قصة قصيرة حزينة

هعمل رجيم وأخس، النهاردة أنا إرادتي في أقوى حالتها وحاسة إني هكسر الدنيا، وكلها شهر ولا اتنين وأكون واحدة تانية، ألبس براحتي، وصحتي تتحسن، كفاية بقى الوقت اللي ضاع ده كله وأنا في هيئة مش راضية عنها.

إيه الفطار ده ان شاء الله؟؟

أنا هفطر بيض وخيار،
لا حول ولا قوة إلا بالله، جنبة قريش وخس ايه اللي أفطر بيهم، أنا لا يمكن هعيش ليوم التلات بالوضع ده، مش هقدر والله مستحيل، أنا كنت بفطر رغيفين عيش مع بطاطس وفول وطعمية وبتنجان وكل ما يتم تحضيره في مطاعم الأكلات الشعبية مع كوباية الشاي خمس معالق سكر.

تقوم تقولي خيار وجبنة ومن غير عيش كمان، طيب يا دكتور هستحمل والله كلها ساعتين تلاته وييجي الغداء بقى.

ثواني كده، هو ده الغذاء بجد؟؟
ربع فرخااااااه. !!!! مسلوقة كمان ويوم من غير رز ويوم برز لا والله هنهزر؟

ازاااي يا دكتور بقى ، أنا كنت باكل في الغداء الديك ومراته وولاده وحلة محشي جميع الأنواع، وبحلي بكنافة والله، حرام كده 😞😞

طب أنا هسمع كلامك وههتم بالسلاطة مع البروتين اللي في الغذاء واجي على حساب الرز والعيش ماشي.

إيه ده الحمد لله قومت شبعانه، معقول؟
معقول بجد؟؟

فطرت دايت وغداء دايت، خلاص بقى وجبة العشاء وأبقى كده نجحت في أول يوم رجيم، وهكذا باقي الأيام.

أومال ليه يخويا بيقولوا ع الرجيم صعب، السلطة يا جماعة السلطة هي الحل وشرب المياه.

بعد ساعات قليلة .. 🕰️

بطنااااااي، جعاااااانة، كفاية

طب كلي سلطة، طب المياه طيب، طب معلقة عسل حتى لو عايزة حاجة مسكرة، أو فاكهة،
طب بقولك كوباية لبن دافية عليها قرفة هتطير الجوع، الرجيم يا آنسه الرجيم يا مدام، الرشاقة يا هانم.

السلام عليكم، مطعم ” دلع كرشك ”

أيوا يا فندم مع حضرتك

عايزة أعمل أوردر ينسيني مرارة يوم الرجيم العصيب ده، عايزة أنسى اني فكرت اصلا اعمل رجيم، بيقولي خس وخيار، ولبن وزبادي ايه ده اللي مش هيخليني اجوع.

بتقولي حاجة يا فندم؟؟ ، لا يخويا بقولك هات لي بيتزا طولي كده وعرضي غرقهالي جميع أنواع اللحوم والجبن، يعني هما اللي خسوا خدوا إيه، ماله الكرش يعني، ده حتى والله مش هاين عليا افقده بعد عشرة السنين دي كلها.

الاوردر وصل، وكلت البيتزا، وهكذا الحال عند أكتر من 90 ٪ من اللي بيعملوا رجيم، بيضحكوا على نفسهم إن الراحة في الأكل، وإن مفيش مقابل حقيقي يستاهل أنهم يتعبوا ويعانوا مع الرجيم.

الخلاصة من القصة دي، إن أي حد يقدر يلتزم نص اليوم بدون أي إرادة عادي يفطر قليل ويتغدى قليل، لكن وقت الليل ما ييجي، هتتقلب عليه المواجع، وهنا مطلوب تستحضر كل قوتك وارادتك والدافع اللي بدأتي عشانه الرجيم، تتقبلي المعاناة وتحبيها عشان دي اللي هتخلق منك الشخص اللي بتحلمي توصلي ليه، الإرادة لوحدها مش كفاية، جسمك فعلا محتاج أكل ولازم في الوقت تصارعي بكل قوتك إن اليوم ينتهي على خير، مش لازم بقى عشان جعانه بالليل يبقى نخربها ونلغبط، نفرض على نفسنا يوم واتنين ان وقت الجوع نأكل خس أو خيار في العشاء مع الزبادي، وواحدة واحدة هتلاقي نفسك أصلا مش طايقة الأكل الكتير ولا الأكل الغير صحي.

بالتوفيق ليكم جميعاً يارب، إثبتوا يا أبطال 💪