يوم شم النسيم.. رجيم دكتور أحمد منصور يوم الاثنين الموافق 20 أبريل 2020

مبدئياً يوم شم النسيم هيكون يوم فري، متعودين كلنا خلال السنين اللي فاتت مع دايت كلينيك، إننا في اليوم ده بنكسر قاعدة الأكل الصحي علشان خاطركم، وبناكل فسيخ براحتنا، لكن المرة دي ومع انتشار فيروس كورونا، قلبي مش مطاوعني أكتب ليكم ولو ليوم واحد أكل غير صحي، لإن السلاح الوحيد اللي بنمتلكه في الظروف دي هو مناعة جسمنا.

المستشفيات بسبب يوم شم النسيم وبسبب أكل الفسيخ بيزيد جداً إستقبالهم لحالات طارئة بأمراض كتير وعلى رأسها أمراض القلب، والسبب إحتواء الفسيخ على كمية كبيرة من الملح والمعروف باسم ” السم الأبيض ” التي تتسبب في إحتباس السوائل بالجسم.

ثم أمراض الجهاز الهضمي، زي المغص والغثيان والإسهال، التي لا يفلت منها أحد بعد تناوله لأكلة الفسيخ، واللي ممكن تضطرك كمان إنك تروحي للمستشفى، اللي هتزود إحتمالية إصابتك بفيروس كورونا، لأنها مصدر رئيسي للعدوى.

سامحوني، مش هقدر أقولكم المرة دي، يوم وهيعدي، لأن مش هينفع حد لاقدر الله يروح المستشفى في أزمة زي اللي بنمر بيها في الوقت الحالي.

كده كده مفيش خروح مفيش تجمعات عائلية، لكن علشان متزعلوش عملنا يوم الاثنين اللي هو يوم شم النسيم يوم فري، وجبتين.

الفطار هيكون فري والغداء فري، أما العشاء فيكون لإما لبن رائب لإما علبة زبادي.

الفري لا يشمل حلويات أو شيبسي .. حتى لا يتأثر معدل النزول الأسبوعي الإجمالي، كلامي ده بوجهه لشخص خايف على صحته خايف على إن مشوار وصوله للوزن المثالي يتأثر.

في ناس تانية هتقول الفسيخ بتاعنا مضمون، أو هو يوم في السنة بلاش تعقدنا فيه، حضرتك في الحالة دي بتحطي نفسك في موقف 50% اليوم يعدي على خير، و50% وارد يسبب لك الأكل أي مشكلة صحية تضطرك تروحي للمستشفى، ومرواح المستشفى دلوقتي غير زمان، دلوقتي راحة تعرضي نفسك للإصابة بمرض قاتل، ربنا يعافينا جميعاً.

الفطار فري، بيض مقلي وعيش وطبق فول أو بطاطس مقلية كمية قليلة، مع العيش وطماطم، وغيره من أكلات الفري الخفيفة في الفطار أو ناخد جبنة زي الرومي مش معتادينها في فطار الرجيم، أو تاكل نفس الفطار الدايت بس تزود كمية العيش، وطبعاً لو حابب الفطار يوم دايت بنسبة 100% براحتك خالص.

 

أما بالنسبة للغداء

ففي أكلات جميلة جداً نستمتع بيها في اليوم ده، من غير تضرنا.

طبعاً ممنوع تماماً أي أكل من خارج المنزل.