التعرض للشمس وحرق الدهون
التعرض للشمس وحرق الدهون

فوائد التعرض للشمس لرفع معدل حرق دهون الجسم بالكامل

هو العنوان صح، ولا فيه حاجة غلط، يعني معقول لو إتعرضت للشمس جسمي هيحرق دهون، الإجابة المختصرة “نعم” طب إزاي وإيه العلاقة، ده اللي هنعرفه في المقال البسيط بتاع النهاردة، أتمنى بإذن الله يفيدكم.

في عام 2015 عملوا دراسة إتنشرت في مجلة “السمنة” على مجموعة من الأشخاص أثناء إتباعم لنظام غذائي، والهدف من الدراسة هو معرفة تأثير فيتامين دال، على كتلة الدهون ومعدل حرقها بالجسم، وأكدت الدراسة في النهاية أن في علاقة مباشرة بين الفيتامين ده وحرق الدهون، وإن نقصه بيؤثر سلباً على التخلص من الدهون لخارج الجسم.

طيب هل المفروض دلوقتي، تعملي تحليل فيتامين د، أو تبدأي تآخدي مكملات موجد فيها، لأ طبعاً، جربي الأول تغيري نمط حياتك، بالإهتمام بالأطعمة الغنية بفيتامين د، والأهم هو التعرض للشمس.

اللي بيحصل أن أغلبنا بيتجنب التعرض للشمس، مع أنها أحد أفضل مصادر لحصول الجسم على فيتامين د، اللي جسمنا محتاج ليه، علشان يمتص الكالسيوم، والكالسيوم ده مهم علشان يحافظ على الكتلة العضلية والأعصاب والعظام وكمان بيقوي المناعة.

أفضل وقت للتعرض للشمس

حاول على قد ما تقدر تتعرض للشمس يومياً مدة من 10 دقائق إلى 15 دقيقة، ومهم تعرفي إن كل ما تكشفي جزء أكبر من جسمك كل ما ده هيسمح للجسم يصنع كمية فيتامين د بكمية أكبر، يعني الكمية اللي هيصنعها جسمك من فيتامين د، هتكون أكبر لما تعرض مثلاً إيدك وجزء من رجلك والوجه مقارنة بشخص بيعرض الوجه فقط أو اليد فقط وهكذا.

ممكن الموضوع يكون بالنسبة للسيدات صعب شوية موضوع أن جزء يبان من الجسم، يتعرض للشمس، لكن في حل وهو إنك تشوفي مكان في البيت يكون بيدخله الشمس، ومش مكشوف للجيران أو الشارع، وإن كان الأمر مستحيل فيكفي فقط الوجه وكف اليدين في مكان زي البلكونة.

أفضل وقت للتعرض للشمس مدة الربع ساعة هو في الفترة ما بين 10 صباحاً وحتى 2 إلى 3 عصراً.

إنتهى موضوع اليوم، لو حابين تسألوني أي سؤال إكتبوه في تعليق في فيديو على قناتي على اليوتيوب، برد على عدد كبير يومياً من الاستفسارات هناك على قد ما أقدر كل ما بكون فاضي، تقدروا تروحوا للقناة من خلال الضغط على كلمة (دكتور أحمد منصور) الموجودة بين القوسين والملونة باللون الأزرق.