الصيام المتقطع وحرق الدهون
نظام صيام متقطع لحرق الدهون

نظام الصيام المتقطع لحرق الدهون.. رجيم لمدة 7 أيام ينزل الوزن ويغير مقاساتك

فرصة جديدة وتحدي جديد بنظام الصيام المتقطع، وكالعادة يتجدد اللقاء معكم مساء كل يوم جمعة، بنظام جديد صيام متقطع يستمر لمدة أسبوع، نظام الصيام المتقطع يكون مناسب ليك في حالة إن وزنك أقل من 90 كيلو، وتقدر تتابع النظام العادي، لو وزنك أعلى من 90 كيلو.

كالعادة أيضاً هفكركم إن نظام الصيام المتقطع بيكون أصعب شوية، من النظام العادي، على اعتبار أنك مش هتطبق النظام إلا في حالة إن وزنك أقل من التسعين، بالتالي محتاج سعرات أقل من شخص وزنه أعلى من 100 كيلو مثلاً، فمؤكد تلاقي جدول الأكل بتاعك هنا مختلف.

تطبيق نظام الصيام المتقطع محتاج أبطال يلتزموا بيه بدون لغبطة، علشان تلاقي النتيجة اللي نفسك تشوفها، صيام 16 ساعة في اليوم، والامتناع عن الأكل خلال مدة زي دي، الأمر مش سهل خاصة في البداية.

لكن في حالة إن وزنك أقل من 90 كيلو ومش هتقدر تصوم، مفيش مشكلة، ممكن تقلل عدد ساعات الصيام لـ 14 ساعة بدلاً من 16، وممكن من الأساس متصومش وتكتفي بالالتزام بجدول الأكل يومياً بدون ساعات صيام.

نظام الصيام المتقطع الذي نتبعه في دايت كلينيك، هو نظام 16/8، بنصوم 16 ساعة وبيكون مسموح لينا بتناول الأكل خلال 8 ساعات فقط في اليوم، وليكن :-

  • من 8 صباحاً حتى 4 بعد العصر.
  • من 12 ظهراً حتى 8 مساءاً.
  • من 4 بعد العصر حتى 12 منتصف الليل.

ساعات الصيام من ضمنهم ساعات النوم، ونقدر خلالهم نشرب الماء والشاي والقهوة والأعشاب بدون سكر.

شرب الماء ضروري بطبيعة الحال، على الأقل 8 أكواب يومياً، ومهم جداً أن تكتفي بمعلقة سكر واحدة فقط، أو الإمتناع عنه تماماً، النوم بشكل جيد أمر مطلوب، والرياضة وليكن “المشي في المكان” مطلوبة أيضاً، ومن العوامل الفارقة وبخاصة في شكل الجسم، وبنسبة ولو ضئيلة في معدل النزول الأسبوعي.

 

نظام الصيام المتقطع لحرق الدهون

 

تجارب متابعينا مع الصيام المتقطع أقل ما يقال عنها أنها مذهلة، لو لسه مطبقتش النظام، إبدأ على طول متفكرش كتير ومتشتتش نفسك، استغل الفرصة واشحن طاقتك وخلي إرادتك ملازماك، واصل أسبوع ورا التاني بدون لغبطة، وهتبهر كل اللي حواليك بالنتائج اللي بتحققها معانا.

بما أن نظام الأسبوع الحالي يتخلله المولد النبوي الشريف ” كل عام وأنتم بخير “، وطبعاً كل الحلويات فيها حلاوة المولد، فإحنا عندنا خيار من اتنين:-

1- تطبق جدول الأكل لمدة 7 أيام بدون يوم فري، وفي الحالة دي ليك قطعتين من حلاوة المولد، كل قطعة في يوم مختلف عن التاني.

 

2- الخيار الآخر في حالة إنك مش بتحب حلاوة المولد، ومش هتآكل منها، يبقى هتاخد يوم فري “يوم الجمعة”.

 

جدول الأكل لمدة 7 أيام

 

نوزن نفسنا السبت الصبح ونشوف المقاسات كمان “أفضل” ونقارن يوم الجمعة صباحاً يعني بعد 6 أو 7 أيام من الإلتزام بالرجيم.

 

نظام يوم السبت والأحد والاثنين

24، 25، و26 أكتوبر

 

الفطار

يمكنك الإختيار من بين:-

  • 2 معلقة فول + 2 معلقة جبنة بيضاء لايت + بيضة مسلوقة + ربع رغيف عيش بلدي أو نصف رغيف عيش سن
  • 3 معالق شوفان + كوب حليب + 3 تمرات
  • حبة بطاطس مسلوقة + بيضة مسلوقة
  • جبنة بيضاء لايت (125 جرام) + خيار أو خس + ربع رغيف عيش بلدي
  • 4 معالق فول + نصف رغيف عيش سن أو ربع رغيف عيش بلدي
  • قطعة جبنة قريش + بيضة مسلوقة + نصف رغيف عيش سن أو رغيف عيش شوفان
  • 2 بيضة مسلوقة + ربع رغيف عيش بلدي أو نصف رغيف عيش سن
  • بيضة مسلوقة + قطعة جبنة قريش + نصف رغيف عيش سن

 

سناك (1)

6 حبات لوز

أو

2 ثمرة خيار

 

الغداء

يمكنك الإختيار من بين:-

شاورما فراخ (مقدار 250 جرام) ربع كيلو + طبق بروكلي مشوي بالثوم والليمون

أو

200 جرام لحمة مسلوقة + كوب بسلة

يعني إيه 200 جرام، يعني نشوف الكيلو فيه كام قطعة ونقسم على خمسة، لو هنقول الكيلو 10 قطع، بالتالي نصيبك هيكون 2 قطعة لحمة.

أو

200 جرام لحمة مسلوقة + طبق فاصوليا خضراء.

أو

مسقعة باللحمة المفرومة دايت (200 جرام لحمة) + طبق شوربة خضار

أو

2 بيضة مسلوقة + قرنبيط بالفرن + شرائح طماطم وخيار وفلفل

أو

ربع كيلو سمك مشوي + طبق سلطة كبير.

أو

ربع كيلو جمبري + طبق ملوخية.

أو

ربع فرخة مشوية + طبق سلطة.

أو

ربع فرخة مسلوقة ومحمرة بالفرن + كوسة وفلفل وباذنجان مشوي بالفرن.

 

سناك (2)

كوب حليب خالي الدسم

أو

نصف كوب حليب كامل الدسم

 

العشاء

علبة تونة بدون زيت

أو

بيضة مسلوقة

أو

علبة زبادي

 

 

نظام يوم الثلاثاء والأربعاء والخميس والجمعة

جدول الأكل من يوم 27 أكتوبر حتى 30 أكتوبر

 

الفطار

يمكنك الاختيار من بين:-

2 قرص طعمية “فلافل” يتم تحضيرها بالفرن “بدون قلي” + 2 معلقة فول + شرائح طماطم وخيار وفلفل أخضر + نصف رغيف عيش سن أو ربع رغيف عيش بلدي (يوم واحد خلال الأربع أيام).

أو

3 معالق شوفان + كوب حليب + ثمرة موز.

أو

3 معالق قمح بليلة + كوب حليب + معلقة عسل أبيض.

أو

اتنين علبة زبادي + نصف رغيف عيش سن + خيار أو خس أو قتة “قثاء”.

أو

2 بيضة مقلية بزيت زيتون أو مسلوقة + ربع رغيف عيش بلدي أو واحد توست بني + شرائح طماطم مع فلفل أخضر.

أو

قطعة جبنة قريش + بيضة مسلوقة + نصف رغيف عيش سن + جرجير وطماطم + خس أو خيار.

 

سناك (1)

 

ثمرة فاكهة
أو
نصف كوب حليب كامل الدسم
أو
6 حبات لوز ني.

 

الغداء

يمكنك الاختيار من بين:-

350 جرام سمك مشوي “ثلث كيلو” + طبق سلطة.

أو

200 جرام لحمة مسلوقة + طبق فاصوليا خضراء.

أو

ربع فرخة مشوية + شرائح طماطم وخيار.

أو

ربع فرخة مسلوقة + طبق شوربة خضار.

أو

ربع كيلو جمبري مسلوق + طبق ملوخية.

أو

ربع أرنب مسلوق + طبق ملوخية.

أو

2 بيضة مسلوقة + طبق مشروم دايت + شرائح طماطم وخيار.

أو

علبة تونة بدون زيت + طبق سلطة صغير.

 

سناك (٢)

لا يوجد

ويفضل شرب كوب شاي أخضر أو كوب قهوة سادة.

 

العشاء

كوب لبن رائب
أو
قطعة جبنة قريش + خيار أو خس.

 

وبكده يكون انتهى نظام الأسبوع الحالي صيام متقطع، إنتظرونا مساء الجمعة القادمة برجيم جديد،إن شاء الله ينال إعجابكم، متنسوش لو هتاخدوا يوم فري يبقى مفيش حلاوة مولد، ولو هتآكلوا من حلاوة المولد تبقى قطعتين ومش هناخد في الحالة دي يوم فري.

دمتم بخير ولا تنسوني من صالح دعائكم، منتظر دعمكم للتطبيق عن طريق عمل تقييم خمس نجوم لتطبيق دايت كلينيك، على متجر جوجل بلاي.