الرئيسية / استفسارات / الشاي الأخضر

الشاي الأخضر

الشاي الأخضر نفسي أوصل لمرحلة إن كل اللي بيتابعني يشربه، حقيقي فوائده عظيمة جداً، وظلم ليه إننا نربطه بالتخسيس بس، لإنه ليه تأثيرات على الصحة بصفة عامة، هحاول معاكم في السطور الجاية دي نسرد جزء منها ببساطة شديدة بإذن الله.

عمليات الهضم والتمثيل الغذائي اللي بيقوم بيها الجسم يومياً بينتج عنها حاجة إسمها ” الشوارد الحرة “، ودي كثرها بيسبب مشاكل صحية، الشاي الأخضر بقى بينضف الجسم منها وبناء عليه بيحمينا من الإصابة بأمراض كتير زي:-

  • السرطان
  • أمراض القلب
  • الكوليسترول وتصلب الشرايين
  • التهابات القولون
  • الزهايمر
  • أمراض اللثة
  • ضعف الذاكرة

 

وبعض الفوائد التجميلية:-

  • نضارة الوجه ودي من أكثر الحاجات اللي بيدور عليها أي شخص بيعمل رجيم.
  • صحة الشعر.
  • تفادي وعلاج الهالات السوداء.

 

 

 

الشاي الأخضر مع الرجيم 

مش بيخسس بشكل مباشر ..

يعني معلومة إن ممكن ناكل براحتنا وبعدين نشرب كوباية شاي أخضر تحرق لينا الدهون اللي في الأكل دي غلط تماماً، وده مش دور الشاي الأخضر!!.

الشاي الأخضر بيحتوي على مادة إسمها ( كاتيكين ) ودي العلماء لما حللوها وبحثوا عنها  لقوها إنها بالإضافة إلى ( الكافيين ) اللي برضو موجود في الشاي الأخضر، بيكونوا مدرين للبول ودي أحد وسائل خروج الدهون من الجسم واتكلمنا عنها قبل كده، وكمان بيرفع معدل التمثيل الغذائي وقدرة الجسم على حرق الدهون في حالة إن عندك أي مشكلة مسببة ضعف الحرق.

وبيحسن أداءك في التمارين الرياضية.

 

 

نشرب كام كوباية شاي أخضر

 

من 2 : 3 أكواب يومياً ..

وممكن تزود إلى 4 أو 5

 

لكن أنا أفضل يكونوا تلاته بحد أقصى.

 

 

نشرب أمتى ؟

 

أولاً مش على معدة فاضية ..

الأفصل يتشرب بعد الأكل بساعتين .. أو قبل الأكل من نصف ساعة إلى ساعتين.

 

لا يفضل تناوله لكل من:- 

مريض يعاني من عدم إنتظام في ضربات القلب.

مريض هشاشة العظام.

مريض إرتفاع ضغط العين.

الأنيميا الحادة.

 

المرأة الحامل ومريض السكر يشربوه تحت إشراف طبي، المرضعة تشربه بعيد عن وقت الرضاعة ويفضل بعد إرضاع الطفل مش قبله.

 

عن د/ أحمد منصور

28 تعليق

  1. انا كل ما بشربه بتعب جدا وبدوخ ومعرفش ايه الأسباب؟؟؟؟

  2. محمود نبيل

    طب القهوة الخضراء

  3. انا بشرب الشاي الأخضر في ماء بالنعناع مع كمون وجنزبيل وعسل نحل

  4. غير معروف

    وقهوة بحليب شو رايك فيها انا عمري ماشربت قهوتدة بلاك وما بقدر عليها بس متعودة اشربها مع شواي حليب يعني بخفيفها بحليب

  5. الاوركيديا

    ميرسي اوي يادكتور
    فعلا الشاي الاخضر بينظف الجسم ومدر للبول
    وبنفس الوقت مشروب لذيذ حتى بدون سكر

  6. شكرا الك دكتور ع تعبك معنا
    الحمد لله انا بشرررب كل يوم شاي اخضر وبحبه كتيرررر

  7. هل يمكن شرب الشاي بدل الحليب في الرجيم ؟

  8. عبير الشام

    اكتر من كوب باليوم مابقدر اشرب
    لانو عندي قلق

  9. شكرا علي المعلومات المفيدة ربنا يجزاك خير 😍

  10. غير معروف

    انا وزني 82 وحابة أخس إنصحني شو بعمل وخاصة عندي بطني وليونش وبزاف زايدين هل أعمل رياضة أو حتى أخص باش نخدم الكوور نتاعي ،

  11. عامر عراك

    بصراحه انا جربت الشاي الأخضر لكن نتائجه كانت ضعيفه وبعدين عرفت قهوة DXN السوداء بالفطر الريش بصراحه شيء جميل ومفيده لحرق الدهون

  12. طيب يا دكتور انا معدتي بتتعبني اول ما بصحى من النوم، فا بشرب كوبايه شاي أخضر عشان اعرف افطر، عشان بيريحلي معدتي، هل اوقفه بردو؟

  13. شكرا على المعلومة المفيدة دكتور
    انا كنت اشربه وبعدين تركته لكن بعد هالمعلومات اكيد راج ارجع اشربه من جديد

  14. مصطفي ابوشامة

    انا سمعت انو الاكثار من الشاي الاخضر بالنسبة للرجل ياثر في انتاج التسترون ( هرمون الذكورة) افيدوني المعلومة دي صحيحة ولا خاطئة لاني مدمن شاي اخضر

  15. انا كل يوم بشكل عام اشرب شاي أخضر ونعناع الزنجبيل وشومر بصراحه اوك طبعا انا من سنين اشربه ومافيه اي مضاعفات

  16. ايه اخبار الكافى ميكس مع الريجيم يا دكتور مع العلم هى مرة واحدة فى اليوم

  17. اي افضل نوع للشاي الاخضر وهل ممكن يأثر ع الحمل او ف فترة انتظار حدوث الحمل

  18. ندي محمد

    دکتور انا بحب الشای الاخضر بس لو شربته کام یوم ورای بعض بیحصلی هبوط وبعرق وبیجیلی صداع ودیما حسه ان دماغی فیها ذی تنمیل یاتری ده فعلا من الشای الاخضر ولا من ایه مع العلم انی اشرب جنزبیل قرفه مش بیعملوا کده معایا والشای العادی برضوا لاکن الشای الاخضر کل ما اقول مش هو السبب تحصلی الاعراض ده یاریت تفیدنی یادکتور والف شکر علی معلومات حضرتک الجمیله

  19. مايستهلوشي

    الشاي الأخضر الصيني ام العادي من لبتون لاني كنت استخدم رويال وتركته

  20. هو ممكن شاي أخضر بالنعناع ولا لازم أخضر بس

  21. لو سمحت ي دكتور انا بجيب الشاي الاخضر اللي هو م الصيدليه اسمه رويال بس سمعت انه مضر وبينشف المايه اللي ف الجسم وبيأثر ع الكلي هل دا صحيح ؟؟؟

  22. يادكتور انا لسه داخله معاكم جديد هنا اعمل ايه التزم من النص عادي ولا استني الاسبوع الجديد

  23. هل الغدة احد اسباب الوزن الزائد وصعوبة انزال في الوزن

  24. غير معروف

    الشاى المسموح بيه شاة رويال ولا شاة عادى أخضر ولا شاة ليبيون ممكن التحديد بالظبط

  25. غير معروف

    لو سمحت يادكتور انا لو نزلت خمسه كيلو فى شهر ده كويس ولا ضعيف بس منزلتش تانى من بعدها وانا بصراحه بلخبط بسيط بس جالى إحباط رهيب ومليت

  26. مساء الخير دكتور انا عايز رجيم اكون حاد ونتيج مضمون بليز رد علية اذا كان ممكن

اترك تعليقاً

لن يتم نشر عنوان بريدك الإلكتروني.