عيش الشوفان للدايت
طريقة عمل خبز الشوفان في البيت ومناسب للرجيم

عيش الشوفان للدايت وأسهل طريقة لتحضيره في المنزل

معظمنا بيعاني من الاضطرابات الهضمية بسبب عدم تحمل الجلوتين، وده شئ بالطبع مش لطيف أبداً لمرضى القولون العصبي خاصة لو بتعمل رجيم، هتلاحظ دايماً إن عندك انتفاخ حتى لو بتخسر دهون، علشان كده بنرشح الشوفان كمصدر للكربوهيدرات صحي وآمن ومفيد بكل تأكيد، لو بتعمل دايت بشكل عام، وخصوصاً لو بتعاني من القولون العصبي.

والسبب هو إن الشوفان خالي من الجلوتين، لكن المشكلة إن في ناس كتير مش بتحب الشوفان في صورته المعروفة، اللي هي وليكن 3 معالق شوفان مع كوب حليب مثلاً.

في مقال النهاردة هنتعلم ببساطة نعمل عيش الشوفان في البيت، يكون بديل للعيش بكل أنواعه وخاصة النوع المعتاد والمتواجد في كل البيوت، وهو العيش البلدي المصري، واللي لو حابب تعرف سعراته، تقدر تضغط على الكلمة الملونة بالأخضر، وهنتكلم الأول على السريع عن فوائد الشوفان للصحة، ودور الشوفان خلال رحلة الدايت.

 

فوائد الشوفان

أهم فائدة بالنسبة ليا زي ما قولت ليكم هي إن الشوفان مفيد ومناسب لكل من يعاني من مشاكل بالجهاز الهضمي، وعلى رأسها الإمساك، المنتشر بشكل كبير جداً بيننا، فالشوفان بينظم حركة الأمعاء وبيساعد في تسريعها، لأنه غني بالألياف الغذائية.

الفائدة الأخرى الهامة جداً أيضاً، هي إن الشوفان بيساعد في استقرار مستويات السكر في الدم، طبعاً بتسأل نفسك دي حاجة مفيدة إزاي، هقولك ببساطة الشوفان موجود في كل الرجيمات علشان الفائدة دي في الأساس، لما بتآكل شوفان فهو بيحميك من إن يحصل ارتفاع مفاجئ في مستوى سكر الدم، واللي بطبيعة الحال بيكون بعدها انخفاض سريع جداً في المستوى، وبناء عليه بتجوع، فتبدأ تآكل كميات أكل كبيرة، وتبقى حاسس إنك جعان طول الوقت.

بالتالي لما بتاخد وجبة يكون فيها عيش الشوفان مع حاجة زي البيض المسلوق مثلاً وثمرة خيار، هتشبع لفترة طويلة، وده بغض النظر عن الفوائد المذهلة اللي وصلت جسمك.

ومن فوائد الشوفان أنه بيعزز صحة القلب، وبيساعد في علاج ارتفاع ضغط الدم، وبيعزز جهاز المناعة، ومفيد للسيدات بعد انقطاع الطمث.

 

عيش الشوفان للدايت

عيش الشوفان للدايت
خبز الشوفان للدايت

المقادير المطلوبة

  • كوب وربع ماء
  • كوب شوفان حبة كاملة
  • ربع معلقة صغيرة من الملح
  • ملعقة صغير شمر
  • ربع معلقة صغيرة بيكينج باودر

خطوات التحضير

نضع كل المكونات اللي تقريباً هتعمل لينا أربع أرغفة بالخلاط وتضرب جيداً، نتركها بعد ذلك خمس دقائق لترتاح، وبعد كده نحضر طاسة غير لاصقة، ونضع بها الكمية من العجينة التي تحدديها وفقاً للمقاس اللي تحبيه لرغيف العيش، وأخيراً نتركه على نار هادئة مدة حوالي 3 دقائق، حتى يفصل ونقلبه على الوجه الآخر لمدة أقل حتى تمام النضج.

 

طريقة أخرى:-

نحتاج لها كوب من دقيق الشوفان ومعاه (ربع كوب ماء، كوب حليب، بيضة، رشة ملح، فلفل أسود، كركم، وزعتر)، وهنضرب كل المكونات اللي فاتت في الخلاط، بدون المياه، ونسيب اللي هيطلع من الخلاط ربع ساعة، وقبل ما نبدأ نسوي هنضيف المياه ونقلب كويس، ونبدأ نسوي رغيف رغيف على البوتجاز، في طاسة مدهونة بزيت خفيف.

 

عيش الشوفان مناسب جداً للرجيم، مشبع ومغذي، ينفع مع طعمية في الفرن، أو بيض مسلوق، أو فول أو جبنة أو زبادي، أو في الغداء مع علبة تونة “وجبة ممتازة”.

برنامج للتخسيس الصحي