الرئيسية / أنظمة غذائية / ما هو الصيام المتقطع وكيف يمكنك من خسارة وزنك بسهولة
ما هو الصيام المتقطع

ما هو الصيام المتقطع وكيف يمكنك من خسارة وزنك بسهولة

السلام عليكم ورحمة الله وبركاته، معاكم دكتور أحمد منصـــور، وزي ما وعدتكم النظام الأسبوع الجاي هيكون بنظام الصيام المتقطع، اللي أوعدكم إن شاء الله هتلاقوا بيه نتائج أكثر من ممتازة، الرجيم هيستمر لمدة أسبوع وزي ما أنتم شايفين في العنوان، البداية يوم 2 فبراير السبت وهينتهي يوم الجمعة الموافق 9 فبراير.



من فضلكم متشتتوش نفسكم متشغلوش بالكم، بأي فيديو شوفتوه عن الصيام المتقطع، أو أي معلومة تعرفوها عنه، أنا معاكم لحظة بلحظة لحد ما نطبق النظام كما يجب أن يكون أرجوا إنك تلتزمي باللي بقوله بالحرف لأنك أكيد عارفه أنك لو زودتي عن الكميات المكتوبة في النظام هتتخني ولو قللتي هتخسي ولكن بتعب وإرهاق وأنيميا، وعشان كده بطلب منك للمرة التانية تركزي في اللي أنا هكتبه، وتمشي عليه بالظبط، وعلى مدار الأسبوع هنتابع وفي النهاية يوم الجمعة نتحاسب ونشوف وصلنا لإيه .. وإن شاء الله تكون النتيجة مرضية للجميع.

مبدئياً النظام اللي هكتبه متاح لأي وزن فوق 55 كيلو جرام لكن لازم نفهم حاجتين مهمين جداً لو وزنك 55 كيلو جرام وعايزة تخسي لازم تعرفي إن النظام لواحده مش هيكون كافي لإنك تفقدي من وزنك بالتالي هيكون مطلوب منك تمارسي رياضة المشي يومياً لمدة تتراوح من 45 دقيقة وحتى 60 دقيقة.

الحاجة التانية لو وزنك فوق 85 كيلو جرام هيكون النظام إلى حد ما قاسي عليكي بالتالي تقدري تضيفي عن اللي مكتوب في المقال ده على مدار اليوم .. ثمرة فاكهة إضافية، كوب حليب إضافي أو كوب زبادي إضافي، وكمان تقدري تزودي حصتك من النشويات يعني لو مكتوب تلات معالق أرز تقدري تضيفي إتنين كمان، ولو مكتوب ربع رغيف عيش تضيفي ربع كمان، وهكذا بحيث تقدري تلتزمي بالمكتوب بدون زهق ولا إرهاق لصحتك.

رجيمنا سهل جداً بفضل الله والمكونات كلها متوفرة، في كل البيت يعني مناسب لكل الحالات الإقتصادية.

بما إننا أول مرة لينا في الصيام المتقطع فعايزين نبدأ بأقل مرحلة .. مرحلة تكون مناسبة وفي نفس الوقت، فعالة إطمنوا، المرحلة دي هنصوم فيها لمدة 14 ساعة ومتاح لينا تناول الأطعمة  والمشروبات خلال الساعات المتبقية من اليوم اللي هما 10 ساعات .. أرجوا التركيز.

هقول مثال وإحنا نقيس على المثال ده ونطبق ..

دلوقتي بداية من يوم السبت هنبدأ الصيام المتقطع يعني من يوم السبت هنصوم 14 ساعة و متاح لينا الأكل طول مدة الـ 10 ساعات المتبقية من اليوم.

يعني لو أنتي بتصحي من النوم الساعة 8 وفطرتي مثلاً أو خدتي المياه بالعسل الأبيض ( عسل النحل الطبيعي ) .. كده لازم توقفي أكل تماماً عند الساعة 6 مساءً ولحد ما تنامي غير مسموح إطلاقاً بتناول أي أكل.

طيب لو صحيتي الساعة .. 8 وكل اللي عملتيه إنك شربتي مياه، وأول حاجة دخلت بطنك فيها سعرات حرارية كانت الساعة 10صباحاً  .. إذاً لازم توقفي أكل الساعة 8 مساءً.

الخلاصة إنك تبدأي تعدي 10 ساعات من بعد أول وجبة أو مشروب دخل معدتك وفيه سعرات حرارية ولما يخلصوا العشر ساعات دول، ساعتها توقفي أكل وتصومي.

ما المقصود بالصيام .. في نظام الصيام المتقطع؟

الصيام مش المقصود بيه صيام المسلمين في شهر رمضان، لكن هنا نعني بالصيام .. الإبتعاد عن أي شئ ليه سعرات حرارية، والسماح بتناول كل ما هو خالي من السعرات الحرارية.

إحنا قولنا من يوم السبت لينا 14 ساعة صيام و 10 ساعات ناكل فيهم ..

ببساطة هكتب لك تحت جدول فيه خطة الأكل خلال الـ 14 ساعة صيام ..

لكن اللي أنتي أكيد محتاجة تعرفيه واللي يعتبر جديد على متابعين دايت كلينيك، هو المشروبات المسموح بتناولها أثناء فترة الصيام ( 14 ساعة ) ومن ضمنهم ساعات النوم.

1- الماء .. بالطبع مسموح بيه.

2- القهوة الخضراء والشاي الأخضر .. مسموح.

3- القهوة .. مسموح.

4- النعناع – الزنجبيل – القرفة – وغير ذلك من الأعشاب المعتادة .. مسموح.

5- خل التفاح .. مسموح وضع ربع ملعقة منه على كوب ماء وتناولها خلال فترة الصيام المتقطع .. لكن طعمه وحش متعملوش كده 😂😂 مش خل التفاح اللي هيخسسكم يعني يا أبطال.

6- الكوكاكولا الدايت أو السكر الدايت أو أي حاجة في آخرها كلمة دايت .. أنا ضد تناولها أثناء فترة الصيام المتقطع على الرغم من أن البعض يسمح بها .. ولكن أنا أفضل الإبتعاد عنها تماماً أثناء فترة الصيام.

7- الحليب .. غير مسموح.

8- الشاي .. مسموح.

إذا الخلاصة تكمن في إن المسموح خلال الـ 14 ساعة صيام هما ( الماء .. الأعشاب .. القهوة .. الشاي ) بالطبع من غير سكر.

وطبعاً غير مسموح بتناول أي نوع طعام خلال الفترة دي.

ما فوائد الصيام المتقطع؟

1- إرتفاع هرمون النمو – growth hormone

طيب إيه اللي بيحصل لما الهرمون ده يكون موجود بشكل مرتفع نسبياً إثر تطبيق الصيام المتقطع ..

ببساطة شديدة الأمر ده ليه فوائد مذهلة لأن الهرمون ده بيسبب إرتفاع معدل الحرق وبالتالي أنتي أثناء إتباعك للصيام المتقطع مش هتكوني محتاجة لأي دواء أو أعشاب ترفع لك معدل الحرق، لإن جسمك بشكل طبيعي هيكون معدل حرق الدهون فيه مرتفع وكمان هرمون النمو اللي بيزيد وقت الصيام المتقطع بيؤدي إلى نمو العضلات والحفاظ عليها وتقويتها.

وأظن إحنا مش محتاجين وقت إتباعنا لأي رجيم أكتر من الفايدتين دول، إننا يكون معدل حرقنا للدهون مرتفع وكمان، نحافظ على كتلنا العضلية، بحيث يكون نزول الوزن غير مصحوب بحدوث ترهلات أو حالة الضعف العام التي تنتج بعد إتباع بعض أنواع الرجيمات.

وفي فايدة كمان عظيمة جداً للصيام المتقطع وزيادة هرمون النمو، وهي إن الهرمون ده مضاد للشيخوخة، بالتالي بيحافظ على صحة شعرك ويمنع تساقطه، وكمان نضارة بشرتك وحيويتها.

2- خفض مستوى الإنسولين.

وده شئ بيخلي الصيام المتقطع طريقة مثالية للتخلص من الدهون المتخزنة أو حديثة التواجد، لسبب بسيط جداً، طول ما إحنا بناكل بيكون مستوى الأنسولين مرتفع، وبالتالي الجسم بيخزن الدهون أو بيحول النشويات للدهون فبنكون معرضين بصورة أكبر إننا نزيد في الوزن وفي مقاسات الجسم.

لكن إنخفاض مستوى الإنسولين، الناتج عن الصيام المتقطع بيحفز الجسم على حرق الدهون وبيمنع الجسم من تخزين دهون جديدة.

3- ديتوكس.

ناس كتير بتسأل عن طرق تعمل بيها ديتوكس، والسبب إن الديتوكس أحد أفضل الطرق اللي الجسم، بيتخلص بيها من السموم المتراكمة فيه، بالتالي ميكونش في أي معوقات لنزول الوزن.

الصيام المتقطع بيدي فرصة للكبد أنه يرتاح شوية، ويكون عنده القوة اللي تخليه، يقوم بعمله بكفائة أكبر، من المعتادة، بالتالي الجسم هيتخلص من السموم أول بأول، وده برضو شئ بيحفز نزول الوزن.

وهناك بعض الفوائد العامة للصيام المتقطع

4- يعيد إصلاح الخلايا التالفة.

5- يقلل من خطورة الإصابة بأمراض القلب والأوعية الدموية.

 

طبعاً أنا كده يعتبر إتكلمت عن 1 % من المعلومات بخصوص الصيام المتقطع .. لكن زي ما قولت ليكم، مش هقول كل المعلومات مرة واحدة .. علشان متزهقوش وعلشان كمان كل شئ يوصل ليكم ويثبت في دماغكم..

لكن إطمنوا واحدة واحدة هتبقوا ملمين بالنظام وكل ما يخصه، لكن الموضوع ده كان مجرد مقدمة، تساعدكم تبدأوا من يوم السبت إن شاء الله.

 

النظام اللي هيبدأ من يوم السبت 2 فبراير وينتهي 9 فبراير بــ الصيام المتقطع .. هتلاقوه لما تضغطوا ( هنا ).

عن د/ أحمد منصور

35 تعليق

  1. ايمان محمد

    احلى دكتور دا ولا ايه عاش يا دكتور قد التحدى ان شاء الله

  2. ريهام احمد

    بجد ما شاء الله حضرتك عندك صبر وعندك طاقه كبيره لينا ربنا يبارك في حضرتك

  3. سهام من الجزائر

    انا انشاء الله معاك دكتور العزيمة موجودة والارادة كذلك ربي يوفقنا ونحقق حلمنا الف شكر ليك دكتور

  4. بدون اسم

    بجد الله ينور نظام ممتاز وعن تجربي احلي دكتور 😍

  5. الله يبارك فيك دكتور
    روان من الاردن

  6. دكتور انا بدي اصوم سداد لرمضان 4 ايام بنفع

  7. انا جديدة معاكم وان شاء الله ابدأ معاكم في نظام اليومالصوم المتقطع من يوم السبت

  8. سهام hayat elrouh

    الله ينور ويفتح عليك

  9. غير معروف

    تم

  10. ان شاء الله معاكوا

  11. ! لو حبيت أصوم يوم الاثنين والخميس هينفع امشي على النظام دة ولا لا

  12. غير معروف

    في حالة تنفيذ نظام الصيام من ٢ فبراير الي ٩ فبراير تاخد يوم فري و بعدين نكمل علي اي نظام بعد اذنك

    • غير معروف

      اليوم فري ضروري كتير
      لان لو كان في عزيمه حنروح بيوم الفري ومحدش ح يعرف اننا منعمل ريجيم او ياخد باله

  13. غير معروف

    جزاك الله خيرا بإذن الله التزم به عندي استفسار لو الفطار لبن وكورن فليكس او بليلة معاها سكر دايت ولا لا تاني حاجة ينفع اشرب نسكافيه بلاك باللبن بالسكر الدايت ولا لا

  14. ارجوك يا دكتور رد عليا انا وزني 96وعمري25وطولي1.65 رح انزل كم لو طبقتو

  15. مروة محمد

    هاااايل ربنا معانا انا موزنتش من اسبوعين هوزن ان شاء الله قبل النظام ده وبعده وملتزمة معاكم بنسبه كبيرة ومقاساتي قلت درجتين الحمد لله

  16. دكتور اخد كم ملعقه سكر مع البليله ولو شربت شاى ليه كام ملعقة سكر انا لسه بدأها مع حضرتك كده ممكن اخس

  17. غير معروف

    ينفع اني اصوم صيام المسلمين وان الاكل والشرب بعد المغرب

  18. موفقين باذن الله
    مع حضرتك

  19. يادكتور انا بقالي فتره ببقي مظبوط جدا طول اليوم بس باجي اخر اليوم ممكن يحصل اي حاجه تبوظه ولو نمت بدري عشان مبوظش اي حاجه واحاافظ ع نومي بدري ممكن اقوم من النوم اكل وارجع تااني مش لاقيه سبب لده وحرفيا زهقت واتخنقت من الموضوع ده مع اني ممكن اكون نايمه شبعانه يعني مش حاسه بجوع

  20. نظام ممتاز
    ربي يجزيك الخير يادكتور

  21. ام افنان

    دكتور من فضلك كنت ماشيه علي النظام الكيتوني من شهر بالضبط وخسيت 6 كيلوا عليه بس عايزه اكمل مع حضرتك لسه محمله التطبيق هل يوجد مشكله او اضرار اني انتقل من نظام الي نظام لان الكيتوني تاعبني جدا الرجاء الرد

  22. ام عبد الكريم

    بادن الله معاكم ونكون قد التحدي

  23. إيلاف من العراق

    شكرا دكتور ربي يحفضك

  24. رقيه علي

    إن شاء الله مع حضرتك يادكتور الله يوفقك يارب

  25. طيب معلش لو أخدت في خلال فترة الصيام الشاي بسكر دايت وهي واحدة سكر في الشاي ﻹني بشرب شاي كتير او جوعت واخدت تمراية واحدة او كوباية زبادي ؟؟

  26. غير معروف

    انا من العراق وراح اجرب الدايت ان شاء الله من اليوم وزني ٧٤

  27. دكتور أحمد ممكن أسأل سوال هو الصيام المقطع عن الماء والأكل ولا الأكل فقط ارجوا الرد

  28. السلام عليكم
    انا لسه منزله التطبيق حالا يا تري ابدا معاكم اذاي
    انا وزني 94 وطولي 160
    وانا كمان مريضه سكر

    • غير معروف

      لوسمحت انا جديده واول مره اعمل الصيام المتطع ابداء ازاي

  29. ممكن الرجيم الخاص بالمرضعات

  30. غير معروف

    انا هبدأ النظام لو سمحت يا دكتور الرياضة نصف ساعة و لا اكتر شكرا يادكتور يا رب اخس

  31. عوذة ابتدى معاكم الأسبوع الجديد أمته هايبدا يوم10

  32. ان شاء الله هبدا معاكم من السبت القادم وشكرا بحد علي المجهود الرائع ده

  33. غير معروف

    طيب دلوقتي أنا ف ثانوية عامة وعايزة اخس انا ٩٠ كيلو ومش عايزة حاجة تاثر ع مذاكرتي ف نفس الوقت



اترك تعليقاً

لن يتم نشر عنوان بريدك الإلكتروني.