رجيم جديد سريع وبسيط وغير مكلف
نظام تخسيس غير مكلف وسريع المفعول

نظام تخسيس صحي وسريع المفعول وغير مكلف لمدة 7 أيام بدون فري

السلام عليكم ورحمة الله وبركاته، أهلاً بكم من جديد، كل عام وأنتم بخير، بمناسبة المولد النبوي الشريف، نظام الأسبوع الحالي متوافق مع هذه المناسبة، من ناحية إن أغلب البيوت ومن ضمنهم طبعاً كل اللي بيعملوا رجيم، موجود عندهم بالفعل أو خلاص هيشتروا حلوى المولد.

نظام الأسبوع الحالي هيكون عبارة عن جدول أكل لمدة 7 أيام بدون يوم فري، في حالة إنك هتاخد من حلاوة المولد، لكن لو مش بتحبها ومش هتآكل منها خلال الأسبوع، يبقى خلاص هتطبق جدول الأكل، أول 6 أيام من السبت للخميس، وهتاخد يوم الجمعة فري.

الرجيم الجديد سهل وبسيط وبكل تأكيد صحي، وفكرة إنه سريع المفعول من عدمه، فدي حاجة هتشوف نتيجتها بعينك، لما تطبق رجيمنا بدون أي لغبط من أول أسبوع تلتزم فيه بنسبة 100%.

عملت ليكم موضوع فيه السعرات الحرارية في كل حلوى المولد، ولو هنآكل منها خلال الأسبوع ناخد كام قطعة، موضوع مفيد إن شاء يعجبكم، تقدروا توصلوا ليه وتقرأوه، لما تضغطوا على كلمة (السعرات الحرارية في حلاوة المولد) الموجودة بين القوسين.

 

نظام تخسيس صحي وسريع المفعول

 

أكتر حاجة أتمنى أنك تضمنها ليا، هي كمية السكر اللي هتستهكلها على مدار اليوم، وكمان كمية الملح، بجانب شرب المياه، خاصة مع إن الجو بدأ يبرد نسبياً، بالتالي ممكن نتجاهل أو نغفل عن شرب المياه بالكمية المطلوبة.

إلتزامك بالرجيم بدون الحرص على بعض القواعد اللي هنقولها دلوقتي، مش هيوصلك للنتيجة اللي نفسك تشوفها، الموضوع مش مجرد جدول أكل فطار وغداء وعشاء، لأ أنت محتاج تظبط كمان بعض الأمور بجانب اختيارات الفطار والغداء والعشاء، للوصول لأفضل نتيجة ممكنة يا بطل.

زي ما قولنا خد بالك من السك “السم الأبيض” وصديقه الملح، معلقتين سكر في اليوم كافيين جداً جداً، والملح ناخد بالنا من استهلاكه ومن استخدامه في الأكل، منزودش الكمية عن معلقة واحدة على قد ما نقدر.

شرب المياه على مدار اليوم مطلوب، وخاصة قبل الوجبة، بحوالي ربع ساعة، وراقب نفسك واحراص على إنك تشرب يومياً ما لا يقل عن 8 أكواب.

التعرض للشمس مهم كل يوم لو أنت من النوع اللي مش بتفرض عليه الظروف أنه يتعرض للشمس، وده علشان الحصول على فيتامين دال، المهم جداً لرفع معدل حرق الدهون.

آخ نقطتين أتمنى تاخد بالك منهم، وهما النوم كويس والرياضة، النوم يومياً لمدة لا تقل عن 7 ساعات بإنتظام على قد ما تقدر، والرياضة يومياً نصف ساعة، لو حتى هتكون مشي في المكان.

 

جدول أكل الرجيم الجديد

 

من يوم السبت 24 أكتوبر حتى الجمعة 30 أكتوبر.

زي ما اتفقنا الأسبوع بدون يوم فري في حالة إنك هتاخد حلاوة المولد، ومسموح ليك بقطعتين كل قطعة في يوم مختلف، لكن لو مش هتآكل من حلاوة المولد، في الحالة دي هيكون مسموح ليك بيوم فري “يوم الجمعة” إن شاء الله.

رجيمنا سهل جداً، مش مهم نبص فقط للرقم اللي بننزله على الميزان، شكل جسمنا وهل بيتأثر بشكل سلبي ولا لأ، وكمان صحتنا وضعها إيه مع الدايت، أمر مطلوب التركيز عليه، وده اللي بنضمنه ليك في رجيم دايت كلينيك، بفضل الله.

 

العشاء ثابت على مدار الأسبوع:-

  • 2 علبة زبادي
  • أو كوب لبن رائب.

 

مسموح خلال اليوم بـ 2 وجبة خفيفة بين الوجبات الرئيسية، وجبة بين الفطار والغداء، ووجبة أخرى بين الغداء والعشاء، ولو تقدر تستغنى عنهم مفيش مشكلة، أو لو مش متوفر عندك السناكس اللي هنكتبها، ممكن تكتفي بتناول ثمرة خيار مع كوب ماء فقط، أو حتى كوب من الشاي الأخضر مع الليمون.

 

إختيارات الوجبات الخفيفة سناكس:-

  • ثمرة برتقال (ممتاز)
  • كوب حليب خالي الدسم
  • نصف ثمرة مانجو كبيرة
  • نصف كوب حليب كامل الدسم (ممتاز)
  • ثمرة مانجو صغيرة
  • ثمرة جوافة (ممتاز)
  • ثمرة موز
  • 3 تمرات
  • ثمرة رمان
  • 3 ثمرات برقوق
  • ثمرة كمثرى (ممتاز)
  • نصف كوب ترمس
  • ثمرة بطاطا مشوية
  • كوز ذرة مشوي
  • كوب فشار ” بعد التحضير”
  • 6 حبات لوز ني (ممتاز)
  • كوب زبادي + ثمرة كيوي

 

المقصود بكلمة (ممتاز) بين القوسين، إنه خيار مفضل كوجبة خفيفة:-

  • ثمرة جوافة
  • نصف كوب حليب كامل الدسم
  • ثمرة برتقال
  • ثمرة كمثرى
  • 6 حبات لوز ني

 

 

كده معانا العشاء والوجبات الخفيفة المسموحة خلال الأسبوع، باقي الفطار والغداء.

 

إختيارات وجبة الفطار من 24 حتى 30 أكتوبر 

 

من الأكلات الجميلة جداً “طعم وفائدة” بطاطس مسلوقة مع البيض المسلوق، حبة بطاطس نسلقها ونهرسها ونقطع عليها فلفل أخضر مع البهارات، ومعاها بيضة مسلوقة، وطبق من الخضروات المقطعة شرائح.

أو

4 معالق فول + ثمرة طماطم وفلفل أخضر مع خيار + رغيف عيش سوفان أو نصف رغيف عيش سن.

أو

بيضة مسلوقة + قطعة جبنة قريش + خيار أو خس أو فلفل أخضر مع طماطم + رغيف عيش شوفان أو نصف رغيف عيش سن.

أو

ثمن كيلو جبنة بيضاء لايت (125 جرام) + بيضة مسلوقة + خيار أو خس أو فلفل مع ثمرة طماطم + رغيف عيش شوفان أو نصف رغيف عيش سن.

أو

2 معلقة فول + بيضة مسلوقة + شرائح طماطم وفلفل وخيار + نصف رغيف عيش سن أو رغيف عيش شوفان.

أو

2 علبة زبادي + 1 توست بني + خيار أو خس

أو

2 قطعة جبنة قريش + نصف رغيف عيش سن + طبق سلطة

أو

كوب حليب + 3 معالق شوفان أو كورن فلكس أو قمح بليلة + معلقة زبيب أو معلقة عسل أبيض.

أو

2 بيضة مسلوقة أو مقلية بزيت زيتون + ربع رغيف عيش بلدي أو نصف رغيف عيش سن + خيار أو خس مع ثمرة طماطم.

 

إختيارات وجبة الغداء خلال الأسبوع 

 

ثابت مع وجبة الغداء حاجة من اتنين لإما طبق سلطة لإما طبق الخضار، والخضار يكون مطبوخ بطريقة صحية ومن الخيارات الآتية:-

  • كوسة
  • ملوخية
  • فاصوليا خضراء
  • لوبيا خضراء
  • بروكلي
  • باذنجان مشوي
  • سبانخ
  • قرنبيط

 

النشويات مع وجبة الغداء خلال الأسبوع

3 معالق أرز مسلوق أو 4 معالق مكرونة أو ربع رغيف عيش بلدي أو نصف رغيف عيش سن

 

الدهون الصحية

زيت الزيتون، معلقة كبيرة نستخدمها في تحضير الأكل أو نضيفها على طبق السلطة.

 

بروتينات نختار منها خلال الأسبوع

  • ربع فرخة مشوية أو مسلوقة
  • علبة تونة بدون زيت
  • 6 معالق لوبيا بيضاء
  • ثلث كيلو سمك مشوي (350 جرام)
  • ربع كيلو جمبري مشوي أو مسلوق
  • 200 جرام كفتة مشوية بدون دهون
  • 200 جرام لحمة مسلوقة أو مفرومة “محضرة دايت”
  • 200 جرام كبدة مشوية
  • 2 بيضة مسلوقة

 

أمثلة لوجبة الغداء

200 جرام كبدة مشوية بالفرن + حبة بطاطس مشوية بالفرن + شرائح خضار طماطم وفلفل وخيار

أو

علبة تونة بدون زيت + نصف رغيف عيش سن + طبق سلطة

أو

2 سمكة مشوية + 3 معالق أرز + طبق سلطة كبير

أو

2 قطعة لحمة مسلوقة + طبق فاصوليا خضراء + 3 معالق أرز

أو

ربع فرخة مسلوقة، محمرة بالفرن + 4 معالق مكرونة + طبق شرائح خضار

 

وهكذا، تقدروا تنوعوا براحتكم، ضمن الخيارات المسموحة، وبكده يكون معاكم جدول أكل صحي ومتوازن ونتيجته إن شاء الله تكون جميل، ويكون سهل عليكم تطبقوه.

دمتم بخير ولا تنسوني من صالح دعائكم، نتقابل الجمعة 30 أكتوبر، ومنتظر تقييماتكم بخمس نجوم لتطبيق دايت كلينيك على جوجل بلاي.

برنامج للتخسيس الصحي