ماذا أفعل بعد اليوم المفتوح في الرجيم
نصائح اليوم المفتوح في الرجيم

الأكل في اليوم المفتوح في الرجيم وأهم النصائح لرجيم بدون ثبات

ثاني أحلى حاجة في الرجيم بعد فرحة النزول في الوزن هي اليوم الفري، اليوم اللي بنستناه علشان نشحن نفسياً وعضوياً طاقة تخلينا نواصل أسبوع ورا التاني.

بس لازم تفهمي كويس جداً إن اليوم الفري ليه قواعد لو متبعتيهاش هيكون اليوم الجميل ده سبب في ثبات وزنك.

مش بس كده، لو كان مفهومك عن اليوم الفري إنك مسموح ليكي بالأكل طول الأربعة وعشرين ساعة، ومن كل أنواع الأكل، ففي الحالة دي هيكون اليوم الفري الأسبوعي سبب في زيادة وزنك.

 اليوم المفتوح
اليوم المفتوح في الرجيم

ومن أكثر أسباب ثبات الوزن فعلاً .. هي اليوم الفري، ناس كتير بتشتكي إن إلتزامهم راح في الفاضي وللأسف هما بيكونوا بالفعل ملتزمين لكن اليوم الفري قادر لو إتعاملتم معاه بشكل غلط، هيكون قادر على تدمير كل شئ.

اليوم الفري مكافأة فقط للي قدر يلتزم طول الأيام الستة اللي سبقته، يعني لو حد بدأ رجيم ويوم ويوم بيلغبط.

فعلشان نبقى متفقين لو ملتزم بالمكتوب في نظام دايت كلينيك، لمدة 6 أيام فاليوم السابع تستحق يوم فري.

اكلك في اليوم الفري بيزيد إفراز هرمون الليبتين بنسبة كبيرة واللي بدوره بيساعد الجسم على رفع معدل الأيض وحرق الجسم للدهون، يعني مش بس هتاكل حاجة محروم منها طول الأسبوع لأ كمان في فائدة صحية هتعود عليك باليوم ده.

كمان هرمون الدوبامين أو هرمون السعادة بيزيد مع زيادة هرمون الليبتين وده بيعطيك بشكل لا إرادي راحة وحافز تواصل بيه 6 أيام كمان.

ولو على مدار الأسبوع لسبب أو لآخر كنت حارم نفسك من حاجة ” صحية ” فتقدر تاخد منها في اليوم الفري، علشان تعوض أي نقص ممكن يسبب لجسمك ضرر.

أفضل فاكهة تاكل منها في اليوم الفري لرفع معدل الحرق هي ” التين ” وممكن كمان العنب، هيساعدوك تدخل الأسبوع اللي عليه الدور بمعدل حرق مرتفع.

هو مش يوم فري هي وجبة فري.

أنا أفضل تاخدها الغداء لكن في ناس بتحب في وقت تاخد فطار بتاع أيام زمان أيام الكرش الجميل، في الحالة دي ممكن تاخد عيش رغيف مثلاً معاه طعمية وبطاطس مقلية وبيض وجبنة وباذنجان ولانشون والذي منه وشوية مخلل، بس طبعاً الغداء مش هيبقى مفتوح.

( الطعمية والبطاطس مقليين في البيت ) ( مش جاهزين من المطعم )

وأنا واثق إن محدش هيسيب المحشي والبط والحمام في الغداء كوجبة مفتوحة وهيدور على فطار مفتوح طعمية وكلام فارغ.

فـ كده معانا فطار دايت.

العشاء طبعاً دايت ( كوب لبن رائب أو كوب زبادي أو 2 بيضة مسلوقة وخيار ).

معانا كمان قطعة حلويات ( جلاش – كنافة – بسبوسة – كيكة.. ) الوقت الأفضل ليها يكون بالنهار يعني بين الفطار والغداء، وممكن تتأخر شوية بس نبعد عن الليل، وممكن آيس كريم طبعاً أو كريم كراميل، أو قطعة شوكولاته.

وممكن بقى البديل اللي سعراته أقل منهم وطعمه جميل وهيحقق هدف رفع معدل الحرق بسعرات أقل من اللي فوق، هو طبق أرز بلبن عليه شوية جوز هند وزبيب.

وجبة الغداء ” الفري ” يفضل إنها تكون قبل 5 مساءاً.

من الأفضل إن الوجبة الفري تكون حاجة زي محشي مثلاً كشري مصري مكرونة بشاميل، سمك مقلي، أكلة من البيت مضمون طريقة طهيها وكمية الزيت المتحضرة بيه ونوعه.

لكن في ناس كتير بتستنى اليوم الفري علشان تخرج خروجة حلوة تاكل فيها في مطعم في الحالة دي، تقدري تاخدي مثلاً حاجة زي ساندويتش شاورما أو قطعتين بيتزا ( مش أكتر من كده ).

رغيف حواوشي.

ساندويتش هامبورجر.

وممكن وجبة الغداء الفري تبقى أكلة سمك محترمة معاها شوية رز أحمر بكمية الرجيم حارمك منها طول الأسبوع وطبق سلطة وطحينة.

يعني مش شرط مفهوم اليوم الفري عندك تربطيه بأكل بعيد تماماً عن المألوف، ويفضل تحضير الأكل بوصفات دايت وعدم الإفراط في تناول الدهون والأكل الدسم.

حاول اليوم الفري تشرب فيه كمية مياه كبيرة على مدار اليوم وخاصة قبل الغداء، علشان متدخلش على الأكل بنفس مفتوحة، وتلاقي نفسك كلت بيتزا أو كريبين أو حلة محشي أو أي كمية تضيع مجهودك على مدار الأسبوع.

لو تقدر تعمل برضو أي رياضة، هيكون كويس.