رجيم جديد لوزن أعلى من 90 كيلو
رجيم وزن 90

الرجيم العادي لوزن أعلى من 90 كيلو مع الدكتور أحمد منصور غير مقاساتك في أسبوع

مرحباً بكم من جديد، ونعتذر عن التأخير لظروف خارجة عن إرادتنا، نسألكم الدعاء لنا، كالعادة ألتقي بكم لتقديم رجيم جديد، مناسب لوزن أعلى من 90 كيلو، ويحمل إسم النظام العادي.

رجيمنا بفضل من الله وتوفيقه ساعدنا بيه آلاف على مدار شهور، أنهم يحققوا قصص نجاح مبهرة، تلفت نظر أي حد يعرفهم، والدور عليك لو أول مرة تتابع معانا في دايت كلينيك، أوعدك مش هتصدق التأثيرات اللي بتحصل لجسمك، نزول حقيقي جميل جداً في الوزن وتغير في المقاسات ملحوظ، وبدون أي تأثير سلبي على شكل الوجه أو ترهلات الجسم أو حتى على صحتك بشكل عام.

على قدر إلتزامك هتشوف النتيجة بمشيئة الله، ركز ومهما كان اللي ضيعته ولا يهمك، المهم اللي جاي، أفتح صفحة جديدة، مفيش حد بينجح من أول مرة.

متبصيش تحت رجلك، وتتابعي التغيرات اللي هيعملها ليكي الرجيم يوم بيوم، لأن ده أمر ممكن يسبب لك إحباط، خلي إهتمامك أن كل يوم يعدي بدون لغبطة، وأكيد محصلة الإلتزام برجيمنا هتكون أكثر من مرضية ليكي.

لو عندك أي سؤال أو استفسار وحابب توصله لينا، الطريقة الوحيدة للتواصل معانا، هي إنك تسيبه في تعليق على قناتنا على اليوتيوب، وتقدر بكل سهولة توصل لليوتيوب من خلال الضغط على كلمة (دكتور أحمد منصور) الموجودة بين القوسين.

شرب الماء شئ أساسي خلال الرجيم لينا في اليوم ما لا يقل عن 8 أكواب من الماء، والأمر الآخر الذي لا يقل أهمية عن شرب الماء، هو كمية السكر الأبيض التي نستهلكها خلال يومنا.

أرجو لو دي أول مرة ليك تعمل رجيم، تحاول تيجي على نفسك، ومتزودش كمية السكر اليومية، عن 3 معالق أو أربعة بحد أقصى، لكن لو متابع لينا من زمان، فكفاية معلقة واحدة او اثنين فقط كل يوم.

الزيت سعراته الحرارية مرتفعة جداً، لكنه في نفس الوقت مهم ويعتبر الزيت الأفضل خلال الرجيم وهنا الكلام عن زيت الزيتون، أرجو متزودش الكمية اللي هتستهلكها عن معلقتين كبار بحد أقصى، جميل لو هنضيفه على الجبنة القريش أو على طبق السلطة في وجبة الغداء، أو نستخدمه في تحضير طبق الخضار الصحي زي الفاصوليا الخضراء أو السبانخ.

 نظام الرجيم الجديد يبدأ السبت 21 نوفمبر

رجيم الأسبوع الحالي بسيط إن شاء الله وتقدر لو وزنك أعلى من 90 كيلوـ تطبقه وتلتزم بيه بكل سهولة، وبدون أي معاناة.

نامي كويس.

إشربي مياه.

إتعرضي للشمس لو تقدري.

مارسي أي نوع من أنواع الرياضة، ولو حتى المشي في المكان داخل البيت، لو لمدة نصف ساعة.

حاولي توقفي كل قبل النوم بـ 3 ساعات.

لينا يوم فري، في نهاية الأسبوع، بقواعد هامة، ولكن يجب الإلتزام بها، هتعرفوها في كلمتين في نهاية المقال.

 

جدول الأكل من السبت 21 نوفمبر حتى الخميس 26 نوفمبر.

ممكن تبدأي يومك بكوب من الماء الدافئ مذاب فيه معلقة صغير مليانه “عسل أبيض”، وممكن نعصر عليها نصف ليمونة.

أو نبدأ يومنا بتناول 3 تمرات مع كوب ماء من الحنفية.

إختيارات الفطار خلال الأسبوع

كوب حليب خالي الدسم + 2 بيضة مسلوقة

أو

نصف كوب حليب كامل الدسم + 2 بيضة مسلوقة

أو

2 بيضة مسلوقة + 2 معلقة جبنة بيضاء لايت + شرائح طماطم وخيار وفلفل أخضر أو ألوان

أو

2 قطعة جبنة قريش + شرائح طماطم وخيار وفلفل أخضر

أو

قطعة جبنة قريش + بيضة مسلوقة + شرائح طماطم وخيار وفلفل أخضر

أو

4 معالق فول + بيضة مسلوقة + شرائح طماطم وخيار وفلفل أخضر

أو

قطعة جبنة قريش + بيضة مسلوقة + شرائح طماطم وخيار وفلفل أخضر

 

إختيارات الوجبة الخفيفة الأولى خلال الأسبوع

حبة بطاطا مشوية

أو

ثمرة فاكهة + علبة زبادي صغيرة

أو

2 ثمرة فاكهة

أو

كوب حليب خالي الدسم + ثمرة فاكهة

أو

نصف كوب حليب كامل الدسم + ثمرة فاكهة

أو

علبة زبادي صغيرة + 6 حبات لوز

 

إختيارات وجبة الغداء أول 6 أيام من السبت للخميس

 

300 جرام “ثلث كيلو” سردين مشوي بسعرات حرارية 600 سعر حراري تقريباً.

أو

2 كوب عدس أصفر مطبوخ

أو

400 جرام سمك بلطي مشوي “قرابة النصف كيلو” بسعرات حرارية 500 سعر حراري تقريباً.

أو

صدر فرخة مشوية أو مسلوقة

أو

علبة تونة بدون زيت

أو

200 جرام كبدة مشوية أو محضرة بطريقة أخرى صحية بسعرات تقارب 300 سعر حراري.

أو

200 جرام أو 250 جرام لحمة مسلوقة أو مشوية أو مفرومة ومحضرة بطريقة طبخ صحية

أو

6 معالق لوبيا بيضاء مطبوخة

أو

250 جرام “ربع كيلو” سلمون مشوي بسعرات حرارية قرابة الـ 400 سعر حراري.

أو

2 بيضة (ممكن نسلقهم) أو نعمل شكشوكة مع الخضار والباذنجان في صينية بالفرن

أو

300 جرام جمبري مشوي أو مسلوق حوالي 300 سعر حراري.

 

هنختار حاجة من اللي فوق 

ومعاها 6 معالق أرز بسمتي

أو

6 معالق أرز أبيض مسلوق

أو

حبة بطاطس

أو

نصف رغيف عيش بلدي

أو

رغيف عيش سن

أو

2 توست بني

 

+ طبق سلطة أو طبق خضار محضر بطريقة صحية من أحد الخيارات الآتية:- (سبانخ، كوسة، بامية، بروكلي، ملوخية، أو فاصوليا خضراء)

 

الوجبة الخفيفة الثانية

سناك (2)

لا يوجد

ممكن نآكل خيار أو خس ونشرب مياه

 

العشاء

إختيارات وجبة العشاء خلال الأسبوع

كوب لبن رائب

أو

2 علبة زبادي لايت

أو

قطعة جبنة قريش + خيار أو خس

 

جدول أكل يوم الجمعة 

اليوم الفري 27 نوفمبر

 

اليوم الفري فقط للملتزمين خلال الأسبوع بجدول الأكل بدون لغبطة.

وجبة الفطار دايت.

وجبة العشاء دايت.

وجبة الغداء وجبة مفتوحة.

مسموح بقطعة حلويات بعد وجبة الفطار أو الغداء.

 

وبكده يكون إنتهى نظامنا الجديد، أتمنى من كل قلبي التوفيق لجميع متابعينا الكرام.

لو بتستفيدي من وجودك معانا وتحبي تدعمينا وتشجعينا على الإستمرار، قيمي تطبيقنا دايت كلينيك بخمس نجوم على متجر جوجل بلاي.

دمتم بخير ولا تنسوني من صالح دعائكم.

برنامج للتخسيس الصحي