نفسي أخس ووشي يفضل زي ما هو !!

إيه ده مالك؟ تعبانه ولا إيه؟؟ الجملة اللي بتعقد أي حد عامل رجيم لما يسمعها، وبيكون شايل همها وممكن يسيب الرجيم بسببها، ومن هنا بتيجي عشرات الأسئلة يومياً يا دكتور وشي يا دكتور، وشي بيخس وشكلي مش حلو زي الأول، بعد إذنك عايزة حاجة تخليني أخس من غير ما وشي يتأثر.

يا ريت نركز في السطور الجاية علشان هنلاقي الحل فيها على على كل اللي بيدور في بالنا بإذن الله ..

 

 

هو ينفع أخس فعلاً من جسمي ويفضل وشي زي ما هو؟ من غير ما يخس؟ 

الإجابة بكل بساطة تقدري توصلي ليها لما تبحثي عن أي صور لحد خس قبل وبعد، مستحيل حد ينزل 10 أو 20 كيلو دهون ويفضل الوش بنفس الحجم بتاع بداية الرجيم.

 

شوفوا صور الممثلين أو أي حد مش شرط مشهور، لازم الوش ينزل، سواء رجيم صحي أو غير صحي، الوش ملوش علاقة كده كده هينزل ..

 

طب أعمل إيه؟ 
مش هعمل رجيم بقى طالما وشي هيخس ويبقى وحش !!

 

طب أصبري بس .. أنتي بتتلككي يا مدام ؟

هو مين اللي قال إن الوش الرفيع وحش ؟
في وش رفيع وجميل وزي الفل ووش تاني رفيع لكن مش حلو ومش نضر وباهت.

 

متظلميش رجيم دايت كلينيك إنه خلى وشك مش حلو، آه وشك هيخس لكن تقدري تخليه أحلى من الأول، والحل في إيدك وياما بقوله دايماً.

 

في نفس الوقت اللي بتطلبي وبتسعي فيه تنزلي 4 و 5 كيلو في الأسبوع، زعلانه إن وشك باهت وأصفر وبدأ يترهل ، إزاي عايزة جسمك يفقد وزن كبير في وقت قليل، والنتيجة تكون إن وشك يفضل منور وجميل.

 

إزاي مصرة تقولي مش بحب شرب المياه وبشرب 4 كوبايات في اليوم بالعافية، وفي نفس الوقت بتشتكي إن وشك بتختفي منه نضارته.

 

إزاي بيعدي أسبوع وإتنين رجيم، وتبقي كلتي فيهم طبقين سلطة، مش 14 طبق سلطة، وتشتكي إن الناس بتقول وشك بقى زي وش الناس المريضة.

 

تهملي الفاكهة خاصة الغنية بفيتامين سي

بين الوجبات وتهملي تعليمات كتير بقولها ظناّ منك إن تقليلك للأكل هو الصح وإنه هيخسسك أسرع، والنتيجة إنك بتفقدي وزنك بسرعة لكن بتفقدي معاه جمال بشرتك.

 

 

 

مفيش دكتور مفيش رجيم يقدر يحافظ لك على إنك وشك ميخسش مع نزولك في الوزن، لكن في رجيم صحي، وتعليمات لازم تتبعيها هتخليكي تحافظي على نضارة بشرتك وتخسي من جسمك كله ومعاه وشك، ولكن لا تفقدي ذرة من جمالك.

 

بالإضافة للحرص على شرب الماء بالكميات المطلوبة، والفاكهة والخضار، الرياضة مهمة جداً وهتنور وشك مهما كان رفيع، زي ما بنشوف لاعبين الكورة والمشاهير رجال وسيدات، بنلاقي أوزانهم تحت الـ 70 والوش طبعاً رفيع، لكن الرياضة بتفرق معاهم.

 

طبعاً هتقولي طب دول ناس معاهم فلوس، وعارفين يروحوا جيم وعندهم تراك يجروا فيه، براحتهم، إنما أنا ساكنة في منطقة لو نزلت أجري فيها هيقولوا عليا إتجنيت رسمي.

 

هقولك ببساطة، إمشي في البيت لو نص ساعة في اليوم أو إجري في المكان، أي حاجة تنشطي بيها جسمك، هتفرق معاكي وهيكون ليها إنعكاس إيجابي جداً على بشرتك.

 

 

حاجة كمان لو تحافظي عليها هتفرق معاكي وهي الشاي الأخضر ..

الشاي الأخض مضاد أكسدة قوي جداً علشان كده تأثيره مباشر وجميل على البشرة وبيأخر ظهور التجاعيد، حرصك على شرب كوبايتين في اليوم كحد أدنى، على المدى البعيد هتلاقيه فرق معاكي.

 

وطبعاً مفيش مانع من إستخدام مستحضرات تجميل فعالة للوجه، بجانب التعليمات اللي فوق دي

في مشوار الرجيم، بحيث نوصل لهدفنا الجميل بدون أي شئ يعكر صفونا، أو يخلينا نسمع كلام من ناس تحبطنا وترجعنا خطوة لورا.

 

 

 

عن د/ أحمد منصور

25 تعليق

  1. عبير الشام

    بس في البدايه بيبان الوجه تعبان اما بس يصير اكلنا صحي بالعكس الوجه بيصير اجمل
    عن تجربتي
    كتير سمعت تعليقات بالبدايه وطنشت قلت جسمي اهم والوجه بالمكياج بيمشي حالو😂

  2. فاديا البيطار

    والله يادكتور انا ضعفت وضعف وجهي كتير بس الحمدالله فيه نظارة وجمال وكل العالم كانت تقول ياحرام وجهك شو ضعفان بس انا مارديت واستمريت والحمدلله بفضلك وبفضل الله حققت اللي بتمناه
    شكرا على النصايح الحلوة

  3. غير معروف

    انا دلوقتي مش باكل سلطه مبحبش اصلا الخضروات اللي فيها ونادر كمان لو كلت فاكهه اعمل ايه؟

  4. يادكتور نفسى صدرى يخس انا زهقت

  5. يا دكتور هو منطقة الصدر بتتأثر بالدايت ؟

  6. سومية Adris Dls

    فعلا بعد خسارة ٣٥ كغ وشي منور بس عن جد إتبعت كل التعليمات في الأعلى فواكه و شاي و رياضة يومية و النتيجة رائعة

  7. فعلا يا دكتور كلامك مظبوك انا نزلت ١٥ كيلو بس كل اللي يشوفني يقولي وشك متأثرش وبشرتك احسن كمان انا بشرب شاي اخضر بنتظام السلطه شئ اساسي مفيش مره استغنيت عنها وبشرب ميه كتير. الحمد الله

  8. انا الحمد لله خسيت 18 كيلو ف خلال 28 يوم والحمد لله راضى جدا زالى حد ما وشى ماخسش بالقدر ال يقلق .
    ده رقمى واتس اب لو اى حد محتاج يعرف اى شيء ويسالنى عنه
    اخوكم احمد

  9. جزاك الله خيرا يادكتور بالفعل بعد ماخسيت معك من 65 لل55
    وحتى بعد ماوقفت ريجيم بسبب اني حامل
    فضل وزني ينزل
    وجهي ما اتغيرت نضارته هو ضعف بس بشكل متناسق مع جسمي
    كنت عاوزة اسألك عن علاج للكلف لانه متعبني وظهر اكتر بعدما خسيت

  10. غير معروف

    انا عملت رجيم خصيت ب 12كغ من 75 اصبحت 63 كغ وفضلت محافظة علي الوزن دا مدة 6اشهر لكن المشكل اني عندي الغدة الدرقية في رمضان وقفت الرجيم فزاد وزني اصبح 66 كغ وعمري 42سنة واخاف من ترهل وجهي فما هو العمل من فضلك يادكتور ..

  11. غير معروف

    شلون ضعفتي انا حاولات ماقدرت مااقوم الكاكاو ممكن رجيمك وزني 80 وطولي 150 ممكن رجيم مناسب لأن تعبت

  12. غير معروف

    كم لك ماشيه على الرجيم وممكن طريقة رجيمك

  13. الضوء الساطع الساطع

    جزاك الله خير
    فعلا كلامك جميل جدا

  14. السلام عليكم انا مبقدرش استمر في اي ريجيم لان برضع توأم ومبقدرش اقاوم الشوكولاته خالص هو ينفع اخد شاي اخضر مع الرضاعه ولادي عندهم 8شهور

  15. غير معروف

    انا لازم اشرب كوباية نسكافيه فاليوم مش بقدر وبشربها من غير سكر خالص لانها3ف١ بس هي كوباية واحده مش بزود عنها بس سمعت انها بتزود الارداف ودي المشكلة عندب نزلت١٧كيلو بس لسه عاوزة اظبط الارداف ايه الحل غير اني امنع كوباية النسكافيه

  16. كلام جميل من يومه
    ❤🙏🙏🙏

  17. كلام جميل من يومه
    🙏🙏🙏

  18. غير معروف

    جزاكم الله خيرا

  19. سونامحمد

    اناوزنى 80كيلووصدرى كبيرنفسي ينزل
    طولى 166س
    وسنى 20
    عايزه اخس بجد

  20. دكتور انا وزنى ١٠٣ وعندى ٢٢ سنه وطولى ١٦٥ ممكن اعرف رجيم مناسب ليه خصوصا انى بدوخ من اقل مجهود وتعبت مش عارفه اخس😔

  21. يعني أهم شيء شرب الماء كتير وأكل فواكه و سلطة والشاي الأخضر

  22. غير معروف

    دكتور ممكن اكمل الريجيم وانا في الحيض عادي ولا ماينفع

  23. طيب بالنسبه للنسكافيه واى التوقيت بين الوجبات

  24. غير معروف

    انا متبعه التمارين بس مش راضيه اوزن نفسي
    سيباها مفاجئة لنفسي👍👍👍

  25. ساره عبدالسلام

    لو سمحت يادكتزر انا عايزه نظام اخس عليه ١٠ كيلو على الاقل ف شهر واحد من غير ما وشى يخس ممكن حضرتك تفيدنى ضرورى جدآ لسرعه اجراء عمليه

اترك رداً على مريم إلغاء الرد

لن يتم نشر عنوان بريدك الإلكتروني.