لو زهقت من أكلها .. “جبنة قريش تحابيش”

الجبنة القريش لا غنى عنها في رجيم دايت كلينيك، ويفضل عدم البحث عن بدائل، لإنها بالنسبة لسعراتها الحرارية، وفوائدها العظيمة جداً لازم اليوم ميعديش من غيرها.

لكن اللي بيحصل إن من كتر ما بناكل منها ممكن نزهق شوية، وأنا كنت إشتريت من سوبر ماركت جبنة قريش قبل كده والراجل قاللي تاخدها عادية ولا تحابيش .. وأنا عجبني التحابيش بصراحة فقولت أقولكم على طريقتها، وإن شاء الله تأكلوا منها من غير زهق علشان فعلاً طعمها حلو.

 

إحنا مثلاً عندنا في الفطار قطعتين جبنة قريش ..

هنضيف عليهم الآتي:-

قرن فلفل أحمر حار .. هنضيف منه على الطبق اللي نقدر عليه مش شرط كل القرن يعني.

فلفل أخضر حلو

فلفل أحمر حلو

كمون

حبة البركة

وممكن كمان زيت زيتون

 

 

هنهرس في البداية – في طبق ” الجبنة ” ونضيف عليها نقطة زيت زيتون، ونقلب كويس ، ونضيف بعد كده حبة البركة والكمون،  ” وطبعاً كلنا عارفين فوائد حبة البركة الجميلة جداً.

بقى عندنا الجبنة ومعاها الكمون وحبة البركة نضيف بعد كده عليهم الفلفل المتقطع بالأنواع التلاته ونقلب كويس.

 

طريقة بسيطة وصحية جداً للناس اللي زهقوا من الجبنة القريش.

عن د/ أحمد منصور