شكشوكة الباذنجان والبيض
طريقة عمل شكشوكة الباذنحان

الرجيم لا يحتاج للمال.. طريقة عمل وجبة غداء صحية وإقتصادية بالبيض والباذنجان

بشوف تعليقات كتيرة من بعض المتابعين، عن إن الرجيم محتاج فلوس كتير، علشان نقدر نلتزم بيه، وده تفكير طبعاً خاطئ جداً، وطول ما تفكيرك كده، عمرك ما هتحقق هدفك بالوصول للوزن المثالي، مش معقول هنقدر نجيب كل يوم لحمة وسمك وفراخ، في خيارات تانية إقتصادية وفي نفس الوقت كجودة وسعرات مناسبة لينا جداً في الدايت زي وصفة اليوم.

رجيم صحي

وصفة البيض والباذنجان صحية ونقدر نعملها في الغداء من باب التنويع، وكمان سعرها مناسب، كيلو الباذنجان حالياً بخمسة جنيه وموجود كمان في بعض الأماكن الكيلو ونصف بخمسة جنيه، وطبعاً البيض الـ 8 بعشرة جنيه، يعني الأكلة مش هتكلفنا حاجة.

المقادير المطلوبة

طريقة عمل شكشوكة الباذنجان والبيض
طريقة عمل شكشوكة الباذنجان والبيض

 

  1. حبة باذنجان متوسطة الحجم
  2. 2 بيضة
  3. فلفل أخضر رومي
  4. 2 حبة طماطم
  5. 2 فص ثوم
  6. ملح
  7. فلفل
  8. كمون
  9. بهارات
  10. زيت زيتون (2 معلقة كبيرة)

 

خطوات التحضير

أول حاجة نقطع الباذنجان “مكعبات”، بعد تقشيره، ونقطع كمان الفلفل والطماطم “مكعبات”.

في طاسة على النار، نسخن الزيت، بعد كده نضع مكعبات الباذنجان يتحمر شوية، ثم نضع الثوم ونقلب كويس، وبعده نضع الفلفل والطماطم، ونضع التوابل، ونقلب كويس، ونسيبها تتسبك شوية، ونضع الملح.

في بولة، نضع البيض، ونضربه كويس، وبعدين نضيفه للباذنجان في الطاسة، ونقلب ونتركه إلى أن يستوي البيض.

بالهنا، الوصفة دي مش محتاجة معاها، غير لو نصف أو ربع رغيف عيش مكتوبين في النظام، خدنا منها خضار “ألياف” من الباذنجان، نشويات (العيش)، دهون صحية (زيت الزيتون)، البروتين (البيض)، دمتم بخير ولا تنسونا من صالح دعائكم.