طريقة عمل جبنة قريش كريمي
جبنة قريش للرجيم

طرق مختلفة لتحضير الجبنة القريش للرجيم

مساء الخير على كل متابعين دايت كلينيك الغاليين، أهلاً بيكم في موضوع جديد، في قسم أكلات دايت، النهاردة هنتكلم عن الجبنة القريش، وبصراحة يعني مينفعش رجيم وتخسيس من غير جبنة قريش، لما بنتكلم عن الجبنة دي، فإحنا بنتكلم عن بروتين مناسب جداً للفطار أو الغداء والعشاء كمان، بنتكلم عن فوائد صحية عظيمة.

عدد السعرات الحرارية في الجبنة القريش منخفضة جداً، كل ربع كيلو جرام من الجبنة القريش يحتوي على 163 سعر حراري، وعلى البروتين بنسبة 28 جرام، والدهون بنسبة 2.3 جرام، والكربوهيدرات بنسبة 6.1 جرام.

أهم فائدة للجبنة القريش في الرجيم، أنها بتعزز الشعور بالإمتلاء والشبع، وتساعد من التخلص من الجوع الشديد بين الوجبات الرئيسية في الرجيم، وبتساعد في نمو العضلات (ودي حاجة محتاج ليها أي حد بيخس) علشان طبعاً يخس من غير ترهلات، ويكون راضي عن شكل جسمه بعد التغيير وفقدان الوزن الزائد والوصول للمثالي.

طرق مختلفة لتحضير الجبنة القريش

الطريقة التقليدية، إني أجيب قطعة أو اثنين وآكلها صعبة شوية، ومش مقبولة ليا، علشان كده هنشوف بعض الطرق البسيطة جداً لتحضيرها، هتفرق في الطعم النهائي وتخليها مقبولة ونقدر نضيفها يومياً في نظامنا الغذائي.

أول طريقة اللي صورتها تحت دي، بتهرسي قطعة واحدة من الجبنة القريش معاها معلقة زيت زيتون، وشطة “حسب الرغبة”، وبعد كده بتضيفي الخضار اللي بيكون (قرن فلفل رومي وثمرة طماطم، وقرن فلفل حامي)، الطبق ده مع بيضة مسلوقة أو 3 معالق فول في الفطار صحي جداً ويشبعك جداً جداً.

الطريقة الثانية

جبنة قريش كريمي، هنعمل الطبق اللي شايفين صورته ده بقطعة جبنة قريش، ومعاه 2 بيضة مسلوقة في وجبة الغداء، بروتين صحي بديل للحمة والفراخ ومنخفض السعر.

نضرب في الخلاط المكونات الآتية:- (قطعة جبنة قريش، 2 فلفل أخضر، كوباية زبادي، ملح، شطة، كمون).

الطريقة الثالثة

هنا هناخد فائدة الجبنة القريش مع حبة البركة، والطريقة بكل بساطة إننا هنهرس قطعة جبنة قريش مع الخضروات مثل (ثمرة طماطم وثمرة خيار)، ونضيف ليهم كمان زيت الزيتون ومعلقة أو اثنين من حبة البركة.