رجيم مجرب للمرضعات
رجيم للمرضعات مجرب للدكتور أحمد منصور

رجيم للمرضعات مجرب مع الدكتور أحمد منصور

أثناء فترة الحمل طبيعي يزيد وزنك، وأقصد بطبيعي إن ده شئ بيحصل لأي واحدة هتمر بالمرحلة دي، ودي حاجة متزعلش طبعاً، لأنك في المقابل، بيكون عندك نونو جميل، مش خسارة فيه شوية الكيلوهات اللي هتزيديهم دول.

ممكن الزيادة دي توصل لعشرة كيلو وأكثر متمثلة في:-

  • وزن الجنين نفسه حوالي 3 كيلو.
  • وزن المشيمة 1.5 كيلو.
  • وزن أنسجة الثدي حوالي 1.5 كيلو.
  • وزن السائل الأمنيوسي 1 كيلو.
  • وزن الدم تقريباً 2 كيلو.
  • وزن الرحم بعد الزيادة، ممكن يصل لـ 2 كيلو وأكثر.

وأخيراً الدهون الموجودة بالجسم، بتزيد وممكن يوصل وزنها لحوالي 4 كيلو جرام.

نقدر بكل سهولة بمشيئة الله، نتخلص من الوزن الزيادة ده بشكل تدريجي، برجيم صحي، من غير ما يأثر أي تأثير سلبي على صحة الرضيع، والأساس إن الموضوع مينفعش معاه إستعجال طبعاً، وأي معدل نزول لازم يكون مرضي ليكي ويفرحك، كفاية إنك بتكوني على الطريق الصحيح بمعنى الكلمة، نزول الوزن بدون تأثير على صحة طفلك.

مهم تبدأي رجيم المرضع فقط في حالة إن الطفل يكون تم على الأقل أربع أو خمس شهور، ويكون بدأ يعتمد في تغذيته على الأكل بجانب الرضاعة.

نصائح قبل البدء في رجيم للمرضعات مجرب

الحرص على شرب الماء بكثرة على مدار اليوم.

التركيز على بعض الأطعمة المهمة ليكي ولصحة طفلك، زي الزبادي واللبن “الحليب”، والبروتين مثل الدجاج واللحوم، وطبعاً الخضروات والفاكهة بشكل يومي والحبوب الكاملة التي تحتوي على الكاربوهيدرات المعقدة بطيئة الهضم، وهتساعدك على الشعور بالشبع لفترة طويلة.

لا أنصح بإتباع نظام الصيام المتقطع خلال فترة الرضاعة، ونقسم وجباتنا على مدار اليوم، ولازم تعرفي إن النوم مهم جداً، على أد ما تقدري تنامي وقت ما ينام، ويكون في وقت مبكر، لأن تعبك وإرهاقك بسبب قلة النوم، ممكن يكون سبب في بطئ نزول وزنك أو ثباته بسبب إفراز هرمون التوتر.

بأي حال من الأحوال، منقللش الحليب اللي هتشربيه في اليوم عن (2 كـــوب)، ويفضل يكونوا في الوجبات الخفيفة.

نبدأ يومنا بكوب حليب معاه 3 تمرات أو محلى بمعلقة عسل أبيض، وممكن عادي تكون كوباية مياه معاها 3 تمرات أو ندوب فيها معلقة عسل أبيض.

الاختيارات المتاحة لوجبة الفطار على مدار الأسبوع

أساسي مع وجبة الفطار طبق يكون فيه أي نوع خضار موجود عندنا في البيت، زي الطماطم والخيار وهكذا، يعني لو الفطار بيض وعيش مثلاً، يكون معانا طبق فيه وليكن ثمرة طماطم مع ثمرة خيار.

  • ربع رغيف عيش بلدي + 2 بيضة مسلوقة
  • ربع غيف عيش بلدي + 2 قطعة جبنة قريش
  • ربع رغيف عيش بلدي + 150 جرام جبنة بيضاء لايت تقريباً “ثمن كيلو جرام”
  • ربع رغيف عيش بلدي + 5 معالق فول
  • ربع رغيف عيش بلدي + 2 علبة زبادي
  • 3 معالق شوفان + كوب حليب
  • 3 معالق كورن فلكس + كوب حليب
  • 3 معالق قمح بليلة + كوب حليب

نقدر نبدل ربع رغيف عيش بلدي، بواحد توست بني، أو نصف رغيف عيش سن.

الاختيارات المتاحة في الوجبة الخفيفة الأولى 

  • كوب حليب + ثمرة فاكهة (تفاح، موز، كيوي، جوافة، كمثرى، وممكم أي نوع فاكهة تاني بنحبه زي الرمان أو العنب).
  • 2 ثمرة فاكهة
  • ثمرة بطاطا مشوية
  • نصف كوب ترمس
  • نصف كوز ذرة مشوي

 

الاختيارات المتاحة لوجبة الغداء خلال الأسبوع

  • نصف كيلو سمك مشوي
  • علبة تونة بدون زيت
  • نصف فرخة مشوية أو مسلوقة
  • 2 بيضة مسلوقة أو مقلية بزيت زيتون
  • ربع كيلو كفتة مشوية
  • ربع كيلو لحمة مسلوقة
  • ربع أرنب مشوي أو مسلوق
  • ربع كيلو كبدة مشوية أو مسلوقة
  • ربع كيلو جمبري مشوي أو مسلوق

+ 6 معالق أرز أو 8 معالق مكرونة أو نصف رغيف عيش بلدي.

+ طبق سلطة أساسي معانا في كل وجبة غداء من الخضار الموجود عندنا في البيت، طماطم، خيار، جزر، جرجير، بقدونس، فلفل، ..

+ طبق خضار يتم تحضيره بطريقة صحية من أحد الخيارات الآتية:-

  • بامية
  • ملوخية
  • كوسة
  • فاصوليا خضراء
  • بروكلي

 

الوجبة الخفيفة الثانية على مدار الأسبوع

كوب حليب أساسي، معاه هناخد 6 حبات لوز ولو مش متوفر هناخد 10 حبات فول سوداني، ولو مش متوفر يكفي الوجبة الخفيفة الثانية بين الغداء والعشاء تكون كوب حليب فقط.

 

الاختيارات المتاحة لوجبة العشاء خلال الأسبوع

  • علبة تونة
  • 2 بيضة مسلوقة
  • 2 علبة زبادي
  • كوب لبن رائب
  • قطعة جبنة قريش + بيضة مسلوقة

طبيعي دلوقتي تحسي إن النظام مليان أكل، لازم في الفترة دي تتغذي كوبس جداً، علشان ده هينعكس على صحة طفلك، لازم تبقي شبعانة على مدار اليوم، بخيارات صحية وسعرات مناسبة تساعدك تخسي مع رجيم بدون حرمان من الأكل المفضل.

إن شاء الله نجدد نظام المرضعات تاني قريب في أسرع وقت بفضل الله ثم دعمكم وتشجعيكم لينا على الإستمرار، فلو شايفة إننا نستحق دعمك، إشتركي دلوقتي في قناتنا على اليوتيوب، القناة إسمها “دكتور أحمد منصور”.