رجيم شهر رمضان
رجيم الدكتور أحمد منصور شهر رمضان

رجيم شهر رمضان للدكتور أحمد منصور يبدأ السبت 9 مايو وينتهي الجمعة 15 مايو

عايزك تقنعيني إزاي بتبقي مش ملتزمة بتعلميات الرجيم، وجدول الأكل، وفي نفس الوقت زعلانه إن وزنك مش بينزل، اللي بيحصل إن بيوصلني بعض الرسائل بتشتكي من ثبات الوزن، وأتفاجئ خلال المحادثة إن أصلاً الشخص اللي بيشتكي من الثبات بيكون لسبب من اتنين:-

رجيم صحي

لإما مستعجل على النزول بمعنى أنه عايز كل ما يوزن لو كل يوم أو اثنين يلاقي تغير حصل وفي فرق في الشكل أو في نزول على الميزان، لإما أصلاً وده الأسوء أن بيكون في استهتار كبير وتجاهل للتعليمات ولغبطة كتير وفي الآخر عايز توزن تلاقي نفسك نزلت وتتصدم من الثبات.

إحنا في دايت كلينيك بنوفر لك رجيم كل أسبوع، والهدف إنك تطبق رجيمنا لمدة 100 يوم، وخلال الرحلة مؤكد هتلاقي نزول يبهرك طبعاً لكن الموضوع محتاج صبر.

زي ما وزنك زاد في سنين وفضلت مستهتر شهور كتير، إعطي لجسمك فرصة يتعامل مع نمط الحياة الجديد، يعني بعد ما تحضر الإرادة القوية، لازم يكون عندك صفة الصبر.

رجيم دايت كلينيك بفضل الله تعالى هو الأفضل على الإطلاق بإذن الله، لكن قبل ما تحكم على النتيجة من فضلك أصبر شوية، وصدقني مع مرور الوقت كلامي ده هتتأكد منه، وأنا مش بغريك علشان أقدم ليك حاجة بمقابل مادي، أنا هدفي أشوفك فرحان بنجاحك، وتدعيلي دعوة حلوة إني كنت سبب إن حياتك إتغيرت للأفضل.

الرجيم صحي ومش هتعاني من أي آثار سلبية على صحتك خلال إتباعك ليه، يعني هتلاقي نفسك بتاكل كتير ومن أكل البيت ومش حارم نفسك من حاجة، وفي نفس الوقت بتشبع، وبتخس كمان ومقاساتك بتتغير في أوقات قياسية، لكن كل ده مش هيحصل في يوم وليلة، إصبر لتفرح.

فات دلوقتي تقريباً نص رمضان، اللي بنأكد كل أسبوع إنه فرصة عظيمة للرجيم للحصول على نتائج جميلة، ولو مرت الفترة اللي فاتت بدون إلتزام بالمكتوب في نظامنا، من فضلك ركز دلوقتي معانا، علشان تدخل على العيد شخص تاني.

من فضلك ركز، أعتقد دلوقتي إنك مستعد صح ؟؟، بقالك أسبوعين أكل كتير وغير صحي وحلويات، نفوق شوية صغيرين، وهنفرح فرحة كبيرة.

الموضوع محتاج شوية تضحية، لكن الأمر يستاهل، لازم تضحي لإنك هتشوف كل اللي حواليك واخدين راحتهم، وبياكلوا كل اللي أنت مش قادر تقرب منه بسبب الرجيم، لكن أنت إخترت الصح، لأنك أخترت صحتك، وأخترت الطريق اللي نهايته وزن مثالي وجسم نفسك توصل ليه.

دي كانت المقدمة، اللي أتمنى تكون اتشحنت بيها نفسياً، وعلشان تشوف نظام الأكل في الأسبوع الثالث، إضغط على كلمة (جدول الأكل في الأسبوع الثالث) الموجودة بين القوسين، والملونة باللون الأحمر.

بكره أحلى إن شاء الله مع دايت كلينيك، مش هنخذلك، وهنكون على قدر ثقتك الغالية، إطمن وأنت معانا، إطمن فرحة الجسم الجميل الرشيق، مش باقي عليها كتير، بس أنت تتعب شوية يا صديقي.