صيام متقطع لوزن أقل من 90 كيلو
تخسيس الجسم بالصيام المتقطع

رجيم جديد صيام متقطع للدكتور أحمد منصور مناسب لوزن أقل من 90 كيلو

فرصة جديدة وتحدي جديد، بنظام الصيام المتقطع، مع الدكتور أحمد منصور، مناسب ليك في حالة إن وزك أقل من 90 كيلو، ولو أعلى من كده تقدر تطبق معانا النظام العادي.

الرجيم الحالي هيبدأ من يوم السبت الموافق 14 نوفمبر، وهيستمر لمدة 7 أيام، بالتالي هينتهي يوم الجمعة الموافق 20 نوفمبر، بدون يوم فري، أتمنى الكل يشارك في التحدي بكل قوة، علشان نفرح جميعاً بنتيجة إلتزامنا وتطبيقنا للرجيم بدون أي لغبطة.

نظام الصيام المتقطع اللي بنتبعه في دايت كلينيك، هو نظام (16/8)، بمعنى إننا بنصوم لمدة 16 ساعة، وبيكون مسموح لينا بتناول الأكل خلال 8 ساعات فقط في اليوم.

يعني هنآكل من 10 الصبح حتى 6 مساءاً، أو من 2 بعد الظهر حتى 10 مساءاً وهكذا، وساعات الصيام المتبقيه في اليوم، بيكون من ضمنها ساعات النوم، ومسموح خلالها بشرب الماء والشاي والقهوة والأعشاب بدون سكر.

لو وزنك أقل من 90 كيلو، ومش هتقدري تصومي لأي سبب مفيش أي مشكلة، إنك تطبقي جدول الأكل المكتوب هنا يوم بيوم، بدون ساعات صيام.

جدول أكل لمدة أسبوع بالصيام المتقطع

متحرمش نفسك من المشروبات المفيدة الصحية على مدار اليوم، وعلى رأسها الماء بحد أدنى 2 لتر في اليوم، بالإضافة للمشروبات الأخرى مثل الشاي الأخضر أو القرفة أو اليانسون أو الشمر أو الزنجبيل.

حاول تاخد معلقة واحدة فقط سكر في اليوم أو اتنين بحد أقصى.

حاول تنام كويس، وتتعرض للشمس كل يوم، وتمارس أي رياضة تساعدك وتدعم معدل نزولك في الوزن، وتحافظ على شكل جسمك، خلال رحلة التخسيس.

لو عندك أي سؤال أو استفسار، أكتبه ليا في تعليق على قناتي على اليوتيوب، وتقدر توصل ليها من خلال الضغط على كلمة “دكتور أحمد منصور” الملونة باللون الأخضر.

 

إختيارات الفطار خلال الأسبوع

كوب حليب + بيضة مسلوقة

أو

2 بيضة مسلوقة + خيار أو خس

أو

2 قطعة جبنة قريش + خيار أو خس

أو

2 علبة زبادي + خيار أو خس

أو

2 معلقة فول + بيضة مسلوقة + ثمرة طماطم + خيار أو قتة “قثاء” أو خس

أو

بيضة مسلوقة + قطعة جبنة قريش + خيار أو خس

أو

علبة تونة بدون زيت + طبق سلطة صغير

 

إختيارات الوجبة الخفيفة الأولى خلال الأسبوع 

بين الفطار والغداء (سناك 1)

 

كوب حليب خالي الدسم

أو

نصف كوب حليب كامل الدسم

أو

ثمرة فاكهة

او

نصف كوب ترمس

أو

6 حبات لوز نئ

أو

كوز ذرة مشوي

 

إختيارات الغداء خلال الأسبوع

 

ربع كيلو سمك مشوي + طبق سلطة + 3 معالق أرز مسلوق

أو

قرنبيط باللحمة المفرومة + 4 معالق مكرونة مسلوقة + طبق سلطة (وزن اللحمة 150 جرام)

أو

طبق مشروم بالبيض (2 بيضة) + طبق سلطة + ربع رغيف عيش بلدي أو نصف رغيف عيش سن

أو

فاصوليا باللحمة + 3 معالق أرز مسلوق ( وزن اللحمة 200 جرام)، والفاصوليا الخضراء “طبق مطبوخ دايت”

أو

علبة تونة بدون زيت + ربع رغيف عيش بلدي أو نصف رغيف عيش سن + طبق سلطة كبير

أو

صدر فرخة مسلوق + 4 معالق مكرونة مسلوقة + طبق كوسة دايت

أو

صدر فرخة مسلوق + 3 معالق أرز + طبق ملوخية دايت

أو

200 جرام لحمة مسلوقة + طبق سبانخ دايت + 3 معالق أرز

أو

2 بيضة مسلوقة + ربع رغيف عيش بلدي أو 4 معالق مكرونة + طبق سلطة كبير

أو

200 جرام كبدة مشوية + شرائح طماطم وخيار وفلفل أخضر + ربع رغيف عيش بلدي

أو

200 جرام كفتة مشوية + ربع رغيف عيش بلدي + طبق شرائح خضار “طماطم وخيار وخس وفلفل أخضر”

أو

ربع كيلو جمبري مشوي أو مسلوق + 3 معالق أرز + طبق ملوخية

 

إختيارات العشاء خلال الأسبوع

علبة زبادي + خيار أو خس

أو

بيضة مسلوقة + خيار أو خس

أو

كوب لبن رائب

 

كده معانا جدول أكل صحي جداً لمدة أسبوع، بدون يوم فري، مش محتاجين فيه أصلاً يوم فري، طبقوا المكتوب بدون لغبطة، وإن شاء الله النتيجة تكون مرضية للجميع.

دمتم بخير ولا تنسوني من صالح دعائكم.

برنامج للتخسيس الصحي