نظام اليوم الفري
اليوم الفري في نظام الصيام المتقطع

اليوم الفري في الصيام المتقطع

الصيام المتقطع أحد الوسائل الفعالة للتخلص من الوزن الزائد بأمان، النظام يمكن تطبيقه بطرق مختلفة، ولكن في دايت كلينيك نتبع نظام 16 إلى 8، بمعنى يكون مسموح لينا خلال اليوم بتناول الطعام خلال 8 ساعات في اليوم، مقابل 16 ساعة صيام.

ساعات الصيام من ضمنها ساعات النوم، اللي لازم نحاول إنها متقلش عن 7 ساعات يومياً، وباقي المدة، مسموح بشرب الماء والشاي والقهوة والأعشاب بدون سكر.

لما بتاخد السعرات اللي تمكنك من خسارة وزنك وتكون طبعاً خيارات صحية وده بنوفره ليك بسهولة في تطبيق دايت كلينيك، وتضيف الصيام المتقطع كعامل مساعد، هتبدأ تلاحظ معدلات نزول ممتازة جداً في الوزن.

لما بتبدأ رجيم بوزن مرتفع، بيكون معدل النزول في الوزن كبير في البداية، واحدة واحدة بيبدأ المعدل الأسبوعي يقل، علشان كده بنطبق نظام الصيام المتقطع في دايت كلينيك، للأوزان المنخفضة نسبياً يعني أقل من 90 كيلو جرام، لكن لو وزنك أعلى من كده، تقدر تطبق النظام الأسبوعي العادي.

اليوم الفري في الصيام المتقطع

من أكثر الأسئلة اللي بتوصل لي بشكل يومي، من المتابعين اللي بيطبقوا معانا في دايت كلينيك نظام الصيام المتقطع، هو “هل في يوم فري في الصيام المتقطع؟”.

اليوم الفري مهم جداً لينا خلال الرجيم

نفسياً محتاجين نحس إننا بنكافئ نفسنا بعد 6 أيام من الرجيم، ومن هنا لازم أنوه أن أول شرط يخليني أخد اليوم الفري، هو إني أكون بالفعل ملتزم طول الأسبوع.

مينفعش أكون ملغبط في أكثر من وجبة خلال الأسبوع ويوم الجمعة آخد فري، كده تقريباً ممكن منشوفش أي نزول في الأسبوع.

ملتزم طول الـ 6 أيام بالوجبات المكتوبة في النظام، إذاً تستحق يوم فري تفصل فيه نفسياً وتكون مؤهل لإتباع نظام الأسبوع القادم.

يعني إيه تفصل نفسياً ؟

يعني تاخد راحتك شوية في الأكل، طول الأسبوع متحدد ليك بعض الأصناف بكميات معينة، فبكل تأكيد هتكون محتاج تفصل شوية.

وهنا لازم نبدأ نتكلم عن خطة اليوم الفري في نظام الصيام المتقطع.

مبدئياً هي وجبة واحدة فقط !!

لو إتعاملت مع اليوم الفري إنه يوم مسموح ليك فيه بالأكل طول اليوم براحتك من كل الأصناف بكميات كبيرة، هيكون اليوم ده سبب في إنك متخسرش وزنك الزائد، هيضيع تعب الأسبوع للأسف الشديد.

مسموح خلال اليوم بوجبة واحدة فقط مفتوحة، وطبعاً هتكون وجبة الغداء.

الأفضل بكل تأكيد تكون الوجبة دي محضرة في البيت، نبعد قدر الإمكان عن أكل بره البيت.

كافئ نفسك في نهاية أسبوع رجيم بـ :-

  • طبق كشري جميل
  • طبق محشي وفراخ
  • مكرونة بشاميل
  • بيتزا محضرة بالمنزل زي ما اتفقنا

وغير ذلك من الأكلات المختلفة

وبما إننا خلال الأسبوع بيكون مسموح لينا كمية نشويات قليلة ( العيش – الأرز – المكرونة )، فممكن الوجبة المفتوحة في اليوم الفري، تكون عبارة عن نفس الأكل اللي متعودين عليه كل يوم في الرجيم، مع زيادة كمية النشويات ( طبق أرز كبير شوية مع سمك مشوي )

وممكن خلال اليوم ناكل أي خضار مكنش متاح لينا خلال الأسبوع أو بقوليات زي البسلة أو اللوبيا وهكذا.

 

الحلويات في اليوم الفري في الصيام المتقطع

تجنبها أفضل وإكتفي بوجة غداء مفتوحة

ولكن لو حاسة إنك مش هتقدري تواصلي أسبوع ورا التاني من غير حلويات، فممكن تتناول قطعة واحدة من الحلويات بحجم كف اليد ” مش أكتر من كده “.

 

اليوم الفري وثبات الوزن

اليوم الفري أحد أهم الأسباب لثبات الوزن لو تم التعامل معاه بطريقة خاطئة

وجبة الفطار مفتوحة

والغداء مفتوحة بكمية كبيرة

والعشاء حلويات بكميات كبيرة

في الحالة دي إحمد ربنا لو وزنك مزادش، لأنك زي ما اتفقنا هتكون ضيعت تعب الأسبوع.

 

الخطة الصحيحة

 

فطار دايت ( بيض مسلوق + طبق سلطة + نصف رغيف عيش )

الغداء ( قطعتين مكرونة بشاميل أو ربع فرخة مع طبق لوبيا مع طبق أرز كبير شوية )

العشاء دايت ( علبة زبادي أو كوب حليب أو ثمرتين فاكهة ).

عن د/ أحمد منصور