رجيم شهر رمضان للدكتور أحمد منصور الأسبوع الأول

كل عام وأنتم بخير متابعينا الكرام، بمناسبة شهر رمضان، وإن شاء الله يكون لينا لقاء شهر رمضان القادم، بعد سنة من الآن، وكلكم بفضل الله تكونوا حققتوا هدفكم وأكثر كمان من وجودكم معانا في دايت كلينيك، في الوصول للوزن المثالي.

كونك بتقرأ المقال ده حالياً فده معناه إنك بتثق في إسم دايت كلينيك، وإن شاء الله هنكون قدر ثقتك بينا، ومش هنخذلك أبداً، ومعناه برضو إنك عندك رغبة في إنك تخسي، ومن هنا بطلب منك الإلتزام بتعليماتنا والنصائح وجدول الأكل اليومي، للوصول لأفضل نتيجة ممكنة وخصوصاً خلال شهر رمضان.

30 يوم هنقضيهم مع بعض بإذن الله تعالى كل يوم جدول أكل مختلف، نطمن إن الموضوع صحي ومش مرهق أبداً، بالعكس طبعاً نظام الأكل المعتاد بدون رجيم هو اللي بيكون غير صحي والدليل حاجتين:-

  • أولاً الإرهاق سواء خلال الصيام أو من بعد الفطار حتى السحور
  • ثانياً بتطلع من مضان مكتسب وزن كبير جداً

مع دايت كلينيك، إن شاء الله هتحققي عكس الحاجتين دول، يوم بيوم مع نمط الحياة الصحي، هتلاقي صحتك أفضل، وكمان بعد الـ 30 يوم، صدقيني وعد ليكي هتلاقي نفسك في حتة تانية خالص، المهم تسمعي الكلام.

رجيم شهر رمضان، هو تطبيق لنظام الصيام المتقطع، كما يجب أن يكون، ساعات صيام تصل على أقل تقدير، لـ 15 ساعة بدون أي سعرات حرارية تماماً، لتعطي لجسمك الفرصة لحرق الدهون والتخلص منها بمعدلات قياسية جداً جداً.

متعودين في دايت كلينيك بنقسم الأوزن لفئتين، فئة بتتبع نظام الصيام المتقطع، وفئة تانية بتتبع الرجيم العادي، بما إننا في رمضان كلنا هنصوم، بالتالي كلنا هنعتبر بنعمل صيام متقطع بحكم إن الصيام فرض طبعاً، فمهما كان وزنك هتمشي على جدول الأكل والنصائح اللي هنبعتها لحضرتك يومياً.

إحنا لسه مبدأناش رجيم، ياريت نفوق كلنا من أول يوم، صدقوني نفسي أوصل لكل واحد بيقرأ الكلام ده دلوقتي، التأثير الجبار للإلتزام بالرجيم خلال 30 يوم في شهر رمضان.

معدل النزول خلال شهر رمضان هيختلف من شخص للتاني، بناء على العديد من العوامل، منها مثلاً وزنك الحالي، ومعدل نشاطك اليومي، لكن بطمن الجميع كله هيخس بشكل يفرحه لو إلتزام بالتعليمات.

وجبة السحور هامة جداً جداً لا يمكن تجاهلها بأي حال من الأحوال، ومتاح لينا الإختيار فيها من بين العديد من الخيارات الصحية مثل:-

  • البيض
  • الفول
  • الجبنة
  • الزبادي
  • الحليب
  • اللبن الرائب
  • الخبز بأشكاله المختلفة
  • الشوفان
  • الخضار

 

هنختار لكم يوم بيوم الوجبات سواء الفطار أو السحور، بالطريقة اللي تحافظ على صحتكم وفي نفس الوقت نرتب الأكل والنشويات ونحدد الكمية اللي تساعدك في خسارة الوزن في وقت قياسي.

شرب الكمية التي يحتاجها الجسم من الماء في الفترة بين الفطار والسحور، على الأقل 8 أكواب من الماء، أرجو الإلتزام بهذا البند وكذلك عدم الإكثار من إستهلاك السكر الأبيض، ملعقة واحدة في اليوم كفاية ولو سكر دايت مسموح بما يعادل في التحلية أربع معالق سكر.

مسموح في اليوم بمعلقة واحدة من زيت الزيتون، معلقة كبيرة طبعاً، في تحضير الأكل أو على طبق السلطة، ودي حاجة محتاحين ليها في اليوم لفوائد زيت الزيتون العظيمة، ومن الملح لا تستهلك أكثر من ملعقة واحدة صغيرة يومياً.

الرياضة مهمة خلال الشهر، مش هتقدر تعمل رياضة لا تقلق، إلتزم فقط بالنظام الغذائي، طب لو هتعمل رياضة فتقدر تمشي في المكان في الوقت اللي تحبه المدة اللي تقدر عليها، وليكن نصف ساعة، بعد العصر خلال الصيام، أو بعد وجبة الفطار بفترة على الساعة 10 مثلاً أو بعد صلاة الفجر، وقبل النوم بفترة.

العرق سوس، غير مسموح لمرضى الضغط المرتفع، ومن يعاني من أي مشاكل بالقلب، ومرضى الكلى، وبوجه لا أفضل الإكثار منه والإعتماد عليه كمشروب رمضاني، هتلاقي في النظام عصائر طبيعية، وممكن مشروبك الرمضاني يكون (كركدية طبيعي ساقع).

 

خلال الأسبوع الحالي، أول أسبوع في رمضان، على الفطار عندك كذا إختيار، شوفي منهم اللي ياسبك:-

  • كوب ماء دافئ مذاب فيه معلقة عسل أبيض
  • كوب حليب مذاب فيه معلقة عسل أبيض
  • كوب ماء عادي من الحنفية مع ( 3 تمرات )
  • كوب حليب مع 3 تمرات

 

الفاكهة المجففة “ياميش رمضان” كالتين المجفف والمشمش والبرقوق المجفف “القراصيا”، وغير ذلك غير مسموح إضافته يومياً مع كوب الحليب والتمر، يكفي فقط الحليب مع التمر لكسر الصيام عليهم، ولكن في حالة الرغبة في إضافة الباقي فده هيكون مسموح فقط خلال يومين من كل أسبوع.

 

كوب حليب يكون خالي الدسم، ولا مانع إطلاقاً إن الحليب يكون كامل الدسم، ولكن بدل الكوب هيكون مسموح ليك من الحليب كامل الدسم، نصف كوب فقط.

بعد أذان المغرب تفطر على التمر مع الحليب، وتترك لجسمك دقائق، المدة التي ستقضيها لصلاة المغرب كافية، ولا تنسونا من صالح دعائكم، في هذا الوقت العظيم.

التمر عند الفطار، ممتاز جداً لأنه غني بالألياف، والسكريات البسيطة اللي جسمنا محتاجها بعد فترة صيام طويلة، علشان يحفز كمان الجهاز الهضمي بشكل عام للعمل بكفائة.

طب ليه نستنى 10 دقائق بعد التمر ؟

علشان تعطي لجسمك الوقت يظبط سكر الدم، ويرتفع معدل الأيض وتبقى قادر على الهضم وحرق السعرات الحرارية.

 

نظام أول يوم في رمضان

الجمعة الموافق 24 أبريل

 

دلع في دلع

يوم فري طبعاً

هناكل براحتنا، في الفطار مش السحور، السحور نظامه هيكون مع نظام اليوم الثاني هتلاقوه مكتوب إن شاء الله.

مسموح خلال الفترة بين الفطار والسحور بقطعة حلويات، كل ما كانت بدري كل ما تكون أفضل، بس قطعة واحدة مش أكثر من كده.

 

يبقى إن شاء الله سحورنا النهاردة

اليوم الأول

 

2 علبة زبادي + نصف رغيف عيش بلدي أو 2 توست بني أو رغيف عيش سن + خيار.

 

فطار اليوم الأول

فري زي ما اتفقنا بدون قيود..

واللي في الغالب هيكون محشي

الراعي الرسمي لأول يوم في رمضان.

 

 

إضغط على كلمة

 

( باقي نظام الأسبوع الأول من رمضان )

 

الموجودة بين القوسين

هتفتح ليك صفحة فيها جدول الأكل يوم بيوم حتى يوم الجمعة الموافق 1 مايو

وإن شاء الله يوم الخميس 30 أبريل هيكون بين أيديكم  نظام الأسبوع الثاني.