الرئيسية / أنظمة غذائية / رجيم عيد الفطر – نظام غذائي للثلاث أيام

رجيم عيد الفطر – نظام غذائي للثلاث أيام

كل عام وأنتم جميعاً بخير، عيد سعيد إن شاء الله على كل متابعين موقع وتطبيق دايت كلينيك، ومع إقتراب العيد، فأكيد أنا معاكم علشان أقدم لكم خطة ونظام الثلاث أيام في العيد، والطريقة المثالية للتعامل معاهم بحيث ميكونش في أي تأثير سلبي يعيق نزولنا في الوزن

يناء على التصويت اللي نزل في جروب دايت كلينيك مع دكتور أحمد منصور، فأنتم إخترتوا إن الفري يكون اليوم الأول والثاني في العيد والثالث هيكون رجيم

طبعاً نظامنا بعد العيد هيختلف تماماً، وأوعدكم هيرضيكم جداً وزي ما اتفقنا هيكون في رجيم للمبتدئين وكمان نظام المتابعة هيختلف عن الموجود حالياً.

خلونا نتكلم عن نظام تالت يوم العيد اللي طبيعي هنكون زهقنا من الأكل ومش قادرين ناكل فيه علشان الجرائم اللي إرتكبناها في حق صحتنا أول يومين.

فطار اليوم الثالث

  • 2 ثمرة فاكهة
  • 2 بيضة مسلوقة + ثمرة خيار
  • 125 جرام جبنة خالية الدسم ويفضل الجبنة القريش

 

سناك 1

كوب حليب خالي الدسم

 

غداء اليوم الثالث

يمكنك الإختيار من بين:-

  • ربع فرخة مشوية أو مسلوقة
  • نصف كيلو سمك مشوي
  • ربع كيلو لحمة مشوية أو مسلوقة
  • ربع كيلو كفتة مشوية
  • 2 بيضة مسلوقة
  • ربع كيلو جبنة قريش

 

+ طبق سلطة + طبق خضار ( بامية – كوسة – أو سبانخ )

 

سناك 2

ثمرة فاكهة

 

عشاء اليوم الثالث

  • كوب حليب خالي الدسم
  • أو كوب زبادي خالي الدسم
  • كوب لبن رائب

 

بالنسبة لليوم الأول والثاني، مش عايزين نكون بنضحك على نفسنا، ونكتب حاجات متلتزموش بيها، فإحنا من الآخر هنعتبر اليومين دول إجازة من الرجيم.

ومن بعدها نرجع بقوة نكسر الدنيا ..

واللي عايز أقوله ليكم إن لغبطة اليوم والثاني مفيدة للجميع، مش بس نفسياً لكن كمان بالنسبة للناس اللي عندهم ثبات في الوزن، اللغبطة هتخليهم من بعد العيد يقدروا على رجيمنا بفضل الله يرجعوا ينزلوا بمعدلات سريعة.

 

اليوم الأول والثاني هيكون بدون سناك .. لا بين الفطار والغداء ولا بين الغداء والعشاء.

 

العشاء في اليوم الأول والثاني حاجة من إثنين ( كوب زبادي لايت أو كوب لبن رائب ).

 

الغداء في اليوم الأول .. مفتوح 

مفتوح بطريقة غير معتادة .. يعني من الآخر عايزكم تأكلوا فيه كأنكم عاملين رجيم للتخلص من النحافة، براحتكم خالص سواء في النوع أو الكمية .. مفيش أي قيود ولا شروط، سيبي نفسك للمحشي والمكرونة البشاميل، واللحوم أياً كانت طريقة الطهي.

 

الغداء في اليوم الثاني .. مفتوح 

مفتوح في النوع مش في كمية الأكل، بمعنى إنك تأكلي من أي أكل في البيت، أو من بره ( بيتزا – كريب .. وغيره ) ولكن مطلوب جداً تقومي وأنتي بطنك مش مقفولة، يعني يدوب تأكلي الكمية اللي تشبعك، مش تأفوري، وتبقي مش قادرة تقومي من على الأكل. في اليوم الأول لو هتاكلي 10 صوابع محشي .. يبقى اليوم الثاني كفاية 6 .. لو اليوم الأول هتاكلي 2 خرطة مكرونة بشاميل يبقى اليوم الثاني كفاية قطعة، لو اليوم الأول 3 قطع لحمة مقلية ، يبقى اليوم الثاني كفاية إتنين.

وهكذا .. المهم اليوم الأول الأكل في الغداء بدون قيود واليوم الثاني ناخد بالنا شوية.

 

الفطار اليوم الأول

3 تمرات أو معلقة عسل أبيض مع كوب حليب خالي الدسم

أو

2 ثمرة فاكهة

 

الفطار اليوم الثاني

3 تمرات أو معلقة عسل أبيض مع كوب حليب خالي الدسم

أو

2 ثمرة فاكهة

 

 

الحلويات 

اللي هقوله بخصوص الحلويات ينطبق على نظام الأول والثاني ..

 

 

لو هتاكلي .. كنافة أو جلاش أو كريم كراميل أو أي حاجة غير الكحك والبسكوت والذي منه .. فهتاخدي، قطعة أد كف إيدك مش أد نصفها زي ما بنقول كل مرة.

 

ومسموح خلال اليوم الأول والثاني ..

بـ 50 جرام فول سوداني أو 100 جرام ترمس

 

 

إنما لو هتاكلي من الكحك والبسكوت وما شابه .. فإليك التفاصيل

4 قطع كحك لو بالملبن أو العجمية

أو

3 قطع كحك بالملبن أو العجمية ولكن مضاف ليه مكسرات

( هو حد معاه فلوس يشتري كحك بالمكسرات 😂🤔 ).

أو

10 قطع بيتي فور

أو

10 قطع بسكوت

أو

8 قطع غريبة

 

طب لو حبينا نشكل ما بين الأنواع دي، هنعمل إيه ؟ 

هقولكم

2 بسكوت + 2 بيتي فور + 1 كحك + 1 غريبة

أو

2 كحك + 4 بسكوت

 

 

مننساش في وسط الزحمة دي المياه، فياريت برضو نظل حريصين على شرب أكثر من 8 أكواب مياه يومياً.

العصير .. لينا كوباية في اليوم الأول وكوباية في اليوم الثاني.

لو هتشتري آيس كريم وأنتي بره مع الأولاد، تبقي عاملة حسابك مفيش ترمس ولا فول سوداني في اليوم ده.

النظام واضح إنه نظام تسمين، وأنا عايزكم تتبسطوا وتعيشوا العيد زي أي وقت عيشتوه فيه قبل الرجيم، لإنك كده كده هتخسي، طول ما أنتي معانا بإذن الله، لكن مهم متنكديش على نفسك وعليا، وتقومي إن شاء الله وازنة نفسك مثلاً اليوم الثالث الصبح .. طبعاً شئ لا يقبله عقل بشر ولا بني آدمين.

 

فياريت نعيش اليومين الجايين بفرحة، وبما إن الأكل والحلويات جزء أساسي من إحتفالنا وفرحتنا بعيد الفطر، فإحنا هنعيشه وخاصة اليوم الأول، زينا زي أتخن تخين في العيلة 😂.

 

 

لو هتصومي الـ 6 أيام من شوال

اليوم الثاني فطارك .. فري.

اليوم الثالث فطارك .. هو المكتوب في وجبة الغداء في نظام اليوم الثالث.

 

 

بعد العيد لينا كلام تاني يا أبطال 

 

دمتم بخير .. ولا تنسوني من صالح دعائكم .

 

 

.

عن د/ أحمد منصور

91 تعليق

  1. يا دكتور بجد مش عارفه التزم مش عارفه والله يئست من نفسي بجد يئست

    • د/ أحمد منصور

      إيه المشكلة اللي مخلياكي مش عارفه تلتزمي ؟؟؟

      • انا الحمد لله التزمت ولخبطت شوية في رمضان كنت قبل رمضان ٨٠ كيلو وطولي 161 وسني 28سنة انهاردة انا 73.5 ❤✋😊 aya

        • ي دكتور انا بخس من قبل رمضان كنت ٩٣ وبقيت ٨٦ انا بقلل اكل وشويه مشي ورياضه بس مش بمشي ع نظام ابداااا واليومين دول لخبطت 😢نفسي اتبع نظام مع حضرتك بس مش بلتزم بيه مش بلخبط وقتها بس مش بتقيد بيه ياريت الرد

      • غير معروف

        ارادتي راحت كل شويه اعمل و اخس و بعدين ارجع تاني
        نفسيتي تبقي وحشه اروح واكله زي الايام دي اكل اكل اكل لحد ما كرهت نفسي خلاص
        و اجي التزم مع حضرتك والله يبوظ معرفش ازاي

      • ليه مافيش دايت بيعمل حساب النباتيين؟

        • ولا كأننا موجودين😓

          • لو سمحت يا دكتور انا اول مره ادخل علي جروب حضرتك ونفسي عمل رحيم انا بقالي سنين بعمل واتخن واخس مشكلتي عدم الاراده ونفسيتي تعبت جدااااا من الوزن القوي اعمل ايه يادكتور

      • غير معروف

        اني جديده دكتور واريد التزم وياكم ب دايت كلينك

      • انا وزني ٩٥ وطولي ١٧٥ وعمري ٣٠ واريد اضعف

      • غير معروف

        د/ أحمد ممكن عنوان العياده

      • لسلام عليكم دكتور اني زينب من العراق وزني كان ٧٥ وسويت رجيم يعني اني ضليت اهتم بأكلي وقطعت لكولا ولحلويات وضليت اعمل كل اكلي بدون دهون واكل اكل صحي واشرب ماء كثير ولمده اسبوعين نزلت ٤ كيلو بس هسه صار ١٠ ايام ملخبطه اكلي ما اعرف اليش واتمنى ارجع التزم لا يزيد وزني اني طولي ١٥٨

      • وٌآلَلَهّ.. حًآجّهّ کْلَ سِنِهّ وٌآنِتٌ طِيَبً وٌبًخِيَر وٌسِعٌآدٍةّ وٌصّحًةّ وٌسِلَآمًةّ وٌرضآ آلَرحًمًنِ… تٌآنِيَ حًآجّهّ… جّزٍآکْ آلَلَهّ خِيَر آلَجّزٍآء وٌتٌقُبًلَ آلَلَهّ آعٌمًآلَکْمً بًآحًسِنِ آلَقُبًوٌلَ…… وٌزٍنِيَ کْآنِ ١١٢و طولي ١٦٥ و السن ٣٩… اصبحت ٩٠كيلو.. و لسه هكمل ان شاءالله لحد ما اوصل الوزن المثالي ان شاءالله

    • مريم مريم

      الله عليك يااستاذ

    • بجد أسلوب حضرتك ينفتح النفس ويشجع ع الرجيم وانا اصلا باخد بالى من وزنى بس حضرتك لما قريت نظامك وطريقتك فيها تشجيع حتى عشان مكسلش بتدينى بووووش …بس هو اللى فاطر آخر يوم رمضان يعمل ايه🤔😂

    • كل سنة وحضرتك طيب ويخير وعيد سعيد

  2. غير معروف

    كل عام وانت بالف الف خير

  3. انا نزلت 13 كيلو ولسه هااكمل .المبدأ الارادة القوية في التغيير واهم حاجة تملى وقت فراغك عشان ماتفكر في الاكل وتخلي الثلاجة فاضية عشان حتى لو جعت متلقاش حاجة تاكلها الا الخضار والفواكة بس

  4. غير معروف

    👍👍

  5. غير معروف

    دكتور انا١٠٣وسنى ٣٠تابعت مع حضرتك ف رمضان ونزلت من ١١١ل١٠٣بس نفسي انزل اكتر

  6. السلام عليكم ورحمة الله وبركاته الله يتقبل منا صيامنا وقيامنا وصالح اعمالنا ازيك يا دكتور وعيد سعيد عليك وكل عام وانت بألف خير انا حابه ابشرك يادكتور اني سعيده جدا للي وصلت له بفضل الله ثم ليك كنت ٩٩.٩ ودلوقتي ٧٧كيلو يعني فرحانه بجد بس في مشكله اني ماأقدر اكل كثير مثل اول فاياريت يكون نظام اليومين خفيف جدا والله يجزاك خير 🤲🤲🤲

  7. غير معروف

    ياريت يادكتور نظام الى هيصوم ست من شوال

  8. انا في بداية شهر رمضان ١٠٠.٤٠٠ وحاليا٩٦ والحمد لله واشكر جهود الدكتور احمد

  9. غير معروف

    فين نظام اليوم الأول والتانى

  10. انا نزلت من 83 ل 79.5 فرمضان ومكنتش ملتزمه اوى وبادئه من تاني اسبوع بس الموضوع عجبنى وهكمل المشكله اني خايفه الخبط وصيام كان حاكمنى وايه نظام الصيام في ال ٦ ايام بتوع شوال الصيام فيهم هيبقي ازاى افطر على ايه و السحور بالانظمه العاديه

  11. دكتور هو الترمس بياثر علي الوزن

  12. تمام
    كل انظمة حضرتك مفيدة وترضينا جدا كل سنة وحضرتك بالف خير

  13. ام نادر من تونس

    انا سوف ابدا معكم بعد رمضان والله المستعان وزني زايد وعاملة عملية على الديسك حرمه روحي وزني ثابت ان شاء معكم اجدنتيجة شكرا

  14. عيد مبارك عليك يارب يوفقك ويخليك لينا جميل جدا النظام

  15. انا فشلت اخس في رمضان وزدت وجالي اكتئاب بسبب ده بس لسه عندي امل امشي مع حضرتك ومستنيه رجيم المبتدئين يارب يقويني واخس نفسي اخس ٣٠ كيلو

  16. ريم الجزائرية

    دكتور أنا كان وزني 108وفي 12 يوم من الايام الأخيرة لرمضان صار وزني 103 انا أول مرة أعمل دايت و اتبعت كل نصائح الي بتقدمها شكرا لك دكتور

  17. عبدالرحمن

    يا دكتور انا طالب ثانوية عامة هل النظام ينفع ولو لا اي هو النظام الامثل مع العلم ان نص يومي بيكون في المدرسة

  18. انا ماشية على النظام من الأسبوع الثالث والرابع بجد ولكن نزلت كيلوا واحد هل كده فى مشكله

  19. مروه المسيري

    والرنجه يا دكتور بليز ☺️
    العيد مش كحك وبيتفور بس

  20. شكرا على مجهوداتك يا دكتور والله مغلبينك معنا كل سنة وحضرتك بخير وصحة وسعادة وهناء ونجاح يارب

  21. سيدرا الروح

    تم بأذن الله

  22. غير معروف

    والله انت دكتور عسل 😂
    كل سنه وانت طيب

  23. غير معروف

    دكتور ينفع ابدل الايام يعني يبقى اليوم الثالث هو الفري بدل الأول و الأول بدل الثاني و الثاني دايت 😌
    عشان خاطري رد

  24. غير معروف

    ربنا يعطيك الصحة والعافية

  25. مروه المسيري

    أحلى حاجه ف النظام كله أخر سطر🤣🤣🤣

    بعد العيد لينا كلام تاني 😂😂😂😂

  26. كل عام وانت بخير يا دكتور
    انا بقالي ١٠ ايام موزنتش بس انا حاسه اني خسيت شويه وحاسه بفرق بمقاسات الملابس وحاسه نفسي احسن من اول
    انشالله بعد العيد حنلتزم ونخس كمان مع حضرتك
    مشكوووور اوي

  27. دكتور انا جسمي مع رجيم تعب صار مش مشدود ومقبله ع زواج نهاية السنه اعمل ايه خسرت وزني ٢٦ كيلو
    باقي لي ١٠ كيلو كمان ارجو الرد

  28. غير معروف

    شكراليك يادكتور وعيدسعيدعليك

  29. انا عندى 37 وطولى 166 عندى بيبي عندها سنة وبرضع وزني ثابت من يوم الولادة 92 ومش بينزل خالص بلتزم طوووول النهار وبالليل ممكن اتعشى تاخر برغيف كامل بشرب ماية كتير مش بعرف اتعشى زبادي بس وخصوصا فى الصيام احيانا باكل قطعة حلو بس مش كتير اعمل اية لكسر ثبات الوزن دة

  30. د. رشا الشيخ

    كل سنة وحضرتك طيب وبخير

  31. يادكتور الحرق عندي بطيئ جدا بقالي اربع شهور في دايت وزني مابينزلش غير كيلو في الشهر والكيلو ده بينزل بعد البريود بكام يوم وغير كده بفضل ثابته طول الشهر كان وزني 76
    دلوقتي 69 ومش راضي ينزل اعمل ايه هتجنن

  32. غير معروف

    لوسمحت يادكتور الفطارفى اول وتانى يوم دايت ومافيش سناك طيب حناكل البيتفوروالحاجات دى امته معلهش ممكن رد

  33. نجلاء العبادي

    السللم عليكم دكتور
    أريد ريجيم للمبتدئين إذا أمكن

  34. شكرا يا دكتور…لو سمحت يا دكتور أنا عندي نقص صفائح دموية قليل عن الطبيعي…وانا 56سنة…
    أمشي علي الرجيم عادي…وياريت تقولي اعمل إيه…
    كل سنة وحضرتك طيب وبخير يارب

  35. سارة محمود

    ربنا يسهل إن شاء الله نظام حلو
    كل عام وانتم بخير

  36. فاديا البيطار

    كل عام وحضرتك واسرة دايت كلينيك بألف خير وصحة

  37. السلام عليكم..
    يادكتورنا العزيز دلوقتي انا كنت ماشيه مظبوط قبل رمضان و لكن حصل اني اتشغلت جداااا و عكيييت الدنيااا جدااا جدااا كان عندي امتحانات و ما ادراك ما الامتحانات🤣💔و لسه مخلصتش “أزهر بقي و كده”🤷🏻‍♀️بمتحن من شهر ٤ والعيشه مره🙄💔😂و لسه هخلص يوم ١٧..موعدش حضرتك اني اقدر التزم بحاجه قبل يوم ١٧ لاني مش بكون فاضيه اجهز حاجه لنفسي ف باكل عادي م الاكل اللي معمول ف البيت..المهم عشان مطولش علي حضرتك..انا بشتغل اصلا كابتن في جيم😅 “مدربه يعني”😂كنت قبل الشغل ١٠٧ كيلو..مع التمرين و تظبيط اكلي إلي حداً ما علي مدار سنه و شويه مع العلم اني كنت بلغبط اوقات كتير بس وصلت ل ٨١ كيلو و كان شكل الجسم مظبوط بالنسبالي جداااا فاضل فيه شويه حاجات بسيطه يعني لو كنت وصلت مثلاً ٧٥ او ٧٠ كان هيبقي تمام التمام😭😭بس حصل اني عملت حادث بسيط و رجلي اتفتحت و اتمنعت لمده شهرين و زياده من الحركه تماماً..المهم اني زدت كتير ع الميزان بعد الفتره دي ما انتهت و قدر الله و ما شاء فعل..يمكن وصلت حاجه و ٩٠ المهم رجعت الشغل تاني بس رجوع التمرين زي الاول كان صعب جدااا عشان الاصابه اللي ف رجلي و الحماس مبقاش زي الأول..مع العلم اني بعد ما بقلظت من تاني شاء القدر اني اتخطب و انا مبقلظة😭😭💔💔و كانت المأساه والله..المهم بقي إن فرحي شهر ٨ اللي جاي ده..و لسه هرجع الشغل بعد الامتحانات..يعني التمرين مش هيبدأ غير بعد ما اخلص.. قبل رمضان ما يبدأ كنت ٨٩..معرفش ف الوقت الحالي بقيت كام بس مزدتش تقريبا زي ما انا او ممكن كيلو زياده..عايزة انزل ١٥ او ٢٠ كيلو ف خلال الشهرين و ف نفس الوقت شكل وشي قدر الامكان ميتغيرش لانه هيختفي شويه كده🤣المشكله اللي بتواجهني ف الارداف بتنزل بس بصعوبه شويتين بيكون الجزء اللي فوق اتشفط🤷🏻‍♀️🙄😂طولت علي حضرتك و صدعتك بس ياريت ياريت ترد عليا بليييييز..مش عايزة ابقي مبقلظة ف فرحيييييي كفايه الخطوبه💔💔😅🤷🏻‍♀️ساعدني

  38. دُمت بسعاده… وربنا يرضيك ويجبر بخاطرك مش عشان الاكل المفتوح لأ… عشان حضرتك بتراعي النفسيه وفرحه العيد اصلا حسيناها ف كلامك.. شكرًا.. إنك إنسان قبل ما تكون علينا دكتور..😍
    انا خسيت لمجرد ماقريت الكلام ☺️ والطاقه الايجابيه…. وفعلا بعد العيد لينا كلام تاني كل عام وكل حبايبك بخير

  39. ان شاءالله حلتزم بالنظام ده وحبدأ بعد العيد معاكم لساتني جديده

  40. كل سنه وانت طيب يادكتور وشكرا ليك على مجهودك معانا انابدأت من شهر رمضان وكنت 83كيلو ودلوقتى بفضل الله وبفضلك انا بقيت 77كيلو وانشاء الله مكمله معاكم

  41. بجد انا ماشوفتش زاي البرنامج دا ولا دكتور زايك دمك خفيف ولذيذ طريقتك تفتح النفس نعمل رجيم طول حياتنا ربنا يجزيك خير وكل سنه وانت طيب يا احلي دكتور

  42. الف شكر ليك يا دكتور انا نزلت ف شهر رمضان من ٧٠ ل ٦٥ مع انى ف الايام الاخيرة كنت بلخبط بس مش كتير بس الحمد لله انا كدة مبسوطة جدا وان شاء الله هلتزم بعد العيد مع حضرتك عشان اوصل للمثالى وعلى فكرة انا كان وزنى قبل كدة ٨١ ولما تابعت مع حضرتك قبل رمضان بشهر ونص كنت ٧٥ يعنى نزلت على نظام دايت كلينك ١٠ كيلو ف شهرين ونص

  43. شكرا يادكتور بس فين 😢 الشبسى ويريت تكتب موعيد 🕥الاكل ومت نوقف 🙅اكل فى ايام الفرى علشان انامش عرفه وكل سنه وانت طيبه🔊🔊

  44. غير معروف

    طبعا انااول مره اكتب تعليق .بس فعلااناكان لازم اكتبه عشان اشكر الدكتور واقولك رينا يباركلك بجد ويجعله في ميزان حسناتك اللي بتعمله معانا مبدئيااناابتديت معاك بالظبط من شهر 1ولحد يومنا هذا انابفضل الله ثم بفضلك انا نزلت 23كيلو رمضان بس انانازله فيه5كيلو برغم اني عكيت كتيييير جدا وكمان متمرنتش فيه رياضه الاقليل جدا برضو بس انشاءالله مكمله لحد مااوصل لحدماانزل عالاقل 10كيلو كمان وكل سنه وحضرتك طيب ويارب يكون عيدسعيد عليك وعلي الامه الاسلاميه جميعا 😍😍

  45. كل سنه وحضرتك طيب عيد سعيد❤

  46. ام اهداء

    كل عام وانت بخير ينعاد عليك بالصحة والعافية والله ما قصرت معانا

  47. دِګتّوِر بِحٌأّجِهِ لَدِعٌمَګ وِشٍجِيِّعٌګ أّنِأّ وِزِّنِيِّ 100ؤؤطّوِلَيِّ 172 وِعٌمَدِيِّ أّلَمَنِطّقِهِ أّلَمَتّوَِّسطّهِ مَلَيِّأّنِهِ ګتّيِّر عٌمَلَتّ ګتّيِّر رجِيِّمَ وِدِخَلَتّ نِأّدِيِّ ريِّأّضّيِّ ګنِتّ أّنِحٌفِّ فِّتّرهِ وِأّرجِعٌ أّنِصٌحٌ بِزِّيِّأّدِهِ وِګتّبِتّلَګ أّبِلَ مَرهِ بِدِيِّ أّنِحٌفِّ لَ أّشٍعٌر بِأّنِوِثّتّيِّ أّګثّر مَأّعٌمَ أّنِبََِّّسطّ بِأّلَبَِّس رجِعٌتّ أّلَبَِّس أّګتّر بِ ثّلَأّثّ مَرأّتّ مَنِ مَقِأَّّسيِّ أّتّعٌبِتّ بِدِيِّ دِعٌمَګ وِتّشٍجِيِّعٌګ دِګتّوِر نِزِّلَتّ ګتّيِّر بِرأّمَجِ بِګلَ لَلَلَغٌأّتّ وِګنِتّ أّحٌذّفِّ مَأّأّبِمَشٍيِّ وِلَأّ عٌ أّيِّ بِرأّمَجِ
    تَّّسأّعٌدِنِيِّ دِګتّوِر ګوِنِ مَمَنِوِنِهِ أّنِأّ مَهِأّ مَنِ أّلَأّردِنِ

  48. جزاك الله كل خير يا دكتور…كل عيد وحضرتك طيب

  49. غير معروف

    دكتور انا وزني ٧٤ وطولي ١٦٨ كم بدي لوصل للجسم المثالي

  50. انا وزني بقى ثابت فيه شهر رمضان

  51. الضوء الساطع الساطع

    كل سنة وانتم طيبين جميعا وينعاد عليكم بالصحة والسلامة
    انا ما قدرت التزم في رمضان عشان عندي فقر دم لو التزمت كان مرضت لذلك خديت رمضان اكل بالمعقول والحمد لله لانه كمان وقفة كتير ومشي كتير في رمضان من حاجة لحاجة
    بس بإذن الله انا عندي قوة ارادة للتغير من نفسي وراح التزم معاكو لا يأس مع الحياة ولا حياة مع اليأس
    وبارك الله فيك دكتور وعلى مجهوداتك الحلوة والرجيمات الحلوة

  52. شو يعني كاسة لبن زبادي او كاسة لبن رائب
    التنين متل بعض انا بعرف شو الفرق ؟
    لبن زبادي يعني اللبن متلما هو مناكلو أكل
    و الرائب هو العيران مو هيك ؟

  53. سمسمه .قبلت التحدى الله المستعان .

    اقسم بالله انت دكتور ممتاز فوق الوصف ربنا يبارك في حضرتك مجرد قراءه النظام بس فرحت فمابالك بالتنفيذ 😅😅😅

  54. سلام عليكم ورحمة اللة وبركاته كل سنة وحضرتك طيبة وبخير بصراحة يادكتور احمد انا لخبطت في رمضان بس الحمد لله نزلت٣كيلو والحمد لله كنت باكل الي نفسي فية بس كنت بحس اني بشبع بسرعة ومش عاوزة اكل حاجة تاني

  55. غير معروف

    انا اول مره اعمل دايت وان شاء الله التزام
    الوزن 78
    الطول 156
    السن25
    كل سنه وحضرتك طيب يا دكتور

  56. كل سنة وحضرتك طيب وبخير يارب العالمين

  57. غير معروف

    دكتور نور كل عام وانت بخير احب ابشرك وإني كان 103 كيلو وبقي 94 كيلو رجيم رمضان والحمد لله
    هاستقبل العيد بشكل جديد والحمد لله
    انا مبسوووووطه اوووواوووي
    كل سنه وانتم طيبين ومبسوطين والدهون مفتتين ومدمرين😂😂😃😃😃😊

    • غير معروف

      اكتب دكتور نور غلطه من الكيبورد باعتذر يا دكتور احمد منصور

  58. نفسی ف حاجه تزود الحرق 😢
    مع العلم کنت عامله دایت وبلعب ریاضه وبنزل ببطئ شدید جداااااا

  59. غير معروف

    ماقادري التزم بنظام العيد😪

  60. دكتور انا من سوريا وحابة التزم معك

  61. غير معروف

    السلام عليكم و رحمة الله و بركاته لو سمحتو وين بلاقي الاشعارات يلي بتوصل عن ثبات الوزن و نقص فيتامين b12 يلي وصلن اليوم لما بفتح الاشعار بيدخل على التطبيق و ما بيفتح على الموضوع لجديد 🤔🤔

  62. السلام عليكم يا دكتور احمد بنوتي عندها حساسيه البان وانا برضع طبيعي فمانعه اكل كتير جدا ومانعه انواع فاكهه كتير هي بتتعب منها وانا عاوزه نظام مناسب مياثرش عليها بس ميكونش فيه فول لان البقوليات بتتعبلي القولون ربنا يبارك فيك

  63. نزلت بثلاثة كيلوو كنت 88والان 85 الحمد لله مكمل بااذن الله بعد رمضان

  64. السلام علیکم دکتور اولا ربنا یبارک فیک علی المجهود والوقت لکل الاعضاء ثانیا انا مجبره انو تکون وجبه الغدا من ٤٫٥ الی ٥ هل دا یثاثر علی نزول الوزن وکمان انا کنت خسیت ٧کیلو الشهرین اللی قبل رمضان بس بسشهر رمضان وزنی ثابت بس مش علی نظام دایت کلینک ابدا حایلا مع المبتدئین ولا اکمل مع المجموعات القدیمه ارجو الرد رجاءا ولک جزیییل الشکر

  65. السلام عليكم انا جديدة معاكم فى دايت كلينك ولكن عاملة دايت مع نفسى من ٤ شهور ونزلت الحمد لله من ١٠٧ ك ل ٧٣ ك … لكن لاحظت ان نزولى بقى بطيء … ياترى تنصحونى بأى نوع من الدايت؟.. مع العلم انى جربت اكتر من طريقة دايت .. لو كارب كيتو .. والنباتى .. وتدوير السعرات

  66. دكتور انا عندي مشكله مع الاننيا
    وكنت قبل رمضان 72 كيلو ومش كنت ماشيه على نظام دايت ولا اى حاجه بس مكنتش باكل طبيعي
    وانا عندي تعب في المعده دايما ومش بشرب سوايل سخنه
    ووزني دلوقتي 65 ونفسي اخس تاني من غير ما وشي يخس
    وطولى 161

اترك تعليقاً

لن يتم نشر عنوان بريدك الإلكتروني.