رجيم دكتور أحمد منصور ” جديد ” يبدأ من 23 فبراير ينتهي 1 مارس

مكمل معاكم في التحديات، والحمد لله ما زلنا بنشوف نتائج مبهرة أقوى وأقوى، وده الطبيعي إن بفضل الله أي حد يلتزم يلاقي نتيجة رائعة، مش محتاج منكم أكتر من تلات أيام إلتزام حرفي، وهتلاقوا نفسكم في اليوم الرابع مش قادرين تأكلوا أي أكل كتير أصلاً.

فكرة تطبيق دايت كلينيك علشان اللي لسه متابع معانا جديد، وبيتوه ومش فاهم فكرة التطبيق.

الموضوع ببساطة إن كل يوم جمعة بيكون في نظام غذائي، بيستمر لمدة أسبوع وبعد كده بيتجدد، ولو حضرتك حملتي التطبيق مثلاً من يوم الإثنين يعني من نص الرجيم، إبدأي معانا من يوم الثلاثاء عادي جداً.

الرجيم صحي جداً، لكن لمن لا يعاني من أي مرض لأني مش هقدر أعمل رجيم (((عام))) لأي مريض سكر أو ضغط، لأن المرض بيتفاوت من مريض لآخر فبالتالي ياريت أي حد عايز يخس وعنده مشكلة صحية، بعرض الرجيم على طبيبه المعالج، أولاً قبل البدء في الرجيم، حفاظاً على صحتك.

هكتب ليكم رجيم لوزن من 90 كيلو فيما فوق .. 

رجيم من 60 إلى 90 كيلو .. 

الأطفال هعمل ليهم موضوع مستقل قبل ما أنام وأبعته ليكم بإذن الله .. 

والناس اللي أقل من 60 كيلو وعايزين يخسوا .. هكتمشوا على نفس نظام من 60 إلى 90 كيلو، لكن تحاولوا تمشوا يومياً ساعة .. لكن مهم جداً جداً تكون ساعة بدون توقف سواء مشي في المكان في البيت أو على مشاية في الجيم، أو في تراك نادي، المهم أثناء المشي متريحيش ولو لثانية واحدة.

المرضعات هتمشي على النظام بناء على وزنك، وبحرص شديد إن يومك ميعديش من غير 2 كوب حليب على الأقل، وكمان كوباية عصير والسناك يكون فيه مكسرات ( 3 حبات من أي نوع )، ويفضل لو مرضعة تبدأي رجيم من وقت ما يكون عمر الطفل 4 شهور ..

لو أقل من 4 شهور نصيحتي ليكي بس من غير رجيم .. إنك تقللي كمية الأرز أو العيش أو المكرونة في الغداء فقط لحد ما البيبي يتم شهور وبعدكده إعملي معانا التحديات

بالنسبة للناس اللي حرقها ضعيــــف .. 

إحنا قولنا الأسبوع اللي فات نصوم قبل النوم بأربع ساعات .. الأسبوع ده هنصوم 5 ساعات يعني لو أنتي عارفه إنك هتنامي الساعة 12 .. توقفي أكل الساعة 7 مساءً دي أكتر حاجة هتعلي الحرق صدقوني.

هتوقفي أكل لكن هيكون مسموح ليكي .. تشربي المياه والقهوة والشاي وأي مشروب أعشاب، لكن بدون سكر.

النظام مسموح فيه بمعلقة سكر واحدة أو إثنين على الأكثر بغض النظر عن معلقة العسل الأبيض أو الأسود الأساسية على الريق.

بعض النصائح لرفع الحرق أيضاً .. 

• شرب القهوة السادة والشاي الأخضر من المشروبات القوية جداً لحرق الدهون.
• خليط الشاي الأخضر والمرمرية مشروب ممتاز أيضاً لرفع الحرق .. 
• القرفة 
• الزنجبيل 

بالإضافة إلى أهم وسيلة تحرقي بيها دهون جسمك المتراكمة بقالها سنين في جسمك وهي إنك تصومي يومياً من بعد آخر وجبة لحد النوم 5 ساعات .. 

رجيم وزن فوق 90 كيلو 

مش هفكركم بقى كل شوية إن أهم حاجة الصبح كوباية مياه دافئة أو عادية معاها معلقة عسل أبيض سواء دايبة فيها، أو لواحدها بالمعلقة .. وممكن كمان معلقة عسل أسود هتفيد أكتر اللي عندهم أنيميا  .. وفي تلات أيام خلال الأسبوع تقدري تستبدلي المعلقة بتاعة الصبح بتلات تمرات.

الفطار على مدار الـ 7 أيام 

يمكنك الإختيار من بين:-

• كوب حليب خالي الدسم + 4 معالق كورن فلكس
• كوب حليب خالي الدسم + 4 معالق شوفان
• 2 بيضة مسلوقة + ثمرة فلفل أخضر أو خيار + ربع رغيف عيش
• 4 معالق فول + ثمرة طماطم + ربع رغيف عيش
• جبنة قريش أو أي جبنة خالية الدسم بوزن 100 جرام تقريباً + ثمرة خيار + ربع رغيف عيش

سناك بعد الفطار على مدار الـ 7 

ثمرة فاكهة + كوب حليب مش شرط مع بعض ..

ممكن تاخدي الفاكهة بعد الفطار بشوية وبعد كده كوباية الحليب

كوب حليب يكون خالي الدسم أو نصف كوب كامل الدسم ..

الغداء على مدار الـ 6 أيام

يمكنك الإختيار من بين:-

• ربع أو نصف فرخة مشوية أو مسلوقة حسب شعورك بالجوع وإمكانياتك المادية  ولو تعرفي بالكمية دي تعملي شاورما فراخ دايت أو فاهيتا أو كفتة فراخ.
• لحمة مسلوقة أو مشوية بوزن لا يتعدى350 جرام ( ويمكن تحضير الكمية بأي طريقة دايت ).
• علبة تونة بدون زيت
• 250 جرام جبنة قريش أو أي نوع جبنة خالية الدسم
• 2 بيضة مسلوقة أو مقلية بمعلقة زيت صغيرة
• 300 جرام كفتة مشوية (دايت)
• مشروم
• سمك مشوي بوزن لا يتعدى نصف كيلو
• حمام مشوي بوزن لا يتعدى 400 جرام
• كبدة مشوية أو محضرة بأي طريقة (دايت) بوزن لا يتعدى 350 جرام
• أرانب مشوية أو مسلوقة بوزن لا يتعدى 350 جرام
• جمبري مشوي أو يتم تحضيره بأي طريقة (دايت) بوزن لا يتعدى350 جرام

مع وجبة الغداء .. طبق سلطة وطبق خضار مطبوخ دايت مطبوخ دايت مطبوخ دايت .. زي السبانخ أو الكوسة أو العدس أو البروكلي أو البامية أو الفاصوليا .. 

مع وجبة الغداء هناخد .. نصف رغيف عيش أو 3 معالق أرز أو مكرونة فيما عدا اليوم الأول اللي هو السبت ويوم الخميس مش هيكون فيهم في وجبة الغداء أرز أو عيش أو مكرونة.

سناك بعد الغداء خلال الـ 7 أيام 

ثمرة فاكهة

وجبة العشاء خلال الـ 7 أيام 

كوب زبادي + ثمرة خيار

أو

كوب زبادي معصور عليها ليمونة

أو

جبنة قريش يوزن 100 جرام + ثمرة فلفل أخضر أو خيار

رجيم وزن بين 60 : 90 كيلو 

على الريق طبعاً عارفين هنعمل إيه

الفطار خلال السبع أيام يمكنك الإختيار من بين:- 

• 4 بسكوت سادة + كوب حليب خالي الدسم
• كوب حليب خالي الدسم + 4 معالق كورن فلكس
• كوب حليب خالي الدسم + 4 معالق شوفان
• 2 بيضة مسلوقة + ثمرة فلفل أخضر أو خيار + ربع رغيف عيش
• 4 معالق فول + ثمرة طماطم + ربع رغيف عيش
• جبنة قريش أو أي جبنة خالية الدسم بوزن 100 جرام تقريباً + ثمرة خيار + ربع رغيف عيش

بين الفطار والغداء خلال السبع أيام 

ثمرة فاكهة أو كوب حليب أو كوب عصير طماطم

وجبة الغداء خلال أول 6 أيام

يمكنك الإختيار من بين:-

• ربع فرخة مشوية أو مسلوقة ولو تعرفي بالكمية دي تعملي شاورما فراخ دايت أو فاهيتا أو كفتة فراخ.

• لحمة مسلوقة أو مشوية بوزن لا يتعدى 300 جرام ( ويمكن تحضير الكمية بأي طريقة دايت ).
• علبة تونة بدون زيت
• 250 جرام حبنة قريش أو أي نوع جبنة خالية الدسم
• 2 بيضة مسلوقة أو مقلية بمعلقة زيت صغيرة
• 300 جرام كفتة مشوية (دايت)
• مشروم
• سمك مشوي بوزن لا يتعدى نصف كيلو
• حمام مشوي بوزن لا يتعدى 400 جرام
• كبدة مشوية أو محضرة بأي طريقة (دايت) بوزن لا يتعدى 250 جرام
• أرانب مشوية أو مسلوقة بوزن لا يتعدى 250 جرام
• جمبري مشوي أو يتم تحضيره بأي طريقة (دايت) بوزن لا يتعدى 300 جرام

مع وجبة الغداء طبق سلطة + طبق خضار مطبوخ ((( دايت ))) 

الأسبوع ده لوزن بين 60 حتى 90 كيلو جرام مش مسموح بتناول الأرز أو العيش أو المكرونة في وجبة الغداء .. 

أنا آسف أني بقولكم خبر زي ده لكن هيفرق معاكم جداً جداً الأمر لو عرفتوا تلتزموا بكده .. ربنا يعينكم

واللي حاسس إن عدم وجود النشويات ممكن يكون السبب في وجبة الغداء هيخليه ميكملش الرجيم عشان الموضوع صعب .. يختار يومين أو تلاته بالكتير في الأسبوع يكون في وجبة الغداء 3 معالق أرز أو مكرونة أو ربع رغيف عيش.

لكن الأفضل جداً نستحمل ويكون العيش في الفطار بس الأسبوع ده عشان نلاقي نتائج جميلة تفرحنا كلنا.

بين الغداء والعشاء خلال الـ 7 أيام 

ثمرة فاكهة أو كوب حليب

وجبة العشاء

يمكنك الإختيار من بين

كوب حليب خالي الدسم

أو

كوب زبادي

أو

ثمرة فاكهة

اليوم السابع فري .. إضغطي ( هنا ) عشان تشوفي نظام اليوم الفري.

تنبيهات 

مهم جداً المياه أكتر من إتنين لتر يومياً ..

بتحسي بالجوع على مدار اليوم .. كلي خيار أو خس وقت شعورك بالجوع ..

الصيام قبل النوم بـ 5 ساعات هيفرق معانا جداً جداً ..

الإلتزام حرفياً هينزلك حوالي 3 كيلو في الأسبوع وكل ما تقصري المعدل هيقل وممكن تقصيرك يوصلك إنك متنزليش أصلاً طول الأسبوع ..

ممكن ناكل فشار مرة في الأسبوع وكذلك الترمس ..

ممكن يوم برضو أو إتنين نعمل حمص الشام ونشرب كوباية ..

الدورة الشهرية بتثبت الوزن وبتزوده كمان حوالي 2 كيلو جرام وعند بعض السيدات بتوصل لـ 5 كيلو كمان .. وبينزلوا تاني فور إنتهائها

لذلك أرجو بشدة لو ده وقت الدورة الشهرية بلاش ميزان عشان متحبطيش .. أتوزني قبلها أو بعدها لكن طول ما هي موجوده بلاش ميزان

مهم جداً تعرفوا ان نزول كيلو واحد فقط أسبوعيا .. أمر يدعوا لفرحة شديدة .. حقيقي ده معدل ممتاز جداً وصحي ومعناه إنك هتحققي وزنك المثالي في وقت قريب كمان فبلاش لما نشوف إننا نزلنا كيلو واحد يكون سبب كرهنا للرجيم أو يأسنا من المواصلة.

مطلوب منكم 3 حاجات دلوقتي .. 

1- تقرأو الموضوع مرة كمان بتركير

2- كل اللي قرر يبدأ معانا بكل قوة وبدون إستسلام يكتب كومنت فيه الإسم والوزن ويقول قبلت التحدي 

3- دعوة حلوة بقى ..