نظام غذائي أسبوعي لإنقاص الوزن بدون آثار جانبية
جدول أكل جديد مع دايت كلينيك لمدة أسبوع

نظام غذائي أسبوعي بسيط لإنقاص الوزن بطريقة صحية

مساء السعادة على كل متابعينا الكرام، أتمنى تكونوا بخير دائماً، كعادتنا كل أسبوع، يتجدد لقائي معكم بنظامين مختلفين، الأول نظام عادي مناسب لوزن أعلى من 90 كيلو، أما الرجيم الآخر فيكون بنظام الصيام المتقطع، وده مناسب في حالة إن وزنك أقل من 90 كيلو، واللي حضرتك بتقرأه دلوقتي مناسب ليك في حالة إن وزنك أعلى من 90 كيلو.

أتمنى تكونوا ملتزمين الفترة اللي فاتت بدون لغبطة، ولو أنت جديد معانا، ياريت تبدأ على طول متستناش كتير، معانا بمشيئة الله هتحقق نجاح كبير من أول أسبوع، هتلاقي فرق في كل حاجة، وأهمها منظورك للأكل وللرجيم، مش عايز أتكلم كتير في النقطة دي، أنا عايزك تجربها بنفسك، وتحكم بنفسك من غير كلامي أو كلام حد تاني.

جرب الرجيم أسبوع واحد وشوف الفرق، إلتزم بكل قوتك، وتابع صحتك شوف في هبوط ولا لأ مع إلتزامك بكل بنود الرجيم وأهمها طبق السلطة وشرب المياه، بعد الأسبوع هتلاقي نفسك مكمل معانا بدون أي معاناة بفضل الله، بإنجازات هتشوفها أولاً بعينك، ومن كل اللي هيشوفك.

نظام غذائي أسبوعي بسيط

ساعد نفسك قبل ما تبدأ في الرجيم، سهل الموضوع على نفسك وخليه بسيط، مش هينفع بأي حال من الأحوال تبدأ رجيم، من غير ما توفر عندك اللي هيساعدك تنجح في الرجيم، وهنا بتكلم عن الأكل مش عن ( الدواء والأعشاب ).

رقم واحد وأول حاجة تساعدك تنهي يومك بدون لغبطة هي شرب المياه على مدار اليوم، حد أدنى 8 أكواب، النقطة اللي متقلش أهمية عن شرب المياه هي السكر لينا في اليوم ( 2 معلقة فقط ).

ساعد نفسك ووفر الخضار ( أصناف كتير ) تساعدك في تحضير طبق السلطة، اللي مينفعش يعدي يوم من غيرها (طماطم، خيار، جزر، خس، .. ) وكمان باقي الأصناف اللي تقدري تطبخي بيها طبق خضار صحي مناسب للرجيم والأهم أنه مشبع زي الملوخية والكوسة والبامية والبروكلي وخضار نشوي زي البطاطس.

مينفعش رجيم من غير حليب “لبن” وزبادي كمان، والجبنة القريش كمان علشان الفطار أو العشاء، وطبعاً البيض سواء فطار أو عشاء وساعات في الغداء بنحتاجه.

 

جدول أكل الرجيم الجديد

 

هنقسم الأكل على مدار اليوم، ثلاث وجبات رئيسية مع اتنين وجبة خفيفة، هنوقف أكل قبل النوم بمدة من ساعتين إلى 3 ساعات، نشرب مياه كتير، لو قدرنا نمشي شوية لو نص ساعة يبقى كويس، وكمان التعرض للشمس للحصول على فيتامين دال، شئ لطيف جداً وهيفرق معانا.

مش عايزين نخس بس، عايزين نخس بصحتنا، بشكل جسمنا يكون حلو، وإحنا بنآكل كل شئ ومش محرومين من كل حاجة، علشان نقدر نثبت وزننا ونتعامل بعد الوصول للوزن المثالي بكل سهولة وبدون ذرة معاناة.

رجيمنا الأسبوع الحالي أسهل منه مش هتلاقي أبداً أبداً، مفيش ليك أي حجة أو عذر علشان متلتزمش، رجيم لمدة 7 أيام بدون يوم فري، لإننا مش هنبقى محتاجين يوم فري أصلاً، الأسبوع كله دلع.

 

نظام اليوم الأول 

يوم السبت 10 أكتوبر

 

الفطار

بيضة واحدة مسلوقة + قطعة جبنة قريش أو 2 معلقة كبيرة جبنة بيضاء لايت + نصف رغيف عيش بلدي + ثمرة طماطم + جرجير + ثمرة خيار + ثمرة فلفل أخضر.

 

سناك 1 

الوجبة الخفيفة الأولى

بعد وجبة الفطار بحوالي ساعتين تقريباً أو ساعتين ونصف

 

كوب حليب + ثمرة موز

 

الغداء

 

علبة تونة بدون زيت + ربع رغيف عيش بلدي + طبق سلطة كبير

أو

350 جرام ” ثلث كيلو سمك مشوي” + 3 معالق أرز + طبق سلطة كبير

أو

4 معالق مكرونة + 200 جرام لحمة مسلوقة أو مفرومة ومطبوخة دايت + طبق كوسة صغير

أو

كشري عدس + بيض + سلطة، الوجبة بالتحديد عبارة عن ( 6 معالق من كشري العدس + بيضة واحدة مسلوقة + طبق سلطة كبير ).

أو

3 معالق أرز + 2 بيضة مسلوقة + طبق سلطة كبير

 

سناك 2 

الوجبة الخفيفة الثانية

 

فاكهة “ثمرتين”

ممكن 2 تفاحة أو 2 تين أو 2 برقوق أو 2 جوافة أو 2 برتقال

 

العشاء 

 

كوب حليب خالي الدسم أو نصف كوب حليب كامل الدسم

معاه معلقة شوفان

ولو عندنا لوز ناخد 3 حبات “لوز ني”.

 

جدول الأكل من يوم الأحد حتى يوم الجمعة

زي ما قولنا، نظام الأسبوع الحالي هيكون بسيط جداً، لدرجة إننا بكل تأكيد مش هنحتاج يوم فري في نهاية الأسبوع، وزي برضو ما إحنا متعودين، إننا بنحاول ننوع في النظام والجداول تقريباً من أسبوع لأسبوع، الأمر اللي يضمن لك معدل نزول مرضي ليكي، وفي نفس الوقت صحي، بدون أي آثار جانبية سلبية.

 

هكتب لكم دلوقتي بعض الإختيارات للوجبات الرئيسية (الفطار، الغداء، والعشاء)، والوجبات الخفيفة (سناكس)، ونختار اللي نحبه أو اللي متوفر عندنا في كل وجبة.

 

النظام من يوم الأحد 11 أكتوبر حتى الجمعة 16 أكتوبر

الفطار

يمكنك الإختيار من بين:-

  • علبة تونة بدون زيت + ربع رغيف عيش بلدي + فلفل أخضر مع طماطم وخيار
  • 1 توست بني + 2 علبة زبادي
  • نصف رغيف عيش سن + 2 علبة زبادي
  • 2 بيضة مسلوقة + ربع رغيف عيش بلدي + خس وخيار وثمرة طماطم
  • بيضة مسلوقة + 60 جرام جبنة بيضاء لايت + ربع رغيف عيش بلدي + خيار أو خس
  • 5 معالق فول + ربع رغيف عيش بلدي + ثمرة طماطم + خيار أو خس
  • 3 معالق شوفان + كوب حليب + رشة قرفة مع 3 تمرات
  • 3 ثمرات فاكهة للي بيحبوا ياخدوا فاكهة فقط في الفطار ممكن ثمرة جوافة مع ثمرة برتقال مع ثمرة موز
  • علبتين زبادي مع ثمرة فاكهة
  • 3 معالق قمح بليلة + كوب حليب + معلقة نشا بتخليها متماسكة للي بيحبوا يأكلوها بالشكل ده
  • 6 قطع بسكوت سادة + كوب حليب
  • 2 قطعة جبنة قريش + ربع رغيف عيش بلدي + خيار أو خس

 

سناك (1)

الوجبة الخفيفة الأولى

 

كوب حليب خالي الدسم

أو

نصف كوب حليب كامل الدسم

أو

6 حبات لوز ني

 

الغداء من يوم الأحد حتى يوم الجمعة

يمكنك الإختيار من بين:-

  • نصف فرخة مشوية أو مسلوقة وممكن نحضر الفراخ بأي طريقة صحية نفس الكمية بطرق كتير حلوة ومناسبة للرجيم زي فاهيتا فراخ أو شاورما أو شيش طاووق
  • 200 جرام كبدة مشوية أو محضرة بأي طريقة دايت
  • ربع أرنب مشوي أو مسلوق
  • نصف كيلو سمك مشوي
  • 200 جرام لحمة مسلوقة أو مشوية أو مفرومة (محضرة دايت)
  • علبة سردين بدون زيت
  • سلمون (ربع كيلو) 250 جرام
  • علبة تونة بدون زيت
  • كوب فاصوليا بيضاء
  • طبق مشروم دايت
  • 2 بيضة مسلوقة
  • طبق عدس دايت
  • ربع كيلو جمبري مسلوق أو مشوي

 

+ 3 معالق أرز أو 4 معالق مكرونة أو  ربع رغيف عيش بلدي

نشويات طول الأسبوع، والموضوع مش مقلق أبداً، هنآكل براحتنا وهنخس بإذن الله، إطمئنوا يا أبطال.

 

+ طبق سلطة

أو

طبق خضار محضر بطريقة صحية من أحد الخيارات الآتية:-

  • سبانخ
  • ملوخية
  • بامية
  • كوسة
  • فاصوليا خضراء
  • قرنبيط

 

 

سناك (2) 

الوجبة الخفيفة الثانية

 

كوب حليب خالي الدسم

أو

نصف كوب حليب كامل الدسم

 

 

العشاء

ثابت خلال الفترة من الأحد حتى الجمعة

هنختار من:-

  • بيضة مسلوقة + خيار أو خس
  • علبة زبادي + خيار أو خس
  • كوب لبن رائب

 

وبكده يكون إنتهى نظام الأسبوع.

طبقوا الرجيم وإلتزموا بكل قوتكم على قد ما تقدروا، وكل ما هتلتزموا بالمكتوب كل ما هتشوفوا معدلات نزول جميلة بإذن الله.

دمتم بخير ولا تنسوني من صالح دعائكم.

برنامج للتخسيس الصحي