سمنة الأطفال!

أنا شخص كبير وعاقل كمان بما يكفي لدرجة خلتني أدرك تماماً خطورة الوضع اللي فيه جسمي، وإن السمنة فعلاً سبب كبير في الأمراض، بالإضافة إني فعلاً مش حابب شكلي في الهدوم ومش راضي عن نفسي خالص، ورغم الإدراك وقوة الدوافع إلا أني مش بلتزم ومش بخس!!

فهل طبيعي نسأل، لو سمحت يا دكتور عايزة نظام لابني أو لبنتي 10 سنين عشان يخسوا؟؟

هو الطفل عنده دافع إيه يخليه يلتزم يوم واحد بالرجيم أو حتى وجبة واحدة، هو ميعرفش يعني ايه شكل جسم وحش ومش مدرك انها مرض وممكن تأذيه.

فالطبيعي أننا نحط الطفل في بيئة تساعده يخس، مش نظام صارم فطار وغدا وعشاء احنا علي يقين أنه هيتقطع في نفس اليوم بالليل عشان الواد بيعيط ومش عايز الرجيم.

البيئة دي تكون عاملة ازاي؟

إن الطفل يخس وابوه وأمه وأخواته الأكبر منه تخان، ده المستحيل الخامس بعد الأربع مستحيلات، فأول شرط تكون البيئة المحيطة بالطفل فيها أفراد في نفس الخط وفي طريق التخلص من السمنة ويكونوا في الحالة دي قدوة ليه ودافع يخليه يكمل.

الطفل مينفعش معاه المنع، مش هينفع يبقى متعاقد مع السوبر ماركت على توريد جميع انواع الحلويات صباحاً ومساء، واجي في لحظة أقول أمنع كل ده، والله ما هيلتزم، وهيصعب عليكي وهتاكليه منها اكتر من الأول، فالمطلوب منك تسحبي منه الحاجات ” المضرة ” دي واحدة واحدة وفي الحالة دي هيخس برضو، يعني لو بياكل حاجة حلوة ب 5 جنيه في اليوم، لو حاولتي معاه يشتري ب 2.5 بس في اليوم التحول ده في حد ذاته مهم ويساعد جدا، لحين التخلص من أي شئ مضر تمامآ.

ده بخصوص الحاجات اللي من الشارع..

اما بخصوص اكل البيت أو اللي بياخده في المدرسة فده ملعبك بقى، انتي اللي بايدك بتقلي السمك بدل ما تشويه، وانتي اللي بتحطي طبق رز كبير قدامه ومش مهم سلطة، على اساس ان الرز غذا وصحة بقى والسلطة دي أي كلام فاضي، فالاكل لو كانت طريقة تحضيره صحية، هتساعدي ابنك يخس، لو قللتي في الكميات على اد ما تقدري هيخس طبعاً، خلاص بقى ابدأي حببيه في السلطة والخضار وكلوا معاه منها، يعني عايزه تدخلي عليه بكل ما لذ وطاب بكميات كبيرة وترجعي تشتكي.

مش معقول يعني أنا اللي بطبخ له كل يومين تلاته حلة محشي، ولا بمناسبة ومن غير مناسبة أعمل صنية الحلويات الشقية، واقعد جمبه لحد ما يخلص الأكل ده عشان يكبر، وازعل في الآخر انه تخين.

تبعتيه المدرسة بخمس ارغفة فينو، طب ما تعوديه يبقى معاه خضار أو فاكهة مع اتنين فينو بس ، أو رغيف بلدي هيشبعه بسعرات كمان أقل من الفينو، عوديه يشبع من الأكل الصحي اللي سعراته قليله.

بدل ما يشرب بيبسي بخمسة جنيه، يتخنه ويضعف مناعته وعضمه، اشتري بالخمسة جنيه دي برتقال واعملي ليه عصير طبيعي، أو أي عصير تاني بيحبه هيبقى احسن من وجع القلب ده.

الخلاصة..

من كل 100 ألف شخص كبير عاقل، عدد محدود جدا بيتلزم بالنظام الغذائي، يتعدوا على الايد الواحدة، وبيخسوا..

فمتضحكيش على نفسك ان لو معاكي ورقة مكتوب فيها تلات وجبات ابنك هيمشي عليها!! معقول، كان أولى الكبار خسوا بقى.

ابنك هيخس أو هيتخن بسببك مش بدكتور ولا بنظام غذائي.

دمتم بخير 🌹
#دايت_كلينيك
#دكتور_أحمد_منصور

عن د/ أحمد منصور

15 تعليق

  1. مرحبا كلام حضرتك مضبوط جدااا ولكن انا اطفالي اكلهم صحي وفي البيت ورغم ذلك اعاني من عدم نزول الوزن واتابع مع اخصائي تغذية ولايوجد نفع 🥺🥺🥺🥺

  2. شكرا يا دكتور على الموضوع ده
    بس مشكلتي مع ابني الشيبسي مش عارفه اعمل معاه ايه
    وسؤال التاني القهوه الخضراء ايه فوائدها واعملها ازاي علما بأني كنت 98 كيلو ووصلت ل 90 كيلو في شهرين بفضل حضرتك

  3. ام زكريا السروجي

    شكرا كتير يادكتور كلام روعه ولله كتر الله خيرك 👍👍👍👍

  4. كلام جميل

  5. غير معروف

    كلام حضرتك مظبوط فعلا بس حاجه ولاد تسمع الكلام داه

  6. غير معروف

    شكرا علي المعلومات القيمه

  7. كلامك صح…دكتور أكثر من رائع
    ربي يوفقك😊

  8. غير معروف

    مرحبا دکتور بدی اسالک بنتی عمرها 3سنین ونص ووزنها 22کیلو ورغم انهَـ (⊙﹏⊙) ــاآ ما بتاکل کتیر یادوب اشی بسیط وبتشرب حلیب مرتین بلیوم شو اعمل معاها بلیییز جاوبنی

  9. دكتور انا بنتي عشر سنين وزنها 45 والطول 135

  10. غير معروف

    يا ريت الدكتور تنزل لنا اكل الصحي للاطفال

  11. عندك حق في كل كلمه يادكتور ربنا يجازيك كل خير علي نصايحك القيمه لينا

  12. كلام رااائع مظبوط ….بس بسال ممكن نحاول ننزل للأطفال وزنهم عبر الرياضه اضافه للأكل الصحي

  13. ابني عملتله دايت ومشي فعلا عليه وخس لكن رجع بقي عنده كرش تاني المشكله اني دايما بشجعه اني انا وهو نخس واكلي صحي بس هو بيجي علي بليل يشوف اخواته طلعوا اي حاجه من التلاجه ياكلوا بيكون جعان وبياكل علي الرغم اني بمنع الكل ياكل اي حاجه قصاده انا وهو بس اللي وزننا بيزيد باقي البيد اقل من الوزن الطبيعي كمان 😂 بيصعب عليا وفي نفس الوقت مش عارفه اظبط معاه هو واخواته

  14. غير معروف

    انا بنتى نفس الموضوع وبظبط اكلها على اد مقدر ومع ذلك مبتخسش…هل لو فيه تحاليل اقدر اعملها لبنتى

  15. غير معروف

    من فضلك يادكتور تكلمنا باستفاضة عن موضوع رجيم الاطفال وتقولنا على تحاليل نعملها لو الاطفال دول مبياكلوش كتير ووزنهم زايد..وشكرا لحضرتك

اترك تعليقاً

لن يتم نشر عنوان بريدك الإلكتروني.