭😭😭 بس مأكلتش سلطه ولا خضار 😭😭

  52. لوسمحت يا دكتور ممكن اخد النص رغيف بتاع العشا فى السحور

  53. غير معروف

    يعطيك العافية دكتور
    سؤال طبق الخضار بكون مكروه صح

  54. عندي الرومادويد في العظم ومعظم الادوية فيها كورتيزون محتاجه امشي علي اني نظام من الي حضرتك منزله

  55. غير معروف

    رجاء الاجابه هل ممكن التبديل بين الوجبات أو بين الوجبه والسناك

  56. غير معروف

    لو سمحت يادكتور بعد رجيم المبتدئين اعمل ايه قربت اخلص 14يوم وحابة اعرف شو في بعدو وشكرا كتييير لحضرتك خسيت الحمدلله ملاحظة بس لسه ما وزنت نفسي

  57. غير معروف

    بتثلتي ازاي وساعدني ابداء بنفس الرجيم واكمل ازاي ممكن مساعده

اترك رداً على سحر إلغاء الرد

لن يتم نشر عنوان بريدك الإلكتروني.